Хязгааргүй уудамд бид аялнам. Хэмжээлшгүй сайхан хайранд бид нялхарнам. Бид энэ сайхан ертөнцөд бүхний эх ундарга болон уусахсан. Анд минь өр зүрх тань юуг хүсэж, хаашаа тэмүүлнэ вэ?
Эх нутгаадаа гүйсэн мөнхийн аргамжаатай оршихуй
Тэнгэрт асах түм буман одод
Сэтгэлд бадамлах хязгааргүй жаргалын тэмүүлэл
Итгэлд улалзах халуун дулаан илч
Эх нутгаадаа гүйсэн мөнхийн аргамжаатай оршихуй
Аргалын утаа суунаглан суунаглан цогшихуй яа
Ардын дууны шуранхай уул талыг дамжин цуурайтнам
Асгарсан дусал бүхнээрээ амиа өргөдөг хорвоод
Аяа Монгол хүмүүн хэмээгдэх нь жаргалын дээд гэнэм
Хадган хөх Тэнгэр Та, эцгийн минь дүрд хувилаад
Хаашаа ч намайг очсон халамжлан энэрч байнам
Нутгийн минь хөх салхи нууцхан хүслээ дайгаад
Нэвширтэл орох борооноор нэрийг минь үглэн харанга дэлдэнэ
Зүрхний минь амар амгаланд ээжийн минь өргөсөн сүү бий
Зүүдний минь баяр жаргаланд зэргэлээн дундах хулангийн тоос бий
Талархалын тарни минь таньтай хамт бий эх нутаг минь
Таны төлөө би энд ирсэн юм, би монголынхоо төлөө шатнам
Тиймээ. Эх орон минь Та зүрхэнд мөнх, Та сэтгэлд мөнх.
ReplyDeleteТа бидний тэнгэр, Та бидний эрх чөлөө, Та бидний юм бүхэн.
Та бидний цаг хугацаа , Та бидний ирээдүй, Та өөрөө түүх, Та оршихуйн учир шалтгаан билээ.
... уйлж байна,
даарч байна,
эмтэрч,
элэгдэн
хорогдож байна
миний эх орон бас
дэлхий эх минь.
Үнэндээ бид хүмүүн заяанд төрөхдөө товлож төрдөгсөн билүү. Бас товлож буцдагсан билүү. Бид хязгааргүй орчлонгийн хумхийн тоос. Бид цаг хугацаа хэмээх элсний өчүүхэн ширхэг нь, цохилох анир нь.
Амьдрал хэмээх хэмжээлшгүй далайгаас бид баяр жаргаланг хангалттай хүртдэг хэрнээ юунд буцааж өгдөггүй юм бэ.
Тиймээ. Эх орон минь Та зүрхэнд мөнх, Та сэтгэлд мөнх.
Та бидний тэнгэр, Та бидний эрх чөлөө, Та бидний юм бүхэн.
Таньдаа мөргөмү.