бороо шаагин орсоор л ....

Гадаа бороо шаагин орж байна. Би тэсэлгүй гадаа гарлаа. Чийг үнэртээд л чи минь мэдрэгдээд л хичнээн сайхан байна гээч. Энэ жилийн бороог би яаж угтах эв дүйгээ олохгүй байсан юмсан. Харин өнөөдөр нэг л өөр. Өр зүрхэнд минь зөөлөн бороо өмнө нь зөндөө олон удаа орсон болоод тэр үү, бороо бид хоёр аз жаргалдаа ташууран уйлж байна.

Бороо уг нь чийг, бороо уг нь шим шүлт болон юм бүхэнд шингэн ариусгах гэж ирдэг. Харин энэ удаад тэрээр зүгээр л эрхлэн тоглох жаахан хүүхэд адил хайрын дуу дуулан дураараа бүжин цэнгэх мэт ээ.
Бороо минь чи дураараа ганц ч болов удаа өөрийнхөө төлөө өөрийнхөө дураар ор доо. Аз жаргалыг мэдэрч байгаа бол чи минь шувууд адил жиргэ, баяр талархалаар дүүрэн байгаа бол бүсгүйн хормойгоор эрхлэн наад, бяртай хүүгийн хацрыг ч илбэ, бондгорхон хүүгийн сэвлэгийг ч норго, болчимгүй нэгнийг нь ч ташуурдан ор, бүхий л орчлон чиний мэдэлд байна.

Дээрээс мөнгөн дусал мөрөөдлийн цэцэгсд хувилан буунам, дээрээс бяцхан түм буман Сальвина биеэ сэтгэлээ бидэнд зориулан шингэнэм...

Бороо шаагин орох бүрд бодлын мянган цэцэгсд би үгээ дайнам
Бороо шаагин орох бүрд , бороо шаагин орох бүрд сэтгэл минь гэгэлзэнэ.

Oрчлонгийн хаа нэгтээ хэн нэгэн нь магадгүй чамд ямар их хайртайгаа мэдэгдэхийн тулд бороон дуслаар хамт ирсэн ч юм билүү, бороо шаагин орсоор л ....