Шинийн хоёрны саран

 Хаврын эхэн сарын шинийн хоёрны саран нь

Хаяахан тохиох баярт учралаа дурсана уу

Хавар хавартаа дэлбээлэх дэлхий эхийн үзэсгэлэн гоог

Ханатал хармаар,  тэврэн  энхрийлэхийг хүснэ үү


Аяа огторгуйд хөвөх инээмсэглэгч саран минь чи 

Аз жаргалыг билэгдэн мишээн мишээнэ үү

Алс хязгааргүйд тархах энэрлийн илгээмжийг

Аялгуу дуу болгон нисгэхийг хүснэ үү


Аниргүйхэн хөврөх их аяны эхлэл нь 

Ариун хайрын амин ундарга нь юм уу

Алгаа тосоод шидэт бөмбөлгөөр наадагч бидний

Алтан дэлхийн баяр хөөрийн хүч  нь юм уу


Хаврын эхэн сарын шинийн хоёрны инээмсэглэгч саран нь

Халуун хайр, баяр талархалыг хорвоо ертөнцөд түгээнэм. . .


2017.02.28 

Улаанбаатар хот.

Бага тойруу

No comments:

Post a Comment

Subscribe to: Post Comments (Atom)

Эх нутгаадаа гүйсэн мөнхийн аргамжаатай оршихуй

Тэнгэрт асах түм буман одод

Сэтгэлд бадамлах хязгааргүй жаргалын тэмүүлэл

Итгэлд улалзах халуун дулаан илч

Эх нутгаадаа гүйсэн мөнхийн аргамжаатай оршихуй


Аргалын утаа суунаглан суунаглан цогшихуй яа

Ардын дууны шуранхай уул талыг дамжин цуурайтнам

Асгарсан дусал бүхнээрээ амиа өргөдөг хорвоод

Аяа Монгол хүмүүн хэмээгдэх нь жаргалын дээд гэнэм


Хадган хөх Тэнгэр Та, эцгийн минь дүрд хувилаад

Хаашаа ч намайг очсон халамжлан энэрч байнам

Нутгийн минь хөх салхи нууцхан хүслээ дайгаад

Нэвширтэл орох борооноор нэрийг минь үглэн харанга дэлдэнэ


Зүрхний минь амар амгаланд ээжийн минь өргөсөн сүү бий

Зүүдний минь баяр жаргаланд зэргэлээн дундах хулангийн тоос бий

Талархалын тарни минь таньтай хамт бий эх нутаг минь

Таны төлөө би энд ирсэн юм, би монголынхоо төлөө шатнам