Нарны охин чамдаа

...чиний тухай бодол бүхэн намайг орчлонгоос тасдан аваад онхи ондоо ертөнцөд хүргэдэг. Өндөр зэгзгэр нуруутай үсээ хоёр сүлжсэн, чин сэтгэлээсээ гэрэлтэн инээдэг чамайгаа би нарны охин хэмээн энхрийлдэгсэн. Чамд тоогдох гэж чиний нүдэнд олзлогдох гэж мөн ч их хичээж билээ. Намайг тоохгүй бол яанаа хэмээх бодлоосоо болж олон ч шөнө нойргүй хоносонсон. Эгэл даруухан хэрнээ эрч хүч бялхсан чамдаа би одоо ч хайртай хэвээрээ.

Хүн бүхэнтэй ижий ахаа болдог хүнлэг занд чинь дурлан би л хийхгүй бол бүхий л хорвоо зогсчих юм шиг яардаг занд үнэндээ би дүргүй байж билээ. Харин одоо бодоод байхад дэндүү ариухан чи минь маш богинохон хугацаанд өөртэй ахадсан олон олон зүйлийг хийж, хүмүүст амьдрах итгэл найдвар өгч байсан юм байна лээ.



Анх чамайгаа өөрийн болгох гэж эр хүн гэдэгтээ омогшин олон залуусын сүргийн манлай болон онгирч дуулан жиргэж байсан. Жижигхэн биендээ ахадсан дэндүү их ухаандаа бардан, чамайгаа хаяа нэг гомдоож байсан даа одоо би харамсан сууж байна.
Нар сар шиг нандин хоёр үрийг минь наддаа чи минь орхиод холын холд одсон хэдий ч хонгорхон чамайгаа одоо ч би хайрласаар л байна. Хүнд хэцүү үед ханийгаа дандаа урамшуулан хүйтэн усанд гарыг минь дүрүүлж үзээгүй, хүнлэг энэрэнгүй занд чинь хайлан урсаад чамдаа нэгдэн ээнэгшсэнсэн энхрийхэн минь дээ.

Одоо найз нь удахгүй өвөө болох гээд догдолж сууна даа, олноос онцгой чинийхээ хэлдэг үгийг нандигнан тарни мэт дээдлэн одот ертөнцдөө орой болгон шившсээр л байгаа. Шөнийн тунгалаг агаар сэтгэл санааг минь ариусган сэмхэн ирээд салхиар илбэн таалдагыг мэднээ, өглөө бүхэн гэрэл гэгээг өргөөнд минь гийгүүлдэг чамдаа өнө удаан чамайгаа хайрлан үр хүүхэд ач нартай чинийхээ хайрын үлгэрийг үргэлжлүүлэн найз нь хүүрнэнээ.

... чин ариун хүсэл мөрөөдөл чинь удахгүй биелэх нээ амраг минь.

Орчлонд ирэх ач минь чиний минь хайрын үргэлжлэл билээ. Гоо үзэсгэлэнт цэцэгс адил ач минь дэлгэрэн өсөн дэгдэхийг нь хүлээж байнаа найз нь.

... хайр минь, хань минь, чамдаа би амлаж байна. Аз жаргалтай урт удаан үр хүүхдүүдтэйгээ сайн сайхан амьдарнаа .

Нарны охин минь дээ найз нь чамайгаа үнэндээ маш их санаж байна.
Хайрт эгчийнхээ гэгээн дурсгалд зориулав