Бурхадын инээмсэглэл

Бурханыг-Аз жаргалыг хайх хэрэггүй аж. Тэрээр бидэнтэй хамт мөнхөд байсаар ирж шүү дээ.  

Сайн ажиглан харах юм бол бидэн дээр найз минь болон ирнэ. Тэрээр нэгэн цагт эцэг өвгөд минь ч , ижий аав минь ч,  үр хүүхэд минь ч болон аялахдаа тэдний минь өр  зүрхэнд даруухан инээмсэглэл цацруулан биднийг олж харан харахыг үнэнчээр хүлээсээр л байдаг аж.

Бидний эргэн тойронд бурхад инээмсэглэн байнам.

Бурхадын инээмсэглэл. . 

.

Би Таныхаа аниргүйхэн мишээх гэрэл цацарсан инээмсэглэлд тань дурлажээ.

Би Таныхаа гэрэл, илч дулаан болон өглөө бүхэн ирдэг итгэл найдвард тань дурлажээ. 

Би Таныхаа жаргаланг урин дуудах энэ орчлонгийн дуун аялгуунд тань дурлажээ.

Тиймээ, үнэндээ Бүхий л Бурхад нэг л янзаар инээж, нэг л янзаар хайрлаж, нэг л янзаар үнэнг чин үнэнчээр тунхагланам.

 Хайсан эрснээ олоход тэрээр хязгаарГүй, хэмжээлшгүй, төсөөлшгүйн гүнд, холын холд хэрнээ өр зүрхэнд минь хамтдаа цохилон цохилон, булгилан булгилан байсныг тань олох юутай сайхан.

Та минь үнэндээ Бидний хайртай бүхэнтэй цуг оршиж, өхөөрдмөөр инээх бяцхан хүүхдийн дуу хоолойнд нуугдаж, Нэг л янзаар нууцлагхан инээсээр л. . .

Би таныхаа инээмсэглэлд дурлажээ. Бүх бурхад аав ээж, эмээ өвөө, ах эгч, анд нөхөд, үр хүүхэдээр минь дамжуулан энэ орчлонд аз жаргалыг тунхаглан инээсээр л. . .

2022.11.04 

өврийн дэвтрээс

Энэ орчлон хорвоод сэтгэлээр унах, амьдралд итгэлгүй болох гээд л маш олон биднээс шалтгаалахгүй зүйлс тохиолддог. Тэр үед түр зогсож байгаад элдвийг эргэцүүлэн тунгаан бодож, Танд урам дэм өгч байгаа бүхнээс суралцаж эхлэхэд миний өмнө үүссэн зүйлс хичнээн өчүүхэн өрөвдмөөр болохыг хараад ичих шиг болдог. 

Ингээд л өглөөний гэгээн нарны илч, үзэсгэлэнт цэцэгсийн ургах гэсэн тэмүүлэл, аниргүйхэн алсаас анивчих одод, хажуу айлын эмээгийн арц хүжний үнэр, гадаа тоглох хүүхдийн инээд, хацар илбэх салхины илгээмж гээд л юм бүхэн  энгийн хэрнээ уялдаа холбоотой. 

Нас ахих тусам Нулимс ойртож аливааг хайрын сэтгэлээр харах нь хүмүүний амьдралын нэгэн жаргалан болох нь юуных вэ? Анд минь Таны амьдралд сайхан бүхнийг ерөөе

2019.11.01 УБ хот

өврийн дэвтрээс...

Амьдрах сайхаан, амьд явах бүр сайхан. талархал дүүрэн амьдраарай.

 Хэн нэгэн магадгүй чамайг гомдоох вий тэгвэл тэр хүнийг өөрийнхөө үрийг байна гээд уучлаарай.

Нэг мэдэхэд та бүхнийг өөрөөр өөриймсөг харж энэрдэг болно. Ид шид бол хайр юм даа. . .

их аян

Хязгаарын чанадаас морилон ирээд 

Хэмжээлшгүйг мэдрэх бат оршнол больё юу.

Бүхний утгыг дэлгэрүүлэгчийн үндсэнд 

Бат тэврэлдэн бүхий л жаргаланг ундраан ундраа юу.

Сэрчигнэх навчсын чимээ

Сэмхэн жиргэх шувуудын жиргээ

Дээдэд хөхрөн тэнгэр огторгуй

Дэргэдээс алсрах их аяныг мэдэр юү 

юуных вэ

Энхрий ялдамхан гээд илбэн таалахуйд 

Эмзэг турьхан хөөс мэт замхран оддог нь юуных вэ?

Бараа сүүдэргүй дэргэд минь үгүй ч 

Бодол сэтгэл, лугшилт бүхэнд оршсон нь юуных вэ?

өврийн дэвтрээс

Ачлалт гэрэл таалан илбэхүйд

Ахуй бүхэн утга төгсөд урванам...

🌺🌺🌺🌺🌺🌺🌺🌺🌺🌺🌺

Хаана оршин буй нь хамаагүй ээ

Хязгааргүй их

итгэлээр дүүрэн бай.

өврийн дэвтрээс

Дөрвөн улирал бидэнд хүчтэй байхыг сануулна. 

Дөрөөн дээрээ босоод тэмцэгч байхад дуудна. 

Алсын амгаланг амин зүрхэнд минь мэдрүүлнэ. 

Аяа Монгол хүмүүн бид юутай өндөр суудалд тухалнам бэ.

2020.10.09

Гэсэн ч би чамдаа хайртай

Хайраас  зугтаад удсан юмсан

Хайлан зүрхэнд минь чи гэнэт л гарч ирсэн

Чиний сонсголонт, юм бүхэн эгдүүтэй гэрэлтэж

Чин шулуун зан чинь хүртэл өхөөрдөм байсан 

Чамдаа би бүхнээ гээн гээн дурлаад

Чамгүйгээр өдөр хоног бүхэн уйтай санагднам

Дахин амьдралд баяр хөөрөөр цэнэглэгдэн

Даль жигүүр ургасан мэт хайрын тэнгэртээ дүүлсэнсэн

Өмчлөх эрхгүй хайрын өмнө

Өнөө би гэмтэн хэмээгдэн зогсоно

Өөрөө би гэмгүй ээ

Үнэн зүрхээ нээн нээн л дурласан минь л буруутай

Хэзээ орчлон ертөнц хайрын сайхныг эрх чөлөө гэдгийг ойлгох вэ

Хэзээ хүмүүний атгаг миниймхэрэл  уучлал өршөөлөөр солигдох вэ

Хэзээ ариухан бүхнийг ариухнаар нь харж мэдрэх вэ

Хэзээ хамаг оршихуй гүнд хайр өөрөө жарган цэнгэж байдгийг ухах вэ

Гэсэн ч би чамдаа хайртай

Гээгдэж орхигдсон ч зүрхнийхээ гүнд нандигнана

Хаяа нэгхэн үгүйлэн үгүйлэн уйлан жаргах байх

Харин мөч бүхэнд чамдаа жаргалангийн дээдийг ерөөе дөө

Би чамдаа хайртай

2023.10.05

Усны тусгал дуулдаг болов уу

Усны тусгал дуулдаг болов уу.

Уяран хайлан баясдаг болов уу.

Нарны гэрэл бүждэг болов уу.

Намраас намарт амьдрал хөвөрсөөр л...

Нэгэн цагт балчир байсансан

Нэрээ марттал орчлонг бэдэрсээр л...

Мянга мянган удаа ирж буцахдаа

Мандах наранд талархаж байсан нь хэд бол...

Хайртай хүмүүс  минь холдон одоход 

Хаанаас ч юм бэ хайж эхлэнэ тэднийгээ

Яагаад амьдад нь харамгүй хайрлаж чадаагүй юм бэ.

Яагаад хамаг бүхнээ зориулдаггүй юм бол доо.

Хожимдсон ухаарал минь өдөр бүхний мөч бүхэнд бүх зүйлдээ талархах их хүчийг өгнөм.Хүмүүн бидэнд... 

УБ хот. 2020.10.05

хослон

Чиний минь гэрэл надад уусан хамтдаа хослон жарган бүжихүйд

Чамайгаа би сарнин сарнисан ч нандигнасаар гэрэлд өгөхүйд

Хязгааргүйн бүжиг тоолшгүйд жаргаланг түүчээлэн нэгдэн нэгднэм

Чамдаа баярлалаа

Шинэхэн солонгон 🌈 зам зурайнам

Гэрэл бүхэн  гэрэлтэнэ 🌞 басхүү үл гэрэлтэнэ🌚

 Дуу чимээ 🔊🎶 бүхэн  дуурьсана басхүү үл дуурьсана

Аминчлан нандигнах нэгнээ уяаг нь тавьж одуулахуйд

Асар уудамхан тунгалагханд уусан уясан нэгднэм 

Мянгантаа ирж мянгантаа буцахдаа

Мэгдэн сандарсан нь хэд билээ

Минийх минийх хэмээн бид мунхаглан мунхаглахдаа

Мөнхөд барих сансрын олсноос баттай зуурчээ

Таван махбод нь гурван цагтаа өгсөн уруудсаар хичнээн олон тойроо бол

Таван язгуурын Гэгээн маань гурван үе бүхэнд ачилсаар л байж дээ

Гагц аврал маань одохдоо амин захиасаа өвлүүлсэн байж

Ганцаар үлдэх тэрхэн цэгт өрөө 💌 өөрийгөө уудлан нэхэн ухаажнам одоо

Аминчлан барьсан алтан 🏵🕸 тороо ч 

Амандаа хүлхдэг амтат бурмаа ч

Үзээд барьсанд боддог миниймхэрэх сэтгэлээ ч

Үүсэл төгсгөлийн хуулинд өнөө би өргөе

Шинэхэн солонгон 🌈 зам өмнө минь өнөө ихэрлэн зурайнам

Шинийн арван бүхэнд болзсон зүгтээ амирлахад дадуулья

Гэрэл 🌟бүхэн  дуу чимээ🎶 бүхэн огт оргүй аж...

2023.09.24 

Намрын дунд цагаагчин 🐓 сарын шинийн 10-ны хөхөгчин🐓өдөр. 

УБ хот.Бага тойруу

Хүн-Шувуу

Салхи сэвэлзсэн намрын эхэн сарын шинийн 15 нд газар дэлхийг холбосон галт урсгал дайран өнгөрлөө. Гэрэлт урсгалын гэгээн очис гэрэлтэн буусаар газарт шингэлээ.

. . . царцаа шаагин өвс наагина, шаазгай шагширч тарвага хошгирно, өвсний үзүүр налсхийн урин тонголзохуйд өмнө минь ятга шаазгай судалт жирх ихэрлэн эргэлдэнэ.

Нам гүм орчлонгийн шуугиан ээлжлэн солигдоно, өр зүрхний минь лугшаанд гэрэлт дуулал дуурьсана. Аялгуу алс алс тийш цацран түгэхүйд агуу том далавч аажмаар тэнийн дэлгэгдлээ. Үлээх салхиар хүч аван өөрөө ч мэдэлгүй гэгээн гэрлийн зүг өнөө би нисэн дүүлнэм.

. . . шаргалтан алаглах сайхан хөндий, мушгиран шуугих голын урсгал, мянга мянган уулс даваа, нүүгэлтэн налайх миний эх дэлхий. 

Аялгуу дуурссан зүг рүү аян зам минь дурайлаа. 

Аяа аа, асгарах нулимс,талархалын тарни асар дээдэд цэцгэн гэрлүүд болон хөөрлөө. Түмэн өнгөөр гялтганан гэрэлтэх, алтран цацрах талархалын гэрэлт цэцэгс нь түг түмэн ододтой ижилсэн ижилслээ.

Орчлонгийн гайхамшигт урсгал одоо энд од болон бөөгнөрлөө. Сүлэлдэн гэрэлтэх өнгөт очис, сүүн далай эхийн сэтгэл замбуулинг уяраан амь амьсгалаа өргөхүйд, анхны амьсгалаа авлаа. 

Зол жаргал дэлгэрэн гийлээ. Хязгаар нь үгүй огторгуйд нэгэн од мэндэллээ. 

Хамаг бүхний итгэл найдвар болон хорвоод нэгэн од мэндэллээ.

 Тэврэн авч бүйвээлмээр тийм нэгэн яруухан аялгуу орчлонгийн уудамд дуугаа хадаалаа.

 Одот орчлонд нэгэн Бурхан мэндэллээ. 

Сайхан аялгуу түгэн түгэхүйд соронз адил хамаг Бурхад цуглалаа. 

Өөр өөрийн эрдэм авьяасаа өнөө бяцхан бурханд бэлэглэлээ. 

Хүмүүний ухаан үл гүйцэх хурдаар хөгжилтэй Бурхан өсөн эрийн цээнд хүрлээ.

Эс ширхэг бүрээс нь алтран цацрах гэрэл гялтганана. 

Аяа аа юутай үзэсгэлэнтэй, хараа булаам Бурханы аврал вэ?

Өчүүхэн би элсний ширхэгээс ч өчүүхэн ч өнийн явдлыг харан харан бахдлаа.

Яасан сайхан хайр вэ?

Ямар агуу гайхамшиг вэ?

2018-08-26 , хуурай мухар ам

зүрхэн гэрийн эрэл

Олон мянган жил эрж хайсаар
Одоо л нэг түүнийгээ олсонсон
Орчлонгийн хүлээсэнд олзлогдоод
Оосор бүчгүй жаргалд гуниж суух юм даа

Хэзээ хэдийд бид
Хайрыг эрх чөлөө энэрлийн урсгал гэж ухах буй
Хэзээ хэдийнээс бид
Хайр бол хэмжээ хязгааргүй итгэл гэдгийг онох вэ

Хөөрхийлөх тушаагаа тас татья
Хүмүүний мөрийг чөлөөлөлд тушаая
Анхны алхам нь өршөөлийн гуйлга байг
Аяа орчлонгийн хүлээс бүхэн уяралд бууж өгсөөр л байг

Харанхуйд аниргүйхэн алхая
Хамаг жим аяндаа гэрэлтэг
Нилэнхүй чөлөөлөлд тэмүүлэг
Нээрээ хүн бүхэн итгэлээ улам батжуул даа

Тэр цагт, тэрхэн агшинд
Тэвэр дүүрэн дэлхий ч инээнэ
Тэгээд  бурхад бүгд дуулан дуудна
Тохилог зүрхэн гэр тань өнө батжиж
Та хязгаарыг давсан Хүмүүн-Бурхан болог.

Агшин бүрд мөр тань гэгээн байг

2023.09.10. УБ хот.

та минь

Өмнө минь яваад замыг минь засчээ Та

Өнөө би маргаашдаа юуг зориулна вэ?

Өдөр хоногийг хоосон туучсаар байгаад

Өд сөдөө зулгаасан нэгэн болчих вий.

Амьсгалд агшин бүхэн үнэтэй

Амьдралд инээд бүхэн дэмтэй

Аялахад ухаарал бүхэн хэрэгтэй

Аяа алтан агшинг жаргалд урвуулья

та минь

Ээрэм элсэн цөлөөр мянган жил бэдэрээ юу
Эвийлж амжилгүй ууршсан шүүдрийн дуслуудыг хайгаа юу
Огтлолцол, давтамж, анзаараггүй он жилүүд минь чи 
Одоо чандманаас ч илүү үнэнч сэрэмж төгөлдөр нэгэнд урва даа...

Мэлмэрэн тунарах таны үггүй харцанд
Мөнхийн гоо сайхан, эгэлгүй хайраар сүлэлдэн булгилнам
Зүрх минь өнөө таныхаа өмнө сөхрөн сөхөрнөм
Зүйрлэшгүй нинжин таныхаа халуун хайранд дахин нэг урамшнам...

Таныг хайрлах сайхан
Таныгаа харах сайхан
Орчлон хэдий удаан оршном
Олон амьтныг гэгээрэлд хөтөлнө үү Та минь

Ижийнхээ энхрийллийн харцыг таниасаа дахин дахин харлаа Эма хо

Эцгийнхээ өр зөөлөн уяныг таниасаа дахин дахин мэдэрлээ Эма хо

Өрөөлийн төлөө өөрийгөө золиослох өр нинжин бүхнийг тань магтья Эма хо

Өнөөдрөөс зөвхөн таныхаа хязгааргүйд уусан эрхлэн жаргая Эмо хо

Таныг харах сайхан, таныгаа мэдрэх сайхан

Мянган мянган нигүүлслийн дусал агуу далай болохуйд Далай их багш минь та бүхний зүрхэнд мишээн мишээнэм.


Таньдаа баярлалаа.
Энэхэн цагт хамт байгаад баярлалаа. 
Таныхаа сургаалиар оюунаа номонд одуулж, номын мөр маань саадгүй түргэнээ дэлгэрэн жаргаж гэрэлтэх болтугай

Баруунтаа

Зүрх минь баруунтаа дуудагднам
Зөөлөн салхи илбэн илбэнэ
Зөндөө удаан хайсан жаргалан
Зүйрлэшгүй намуухан давалгаанд бүүвэйлэгднэм

Туулайн дүрст инээмсэглэхүйд
Тунамал оршихуй амран ухаажнам
Амар амгалан халгин цалгина
Агшинаа хязгаарын чанадад уусан одном

Ариухан Арьяабал рашаанаа мэлтэлзүүлэн
Аядуухан Амидэва улаахан гэрлээр урина
Шувууд зүрхэнд жиргэж сэтгэлийн солонго нэлэнхүйг хучихад
Шаагих гэрлэн бороо энд тэндгүй гэрэлтэн гялтганана

Тийм нэгэн ангид оршихуйд
Тэнд л өнө удаан сэрүүцэн суумаар
Агаар нь таван тансагаар бялхана
Аяа амгалан цогцолсон бурхадын өлгий 

Алтан оройт Очирдарийн шүтээнээ
Аврал эрэх өр зүрхийг минь энхрийлнэм
Ачит багшаа санан санан мэгшихүйд
Алсын одны тэврэлт тайвшруулан эвийлнэ

Зүрх минь баруунтаа цохилохуй яа
Зөндөө удаан хайснаа олох адил аа
Зүрх минь баруунтаа ....

тэр л чигээрээ чамдаа уусахсан

Сэтгэлийн үзүүрт чам руу гүйсэн бодол
Санааны мухарт чамайг үгүйлсэн бүхэн
Уйлан уйлмаар эрхлэн тунирхмаар тийм нэгэн мэдрэхүй
Улаан галд зүрхээ атган зүтгэх миний тэнэглэл...

Толинд тусах усны бөөм тунарч одлоо
Тэнгэрт хурах сэмжин үүл салхины аясаар одлоо
Давалгаалан давалгаалах сэтгэл аанай номхороход
Далай их хайр тэр л янзаараа инээмсэглэн инээмсэглэнэ

Анх байсан тэр л чигээрээ
Ахиад ирэхэд ч тэр л янзаараа
Хувьсан өөрчлөгдөх хүмүүн сэтгэл л
Хязгааргүйн өмнө өнөө сөхрөн ухаажнам

Гэрэл олон өнгөөс гэрэлтэн цогцлохын адил
Гэрэлтэх сэтгэлтэн чамайгаа үдэн явуулья даа
Өмчлөх тороо гэрэлд өргөлөө, өглөө
Өнөө чи минь дураараа нис дээ, гэрэлт дээ...

Чиний хоолой зүрхийг минь гижигдэн
Чиний нүд намайг хоослоход
Чамгүйгээр би  яаж ийм удаан байснаа
Эрээд хайгаад олсонгүй, эрхэмлэн нандигнан чандлая даа.

Сэтгэлийн агууг
Хайрын сайхныг
Харамгүй харуулсанд баярлалаа.
 
Өөрийгөө олоогүй намайг уучлаарай

сэтгэлийн давалгаа

Мянга мянган жил салхины аясаар гэгэлзэх сэтгэлээ даган амьдарсаар ирсэн хүмүүний хуйсагнуур сэтгэл.

Жаргал гэж бодсон бүхэн маань зовлонгийн шалтгаан болж, улмаар уг үйлийнхээ нэгэн эд эс нь болон агуу том амьдрал хэмээх нэгэн байгууламжид өөрийгөө хайрцаглан хашнам.

Тэгээд л өөрийн гэсэн тогтсон хатуу чанга бодлоор бүхэнд цензур тавин сайн муу, сайхан муухай, надад таалагддаг таалагддаггүй хэмээн олон янзаар орчлон хорвоог шүүн тунгаана.

Гэтэл үнэндээ тоолшгүйн дундах нэгэн цэгийн аялал оргүйд юу ч биш. 

Тиймээ, цаг ямагт сэрж сэргэж, аялж байгаа замаа зөв эсэхийг шалгаж алдаа байгаа бол засч залруулж үндсэн сууриа ухаж ухаажиж байх хэрэгтэй юм байна.

Цаг мөчид дулдуйдан амьдрах бидний амины богинохон мөчид ухаалаг, бүтээл өгөөжтэй, бусдыг бодсон уяхан сэтгэл, талархалаар дүүрэн амьдрахсан.

Сэтгэлийн давалгаа минь чи тогтуун байж, бусдын төлөө гэрэлт дээ.

цалума жимс

Шувууд жиргэн салхи сэвэлзэнэ

Нүд гялбам цэцэгсийн  далай юутай сайхан....

Моддоос унжих цалума нарны илчинд ичингүйрэн ичингүйрнэ

Газраар дүүрэн боловсорсон жимс үнэр анхилга урин дуудна.

 ....Намайг ав намайг ав гэх шиг ихэмсэг хэрнээ  бардам бас тогтуухан

Моддын дор суугаад нэгэн жимс авлаа...

Аажуухан хальслахад 

Анд нөхөд минь бүгд иржээ.

...Алиа хошин гэрэлтэх нүд, амин хайрын зөөлөн урсгал, итгэл найдварын гэгээн оч, өнө хойчийн үүрэг даалгавар, чанга хатуу сахилга бат, цайлган хайлган нинж сэтгэл

Оршихуй бүхэнтэй атгахан цалумагаа хуваалаа

Одооноос бүгд хувьсан дэвшлээ.

Чанадын хязгаар гүнд чинь бий

Чандлан нууцлан хамт байгаарай үр минь...

....

Аманд уусах амт

Хамар цоргих үнэр

Дотор булгилах сэтгэл

Бүхний гүнд 

Бүхэнтэй хамт сэргэх сэргэлт

Агшин бүхэн хязгааргуй руу хөвөн

Аажуухан гэрэл илчинд шингэн ээнэгшинэ

....Гэрлэн бөөм  болон дээш хөөрөн замхарахуйд

Гэгээн тунгалагхан бүхний төвд  хамт цохилном.

Ай юутай тунгалаг хан оршихуйн чанад вэ...

Хоосон хананд түгжигдэгч

Хязгаарт хүлэгдэх хүмүүний үйл
Үгэн  ташуураар түмэнтээ ноолуулжээ. . 

Гомдох ч эрхгүй, баярлах ч шаардлагагүй тэрээр
Хий хоосон хананд дахин бүү түгжигдээсэй. .  .