Сүүн зам


Сайн байна уу ээжээ, охин нь шөнө таныг зүүдэллээ. Таны минь нандигнан хайрладаг эрхиний утас тасарч байх юм миний зүүдэнд. Ээ халаг гэж...

Өдөр хоног өнгөрөх бүр бид хорвоогийн жамаар нэгэн туйл руу тэмүүлж байгаа ч таньтайгаа улам ойр, хамтдаа байж, таныхаа аз жаргалтай инээдэнд хөлбөрөн байхыг ямар их хүсэж байна гээч ээж минь.

Энэ замбуулинд

зөвхөн Монгол эхчүүд л үр хүүхэд, эх нутгийнхаа сайн сайхны төлөө цайныхаа дээжийг тэнгэртээ өргөдөг болохоор миний Монголын мянга мянга эхчүүдийн хайр сүүн зам татуулан хайр энэрэлээр энэ орчлонг ч бас уяраан зөөллөж байдаг билээ.

Миний сайхан ээжүүд минь ээ таньдаа үр хүүхдүүд нь дэндүү их хайртай.

Эвий минь ээж минь үр хүүхэд бидэндээ Та юугаар ч солишгүй нандин эрдэнэ минь билээ. Таныг минь энэ замбуулгийн бүхий л хайр хязгааргүй ихээр ивээн тэтгэж байх болтугай.

Таньдаа сөгдөн мөргөмү...

No comments:

Post a Comment

Subscribe to: Post Comments (Atom)

Эх нутгаадаа гүйсэн мөнхийн аргамжаатай оршихуй

Тэнгэрт асах түм буман одод

Сэтгэлд бадамлах хязгааргүй жаргалын тэмүүлэл

Итгэлд улалзах халуун дулаан илч

Эх нутгаадаа гүйсэн мөнхийн аргамжаатай оршихуй


Аргалын утаа суунаглан суунаглан цогшихуй яа

Ардын дууны шуранхай уул талыг дамжин цуурайтнам

Асгарсан дусал бүхнээрээ амиа өргөдөг хорвоод

Аяа Монгол хүмүүн хэмээгдэх нь жаргалын дээд гэнэм


Хадган хөх Тэнгэр Та, эцгийн минь дүрд хувилаад

Хаашаа ч намайг очсон халамжлан энэрч байнам

Нутгийн минь хөх салхи нууцхан хүслээ дайгаад

Нэвширтэл орох борооноор нэрийг минь үглэн харанга дэлдэнэ


Зүрхний минь амар амгаланд ээжийн минь өргөсөн сүү бий

Зүүдний минь баяр жаргаланд зэргэлээн дундах хулангийн тоос бий

Талархалын тарни минь таньтай хамт бий эх нутаг минь

Таны төлөө би энд ирсэн юм, би монголынхоо төлөө шатнам