Тань руу

 Гараас  тань атгаад удаан алхахсан

Гялалзах оддыг хамтдаа харахсан

Энгэрт тань хоргодон үнэрлэн үнэрлэмээр

Энхрийхэн таныгаа юутай их санаа вэ

Аяа аа амраг минь 

Аялгуут дууг  захидал  болгон илгээе

Алтан нарны цацраганд хайраа би шингээе

Аясын салхи  хацрыг чинь шүргэхүйд

Аниргүйн гүнээс анирыг минь чимээлэв үү

 

Хөвч ойн шүүдэрт өглөөг

Хөвдөн дээгүүр гүйн хамтдаа угтахсан

Эрх бяцхан дагина нь болоод

Энхрий таньдаа уусан нэгдмээрээ

Ай миний амраг минь дээ

Амин шивнээг минь мэдрэв үү

Гараас  тань атгаад удаан алхахсан

Голт зүрх минь тань руу л тэмүүлнэм 

Зөндөө удаан хажууд тань баймаар

Зүггүйхэн сэтгэл минь тань руу нисчих юм аа

Тань руу

2026.01.03

Та минь (Далай багшдаа зориулав)

Ээрэм элсэн цөлөөр мянган жил бэдэрээ юу

Эвийлж амжилгүй ууршсан шүүдрийн дуслуудаа хайгаа юу

Огтлолцол, давтамж, анзаараггүй он жилүүд минь чи 

Одоо чандманаас ч илүү үнэнч, сэрэмж, төгөлдөр нэгэнд урва даа...

Мэлмэрэн тунарах таны үггүй харцанд

Мөнхийн гоо сайхан, эгэлгүй хайраар сүлэлдэн булгилнам

Зүрх минь өнөө таныхаа өмнө сөхрөн сөхөрнөм

Зүйрлэшгүй нинжин таныхаа халуун хайранд дахин нэг урамшнам...

Таныг хайрлах сайхан

Таныгаа харах сайхан

Орчлон хэдий удаан оршном

Олон амьтныг гэгээрэлд хөтөлнө үү Та минь

Ижийнхээ энхрийллийн харцыг таниасаа дахин дахин харлаа Эма хо

Эцгийнхээ өр зөөлөн уяныг таниасаа дахин дахин мэдэрлээ Эма хо

Өрөөлийн төлөө өөрийгөө золиослох өр нинжин бүхнийг тань магтья Эма хо

Өнөөдрөөс зөвхөн таныхаа хязгааргүйд уусан эрхлэн жаргая Эмо хо

Таныг харах сайхан

Таныгаа мэдрэх сайхан

Мянган мянган нигүүлслийн дусал агуу далай болохуйд Далай их багш минь та бүхний зүрхэнд мишээн мишээнэм.

Таньдаа баярлалаа.

Энэхэн цагт хамт байгаад баярлалаа. 

Таныхаа сургаалиар оюунаа номонд одуулж, номын мөр маань саадгүй түргэнээ дэлгэрэн жаргаж гэрэлтэх болтугай. 

2023.08.14 УБХот

Өргөл

Хаврын дунд сарын шинийн арван зургаанд Хайр талархал хажуунаас минь төөнөлөө. Сэтгэлд уянгалаг дуу дуурьсаж 

Сэмхэн дэвсээр нэгэн гэрлэн шувуу газардлаа. 

 Дэндүү үзэсгэлэнтэй юм чиний гоо үзэсгэлэн гээд 

Дэлхий ээж минь баярлан угтлаа чамайг Уртаас урт захиа зуусаар 

Уяхан замбуутивд чи минь заларлаа.

 Орчлон хорвоогийн орь ганц шүтээн болсон Онгон дагшин эх дэлхий минь Таньдаа мөргөе. 

Сэмэрсэн дээл шиг сэтгэл зүрх чинь шаналж байна уу? 

Сансар хорвоо бүхлээрээ Таны л төлөө залбирч байна аа. 

 Арга билэг нь тэнцүүхэн байдаг хорвоод Арай илүү хүмүүн төрөлхтөн догшроо юу даа. 

Аврал эрсэн байгаль дэлхийгээ тоосонгүй ээ. Авч идэхийн донд атгахан зүрхээ өгчээ.

 Амьтад шаналж, уйлахад тоосонгүй ээ Аадар, үер, гал гарсан ч анзаарсангүй ээ Гэмгүй амь сүйрсээр байхад ч сэхээрсэнгүй Гэрэл болон одоо би тэдний зүрхэнд шингэе дээ. 

 Өр зүрх минь юутай их өвдөнө вэ? 

Өнөөдөр л , өнөөдөр л гэрэл болон амиа Би өргөе өө. 

Жаргалан дуурсдаг жаалхан эх дэлхий минь Жаран жарнаар өртөөлөн замбуулинд

 цэцэглэг ээ. 

 Таны л өлмийнөөс цэцэгс дэлбээлж.

 Таны л өндөрлөгөөс үүлс, уулс шүхэрлэнэ.

 Таны л хайранд би гэрлэн Бороо болж орьё Таны л төлөө би таны Хүмүүн заяанд шингэе. 

 Гэрэл бүхэн минь Хайр авчрах болтугай. Гэгээ бүхэн минь Итгэл дэлгэрүүлэх болтугай.

 Гэгээн Наран бадамлан дэлгэрсээр л байг. Гэрлэн биеэ би Хүмүүн танд өргөлөө. 

 Дэндүү сайхан эх дэлхий минь 

Дээдийн жаргаланд умбаж байг дээ. 

Бурхад буудалласан Бумбын орон минь 

Баяр талархалаа таньдаа би өргөе дөө.

 Хаврын дунд сарын шинийн арван зургааны үдэш 

Хайр талархал зүрх бүхэнд шингэлээ.

 П.Дэлгэржаргал УБ хот, хуурай мухар зуслан 2020.04.09. 22.15

энгийн бүхний дотор

Эртний анд минь ирнэ гэдэгт итгэж байсан аж, мянга мянган жил хүлээсээр л байжээ.

 Энгийн бүхний дотор хязгааргүй жаргалан нуугдан,

 энгийн даруухан бүхний гүнд энэ орчлонгийн учир шалтгаан оргилон оргилон байнам..

өнөөдөр маргааш нөгөөдөр энэ бидний тоолол, 

үнэн, итгэл найдвар, амжилт нөхөрлөл тэнгэрлэг хязгаарын чанадын тоолол, 

гэрэл гэгээ, илч дулаан, өсөн дэвжих хүч чадал чанад хязгаарын орон зайн тоолол.

 Чандманлан нэгдэх энэ гурван тоолол эрч хүчээ аван нэгэн зүгт дэвшнэм...

Хаанаас ирсэн хаачихаа мэдэхгүй  хүмүүний амьдралын их урсгал хөвөрсөөр л

Харин хэнийх гэдгээ мэдэх боломж олгосон амьдрал тандаа талархья...

Бурхадын инээмсэглэл

Бурханыг-Аз жаргалыг хайх хэрэггүй аж. Тэрээр бидэнтэй хамт мөнхөд байсаар ирж шүү дээ.  

Сайн ажиглан харах юм бол бидэн дээр найз минь болон ирнэ. Тэрээр нэгэн цагт эцэг өвгөд минь ч , ижий аав минь ч,  үр хүүхэд минь ч болон аялахдаа тэдний минь өр  зүрхэнд даруухан инээмсэглэл цацруулан биднийг олж харан харахыг үнэнчээр хүлээсээр л байдаг аж.

Бидний эргэн тойронд бурхад инээмсэглэн байнам.

Бурхадын инээмсэглэл. . 

.

Би Таныхаа аниргүйхэн мишээх гэрэл цацарсан инээмсэглэлд тань дурлажээ.

Би Таныхаа гэрэл, илч дулаан болон өглөө бүхэн ирдэг итгэл найдвард тань дурлажээ. 

Би Таныхаа жаргаланг урин дуудах энэ орчлонгийн дуун аялгуунд тань дурлажээ.

Тиймээ, үнэндээ Бүхий л Бурхад нэг л янзаар инээж, нэг л янзаар хайрлаж, нэг л янзаар үнэнг чин үнэнчээр тунхагланам.

 Хайсан эрснээ олоход тэрээр хязгаарГүй, хэмжээлшгүй, төсөөлшгүйн гүнд, холын холд хэрнээ өр зүрхэнд минь хамтдаа цохилон цохилон, булгилан булгилан байсныг тань олох юутай сайхан.

Та минь үнэндээ Бидний хайртай бүхэнтэй цуг оршиж, өхөөрдмөөр инээх бяцхан хүүхдийн дуу хоолойнд нуугдаж, Нэг л янзаар нууцлагхан инээсээр л. . .

Би таныхаа инээмсэглэлд дурлажээ. Бүх бурхад аав ээж, эмээ өвөө, ах эгч, анд нөхөд, үр хүүхэдээр минь дамжуулан энэ орчлонд аз жаргалыг тунхаглан инээсээр л. . .

2022.11.04 

өврийн дэвтрээс

Энэ орчлон хорвоод сэтгэлээр унах, амьдралд итгэлгүй болох гээд л маш олон биднээс шалтгаалахгүй зүйлс тохиолддог. Тэр үед түр зогсож байгаад элдвийг эргэцүүлэн тунгаан бодож, Танд урам дэм өгч байгаа бүхнээс суралцаж эхлэхэд миний өмнө үүссэн зүйлс хичнээн өчүүхэн өрөвдмөөр болохыг хараад ичих шиг болдог. 

Ингээд л өглөөний гэгээн нарны илч, үзэсгэлэнт цэцэгсийн ургах гэсэн тэмүүлэл, аниргүйхэн алсаас анивчих одод, хажуу айлын эмээгийн арц хүжний үнэр, гадаа тоглох хүүхдийн инээд, хацар илбэх салхины илгээмж гээд л юм бүхэн  энгийн хэрнээ уялдаа холбоотой. 

Нас ахих тусам Нулимс ойртож аливааг хайрын сэтгэлээр харах нь хүмүүний амьдралын нэгэн жаргалан болох нь юуных вэ? Анд минь Таны амьдралд сайхан бүхнийг ерөөе

2019.11.01 УБ хот

өврийн дэвтрээс...

Амьдрах сайхаан, амьд явах бүр сайхан. талархал дүүрэн амьдраарай.

 Хэн нэгэн магадгүй чамайг гомдоох вий тэгвэл тэр хүнийг өөрийнхөө үрийг байна гээд уучлаарай.

Нэг мэдэхэд та бүхнийг өөрөөр өөриймсөг харж энэрдэг болно. Ид шид бол хайр юм даа. . .

🌺 Цэцэгс 🌺(өврийн дэвтрээс)

Гялтганан шүхэрлэх цас ❄️ минь чи цэцэгс🌺

Гялалзан анивчих одод✨ минь чи цэцэгс 🌺

Үнэр ялдам янагхан чи  минь цэцэгс 🌺

 Үзэсгэлэн гоо тунгалагхан чи минь ч бас цэцэгс 🌺

Өглөө мандах гэрэлт наран ☀️чи минь цэцэгс 🌺

Үдэш дуулах саран 🌙чи минь  цэцэгс 🌺

Өр зүрх  ❤️минь чи өөрөө цэцэгс 🌺

Өнгөт орчлон тэр чигээрээ цэцэгс 🌺

Хүйтэн мөст сэтгэл-халуун нинжид, харанхуй-гэгээнд хувиллаа ч

Цэцэгс 🌺минь би чамдаа дурласан хэвээрээ

Инээх уйлах учир шалтгаан минь болдог

Итгэлийн илч чамдаа би хайртай. . .

их аян

Хязгаарын чанадаас морилон ирээд 

Хэмжээлшгүйг мэдрэх бат оршнол больё юу.

Бүхний утгыг дэлгэрүүлэгчийн үндсэнд 

Бат тэврэлдэн бүхий л жаргаланг ундраан ундраа юу.

Сэрчигнэх навчсын чимээ

Сэмхэн жиргэх шувуудын жиргээ

Дээдэд хөхрөн тэнгэр огторгуй

Дэргэдээс алсрах их аяныг мэдэр юү 

юуных вэ

Энхрий ялдамхан гээд илбэн таалахуйд 

Эмзэг турьхан хөөс мэт замхран оддог нь юуных вэ?

Бараа сүүдэргүй дэргэд минь үгүй ч 

Бодол сэтгэл, лугшилт бүхэнд оршсон нь юуных вэ?

өврийн дэвтрээс

Ачлалт гэрэл таалан илбэхүйд

Ахуй бүхэн утга төгсөд урванам...

🌺🌺🌺🌺🌺🌺🌺🌺🌺🌺🌺

Хаана оршин буй нь хамаагүй ээ

Хязгааргүй их

итгэлээр дүүрэн бай.