Аяс аясхан салхины илбээ


Аяс аясхан салхины илбээ

Амраг түүний минь үнсэлт юм уу

Аяа жаргалан жаргалан Та алс бус

Аниргүйхэн цохилох зүрхэнд минь жаргана уу


Давалгаалан давалгаалах их давалгаа нь

Эрэгт тулан үлгэр хүүрнээ юу 

Эрчилгүй шуугих их далай та

Энхжингийн үүдийг нээн гэрэлтэнэ үү


Зөөлөн илбэх цасан ширхэг

Зөндөөн удаан хүлээсэн гээд

Хайлан хайлахдаа бидэндээ шингэн

Хан хорвоод дуугаа  өргөнө үү


Тэнгэрт дүүлэх шувуу нь болоод

Тэндээс орчлонг тольдон харья

Мөрөөдөл, хайр хос жигүүр минь болоод

Мөнхийн жаргаланд баясан жаргая.


УБ. 2016-01-30,

No comments:

Post a Comment

Subscribe to: Post Comments (Atom)

Эх нутгаадаа гүйсэн мөнхийн аргамжаатай оршихуй

Тэнгэрт асах түм буман одод

Сэтгэлд бадамлах хязгааргүй жаргалын тэмүүлэл

Итгэлд улалзах халуун дулаан илч

Эх нутгаадаа гүйсэн мөнхийн аргамжаатай оршихуй


Аргалын утаа суунаглан суунаглан цогшихуй яа

Ардын дууны шуранхай уул талыг дамжин цуурайтнам

Асгарсан дусал бүхнээрээ амиа өргөдөг хорвоод

Аяа Монгол хүмүүн хэмээгдэх нь жаргалын дээд гэнэм


Хадган хөх Тэнгэр Та, эцгийн минь дүрд хувилаад

Хаашаа ч намайг очсон халамжлан энэрч байнам

Нутгийн минь хөх салхи нууцхан хүслээ дайгаад

Нэвширтэл орох борооноор нэрийг минь үглэн харанга дэлдэнэ


Зүрхний минь амар амгаланд ээжийн минь өргөсөн сүү бий

Зүүдний минь баяр жаргаланд зэргэлээн дундах хулангийн тоос бий

Талархалын тарни минь таньтай хамт бий эх нутаг минь

Таны төлөө би энд ирсэн юм, би монголынхоо төлөө шатнам