Анд минь дээ

Би өнөөдөр өөрөө өөрөөсөө өөрийнхөө найзаа хайлаа, эрлээ. Цаг ямагт бодолд минь байдаг нандин дурсамжийн маань эзэн тэр нэгэн бол миний найз.

Түүн дээрээ би өдөр болгон гүйгээд очиж чаддаггүй ч чи бол миний найз болохоор сэтгэл дотроо би чамайг, чиний тухай дурсамжийг хамгаас нандигнан эрхэмлэнэ.

Сайхан дэндүү сайхан найзыг энэ хорвоо дандаа буруу үгээр зүсэлдэг болоод л би чамайг хайрлахдаа, бас чамайг бусдын хэл амнаас харамлахдаа л би чам руу очихоосоо эмээдэг юм болов уу даа.

Хаяа хаяахан бодол минь зүггүйтэн хатгаж хамаагүй чиний л төлөө бол бүхнээ зориулахыг надаас хүсэхэд, хамгаас эрхэм найз чамайгаа мартах гэж, чиний тухай бодлыг хийсгэх гэж хичнээн оролдоод ч нэмэргүй болохоор одоо би мартах гэж хичээхээ больсон юм. Надтай байг бодолд минь, надтай байг сэтгэлд минь анд минь чи.

Хэдий хугацааны дараа хүн төрөлхтөн найз хэмээх нандин үгний үнэ цэнийг ухаарах юм бол доо.



....Хэнэггүйхэн хаалгыг чинь тогшоод өргөөнд чинь зочлоод хэн хэндээ хэрэгтэй жинхэнэ анд чинь байхсан. Ханьтай чинь бас нөхөрлөөд, хатуу хорвоогийн үнэн худлыг хүүрнэн хүүрнэхсэн, бусдын хэл амнаас үл шалтгаалан Чиний орон зайд, чиний анд байхыг хүснэм.

Даанч өөрийн өмчөө өрөөлөөс хайрлах хайр нь үнэнч нөхөрлөлд байраа тавьж өгөхөөс дургүйцэх энэ орчлонд далдхан хайрлах юм би чамайг, далай их аз жаргалын чамдаа ерөөе.

Сэтгэл чинь сэмэрвэл бүү уйл анд минь
Сэрүүн сайхан хангайд чиний анд чинь байна
Хамаагүй нь чамд зүгээр л найз хэрэгтэй бол
Хаана ч гэсэн яваад л очно би

Мөнхийн бүхнээс мөчидхөнийг тасдан
Мөрөөдөл жаргалдаа хүрэхийг тэмүүлэх
Хүмүүн бидний амьдралын тулаанд
Хүч тэнцвэргүй нэгэн хүн чиний л төлөө оршном

Чамд би хэрэгтэй болоогүй цагт
Чамайгаа би зовоохоо болилоо
Хэн хэнээс нлүү анд нөхөр хэрэгтэй бол
Хэзээд бэлэн гүйгээд л очноо анд минь дээ