Тэнгэрийн цэцэгс

Мөнхийн ус, Бат-Оргил

2012-02-17T17:30:00.000+08:00

Бадарууган - Cэрүүн цэцэгс ( үгтэй )

2012-02-17T17:29:00.000+08:00

хайр бол хязгааргүй баяр жаргалангийн урсгал мэт орчлон хорвоод ундарсаар л , гэрэлтсээр .

2012-02-13T18:53:00.004+08:00

Хайрын тухай түүх хязгааргүй, төгсөшгүй, яг л эхлэл үгүй басхүү төгсгөл үгүй мэт. Хичнээн олон зуун хүн, хэдэн мянган жилийн турш хайрын тухай ярьсаар ирсэн хэдий ч тэрээр дундаршгүй их далайн агуу их баялаг адил мөнхөд аливаа бүхэнд аз жаргалыг харам үгүй бэлэглэсээр л, ундарсаар л ...

Хайр гэдэг бол үнэндээ итгэл аж. Гэхдээ хэмжээлшгүй, төсөөлшгүй их итгэл аж. Түүнийг хэмжинэ хэмээвээс дэндүү их тэнэглэл, түүнийг үгүйсгэнэ хэмээвээс дэндүү их гунигтай, магадгүй оршин тогтнолоо ч эвдэж мэднэ.

Хүн бүхнийг хөглөдөг зүйл бол хайр л байдаг, надад ч ялгаагүй. Яагаад ч юм бэ хайрын тухай бодох бүрд, хайрын тухай мөрөөдөх бүрд, хайрын тухай дурсах бүрд , хайрын үзүүрт төгсгөл үгүй мэт...

Хүмүүн бид хайр хэмээх тийм л нэгэн гэнэхэн жигүүрээр орчлон хорвоод нисэн дүүлдэг, уясан нялхамсдаг. Тэрээр хүн бүхэн л хайрыг эрхэмлэн нандигнан, сэтгэлийн гүндээ баясан цэнгэдэг шүү дээ. Учир нь хайр бол хорвоо дэлхийн амь амьсгал , амьдралын эрч хүч итгэл нь болон биднийг хайрладаг бүхэнтэй минь холбосон шидтэн мэт. Яг л шидэт дохиураар хос хоёрыг учруулан харц харцаа, зүрх зүрхээ онилон харсан тэр мөчөөс л хайр- хайртай түүнийх нь юм бүхнийг хүлээн зөвшөөрөхөд хүргэн эрхэм нандин, өр зүрхнийх нь адил болон энэ орчлонд хамтдаа цохилж эхэлдэг.

Үнэндээ бид сайхан хайран дунд амьдарч байна, харин түүнийгээ сэтгэл зүрхэндээ л нандигнан эрхэмлэх хэрэгтэй. Барьж мэдэрч чадахгүй алсын алс хэдий ч хайр бол хязгааргүй баяр жаргалангийн урсгал мэт орчлон хорвоод ундарсаар л , гэрэлтсээр ...

Үзэг

2012-02-11T13:00:00.001+08:00

Үзэг

Хээтэй, хээгүй, үсэгтэй, зурагтай, өнгөлөг, мөнгөлөг гээд л хачин чамин цаасан дээгүүр би гүйж байна. Хүмүүс намайг үзэг гэдэг. Харин би өөрийгөө ид шидтэн гэж боддог. Үнэндээ бас намайг мөрөөдөл гэж нэрлэсэн ч болно.

Сайхан сэтгэлтэй нэгний гарт очвол үлгэр мэт сайхан бүхэн амилдаг юм. Харин саваагүй нэгний гарт очвол дэмий сараачсан цаас маань хогийн саванд базагдан хаягддаг.

Гэхдээ л би цаасан дээгүүр гүйх, нисэх дуртай.Миний хамгийн аз жаргалтай мөч бол бяцхан булцгархан гарын илчинд дулаацах тэр агшин. Тэр үед би баяр баясгаланд умбаж, дэгдээхэй шиг дэгдэн гүйж, эрвээхэй шиг эргэлдэн нисдэг юм. Нэг л өдрийн дотор би цас бас бороо болон орж, шүүдэр болон дэгдэн мөрөөдлийн орон руу хөөрдөг юм.

... хачин жигтэй, дэндүү дэгжин цаасан дээгүүр би гүйж байна. Анх би тэнгэрээс зарлиг буулгадаг тэр л чиглэлд нисдэг байхдаа үлгэрийн мэт эмх цэгцтэй хичээнгүйн ертөнцөд амьдарч байсан юм.

Харин өнөөдөр лимбэний эсвэл төгөлдөр хуурын даруул дээгүүр гүйх адил нисэн дүүлдэг шидтэн болжээ би.

Тэгээд л орчлон ертөнц дээрх цаг хугацаа , орон зайд үл тээртэн бодлын хөлгөөрөө нисэн дүүлж, хязгааргүй бүхнийг бяцхан зүрх сэтгэлээрээ дамжуулан бичдэг болохоороо үзэг бид чинь үнэндээ ямар их аз жаргал, баяр баясгаланд умбаж байдгийг мэддэг ч болоосой.

... Хэзээ нэгэн цагт Үзэг хэрэглэхээ больчихвол яах бол?

гэхдээ л яг одоо, яг одоо л цагтаа л би хайртай. Энэ биеээ барагдтал, эзэн таныхаа үнэнч зарц чинь, хайртай анд чинь болсондоо бяртай байдаг шүү.

Тиймээ, би бол дэгжин хөөрхөн үзэг байна. Хүмүүсээ би та нартаа хайртай....

Ид шидийн мөрөөдөл, үлгэр бичдэг эгдүүтэй хөөрхөн үзгийн түүхийг охин Энхнарангийнхаа төрсөн өдөрт зориулан бичлээ. Охнидоо сурлагын уран бүтээлийн өндөр амжилтыг хүсэн ерөөе.

2012-02-01T21:39:00.002+08:00

А.Мөнгөнзул: Монгол хүн зүрх сэтгэлийн нандин бүхнээ гээх учиргүй

“Хэрвээ та хэн нэгний аз жаргалыг зурах харандаа нь байж чадахгүй бол уйтгар гунигийг нь арилгах баллуур нь болж яваарай” гэж хэлэх дуртай “DOZ” интертайнмент студийн продюссер Амгаланбаатарын Мөнгөнзултай уулзаж ярилцсанаа уншигч таньд хүргэе.

-“DOZ” энтертайментийн хамт олон хөгшид, хүүхдийг баярлуулсан буянтай арга хэмжээ зохиолоо. Энэ тухай яриагаар ярилцлагаа эхлэх үү?

-Бид Тэнгис кино театрт 108 өнчин хүүхэд, 108 ахмад буурлууд, 108 лам хүүхдүүдийг урьж, “Хөх толбот хүмүүс” киногоо сонирхуулж, дараа нь Бишрэлт зочид буудалд тэдэнд зориулсан хүлээн авалт хийсэн. Бидний зохиосон арга хэмжээ их сайхан болж өнгөрсөн. Киноноос гадна биднийг ийм сайхан газарт урьж авчирсанд баярлалаа гэж хүүхэд хөгшид маш ихээр талархаж

байгаагаа илэрхийлсэн. Олон хүн цуглаад бие биенээ харж баярлахыг хараад бид өөрсдөө ч дагаж сэтгэл маш их хөдөлсөн. Ер нь хүнийг баярлуулна гэдэг чинь их сайхан зүйл. Энэ том арга хэмжээг зохион байгуулахад дэмжиж тусалсан найз нөхөд, хамт олон, Баянгол дүүргийн засаг дарга, НХХЯ, Тэнгис кино театр, Бишрэлт зочид буудал гээд л бүгдэд нь баярлалаа.

-Яагаад ийм олон хүүхэд хөгшдийг цуглуулая гэж шийдсэн юм бэ?

-Бидний энэ удаагийн киног маань маш олон хүн үнэхээр сайн, урьд урьдынхаас илүү уран бүтээл болжээ гэж урам хайрласан. Шинэ кино гарахад дуртай кино театртаа очоод үзэх боломжтой болсон ч хүн бүр үзээд байж чаддаггүй. Тийм болохоор кино үзээд явах боломжгүй хүүхэд хөгшдийг л баярлуулъя гэж шийдсэн. 108 хүүхдээ бид НХХЯ-ны харъяа Хүүхэд хамгаалал төвийн болон асрамжийн газраас урьж авчирсан. 108 ахмад буурлууд маань манай Баянгол дүүргээс ирсэн. Харин 108 лам хүүхэд олох жаахан хэцүү байсан. Манай хийдүүдэд нэг дор тийм олон лам хүүхэд байдаггүй юм билээ. Хэд хэдэн сүм хийдээр явж байж 108 хүргэсэн шүү.

-Киноныхоо зураг авалт, нээлтийг Францад хийсэн. Яагаад заавал Франц орныг сонгосон юм бэ?

-Монголын кино урлагийн түүхэнд анхдагч гэж болох ч DOZ-ынх гэдэг утгаараа биш Монголын кино өнөөдөр дэлхийд танигдаж байна гэж ойлгоосой. Гэхдээ бид гадаадад кино зураг авна гэдэг хэцүү даваа ч өөрсдөө тэмүүлж зориглох юм бол болохгүй бүтэхгүй юм байхгүй гэдгийг ойлгож авсан. Цаашдаа маш олон уран бүтээлчид Монголын кино урлагийг арай өөр түвшинд хүргэх эхлэлийг тавьж Францын кино театрыг сонгож анхныхаа нээлтийг хийсэн. Яагаад заавал Францад хийх болсон бэ гэвэл, энэ кино маань монгол хүний тухай. Монгол хүний мөн чанарыг үзүүлэхийн тулд заавал харь газар очиж амьдраад хэрэггүй гэдгийг үзүүлэхийг хичээсэн. Монгол хүн эх орноо орхиж илүү сайхан амьдралтай болъё гэсэндээ л харийн орныг зорьж байгаа. Тэд нарыг харахад харийн орон гэдэг дээд тэнгэрийн умдаг атгасан шиг сайхан зүйл биш юм байна. Эх орон гэдэг юунаас ч илүү байдаг гэдгийг ойлгоосой гэсэндээ заавал гадаад оронд энэ киног хийх шаардлагатай болсон. Тэгээд ч бидэнд Францад зураг авалтаа хийх боломж бүрдэж, дэлхийн долоон орны уран бүтээлчид оролцсон. Гол нь гадны улс оронд монгол хүнийг хүн гэдэг утгаар нь хүндлэх ёстой гэж бид харуулахыг хүссэн.

-Уран бүтээлээ хийж явахдаа ар гэртээ, үр хүүхэддээ хэр их анхаарал халамж тавьдаг вэ? Учир нь та ээж хүн, нөгөө талаар айлын эхнэр гэдэг утгаараа энэ бүхнийг яаж зохицуулж байна.

-Бурхны авралаар хүүхдүүд маань намайг ойлгодог. Ээж аав минь ч тэгж хүмүүжүүлсэн. Би хүүхдээ гаргаад л ээж аавдаа даатгачихдаг. Буянтай ээж аавтай, азтай эмэгтэй гэж өөрийгөө боддог. Үнэхээр ард минь асаалттай арван танк гэдэг шиг найдвартай хүмүүс байгаа тулдаа би өнөөдөр тайван ажлаа хийгээд явж байна. Хүүхдүүддээ маш бага цаг зарцуулдаг ч бүтэн сайн өдөр ямар ч ажил байсан тэдэнтэйгээ хамт өдрийг өнгөрүүлдэг. Нөгөө талаар намайг хийж бүтээх гээд сэтгээд зорьж явахад дэмждэг хамт олон минь байна. Тэд минь байгаагүй бол өнөөдөр DOZ интертайнмент өнөөдрийн хэмжээнд байж чадахгүй. Маш эрч хүчтэй залуустай нэг баг болон ажиллаж, алхам тутамдаа тэднийхээ дэмжлэг тусламжийг авч байна

-Доржсүрэн ах та хоёр урлагийн гэр бүл гэдэг утгаараа бие биенээ их сайн ойлгодог байх. Хааяа маргах, үл ойлгоцох зэргээр хүндрэлтэй асуудлууд гардаг уу?

- Хүний амьдрал юм чинь байлгүй л яахав. Урлагийн гэр бүл, үргэлж хамт ажилладаг гэдэг утгаараа маргах үе гардаг ч эхнэр нөхрүүдийн дундах элдэв муу асуудлаас үүдэлтэй хэрүүл хийгээд байдаггүй. Харин хийж байгаа ажлаа илүү сайн болгох гэсэндээ л маргах үе бий. Тиймдээ ч, хэрвээ бид хоёр нэг бүл байгаагүй бол өнөөдрийн түвшинд хийж бүтээж, уран бүтээл туурвихгүй өдий зэрэгтэй явахгүй байсан болов уу гэж боддог. Ер нь эмэгтэй хүн, эхнэр хүн гэдэг эр нөхрийнхөө өсгийн дор нь ивээс болж, түшиж тулж амьдрах ёстой. Ингэж чадвал тухайн гэр бүлийн аз жаргал, хүсэл мөрөөдөл нэгдэж тэд сайн сайхан амьдарч чадна.

-Сүүлийн үед залуучууд гэр бүлийн үнэ цэнэ гэдгийг үл тоох болсон. Тэр ч утгаараа хамтдаа нэг зүйлд анхаарч, хийж бүтээж, зорьж чадахгүй байгаа нь залуу гэр бүлийн хамгийн том асуудал байдаг. Харин та хоёр тэдэнд үлгэр жишээ болохуйц гэр бүлийн нэг гэж ойлгож болох уу?

-Бид хоёрыг үлгэр жишээ болгох эсэхийг хүмүүс өөрсдөө л шийдэх байх. Гэхдээ миний хувийн бодол гэвэл эрэгтэй эмэгтэй хэн ч байсан ямар ч тохиолдолд хосоороо амьдарч байж сая аз жаргал гэдгийг жинхэнэ утгаараа мэдэрдэг. Амьдралд зөндөө олон саад бэрхшээл тохиолдох ч хүмүүс давж гарахын төлөө л хичээдэг. Тиймээс эхнэр нөхөр хоёр хамтдаа хичээж, эхнэр гэрийн сайн эзэгтэй, нөхөр гэрийн сайн түшиг болж явахад амьдралын саад бэрхшээл юу ч биш. Тийм болохоор болсон ч болоогүй ч хамтдаа зүтгэх ёстой. Нэг л өдөр сайн сайхан амьдралыг хамтдаа бий болгож чадсан байна.

-Монголчууд гадаад руу явж амьдрах нь цөөнгүй байгаа ч эх орондоо амьдрах боломж байна гэж үздэг хүн олон бий. Таны хувьд Монголдоо сайхан амьдрах боломжийг юу гэж боддог вэ?

-Монголд ер нь бүх юм сайхан болж байна. Би өөрөө юмыг их гэгээлгээр харах дуртай. Ямар ч юмыг болно, болгоно бүтээнэ гэж болохгүй гэсэн бодлыг хүлээж авах дургүй. Жишээ нь энэ удаагийн кинондоо тоглуулсан Уудам хүү. Түүнийг анх хараад сэтгэл их хөдөлсөн. Анх түүнийг кинондоо тоглуулахаар болсноо мэдэгдэхэд хүмүүс янз бүрээр л хүлээн авч байсан. Уудам хүүгийн надад хамгийн их таалагдсан зүйл нь монгол дууг дуулаад дэлхий нийтэд таниулсан явдал. Энэ өөрөө их гайхалтай зүйл. Монгол дуу үнэхээр ямар сайхан юм бэ гэдгийг тэр дуугааар л мэдрүүлж чадсан. Өнөөдөр монгол дууг сайхан дуулдаг залуучууд олон байгаа ч хэд нь дэлхий нийтэд танигдсан билээ. Гэтэл тэр хүү ганцхан дуу дуулаад л долоохон хоногийн дотор “Super star” болж чадсан. Өнчин гэдэг нь ч хүн бүхний сэтгэлийг хөдөлгөж чадсан. Тиймээс энэ хүүг кинондоо оруулчих юмсан, тоглуулж чадвал хичнээн сайхан бэ гэж бодож байсан. Энэ мөрөөдөл минь биелж, үнэхээр болохгүй юм гэж байдаггүй юм шүү гэдгийн мэдрүүлсэн. Яг энэ мөрөөдөл минь биелсэн шиг монголд өнөөдөр болохгүй юм гэж байхгүй. Хүн өөрөө тэмүүлж чадаж, хийж чадвал мөнгө олох боломж үнэхээр нээлттэй. Хэзээ монголын уран бүтээлчид 5-10 сая төгрөгөөр гэрээ хийж ажилладаг байсан юм бэ. Ганц уран бүтээлчид ч гэхгүй шинжлэх ухаан, эдийн засаг гээд л өөр салбарт ч тэр монголчууд сайн ажиллаж, өндөр цалин авах боломж байгаа. Монголоо орхихгүйгээр эх орондоо ажиллах гээд зүтгэж яваа маш олон уран бүтээлчид, өөр салбарынхан ч тэр өнөөдөр болно бүтнэ гэж хичээж яваа. Тиймээс гадаад байгаа монголчууд минь, эх орноо хөгжүүлэхээр ирээч ээ гэж хэлмээр байна. Яагаад гэвэл та бидний хайртай аав ээж, үр хүүхэд, ах дүүс, анд нөхөд чинь энд байна. Мөнгөгүй ч байсан эх орондоо эх хэлээрээ ярьж суух нь өөрөө стрессгүй амьдрал. Амьдралын сайн сайхан бүхнийг мэдэрч, амьдралаас авах хамгийн чухал зүйлийнхээ төлөө эх орондоо ирээчээ гэж хүсмээр байна. Бидний кино ч тэр энэ л асуудлыг харуулсан.

-Эх орон, ээж ааваас илүү эрхэм зүйл үгүй гэдэг. Гэхдээ Улаанбаатар утаатай, нийгмийн олон асуудлаас үүдсэн стресс ихтэй, амьдрахад хэцүү гээд гадаадад байгаа монголчууд минь ирэх дургүй байдаг юм биш үү?

-Хэдийгээр утаатай, уцаартай, нийгмийн асуудалтай ч гадаадад биш эх орондоо амьдарч байгаа нь ямар азтай юм бэ. Монгол хүн болж төрсөн нь ямар сайхан юм бэ? Гадаадад байгаа нь бид хамгийн сайхан эх орноо орхиод ирсэн байна. Бид харийн оронд зөвхөн мөнгөний төлөө л амьдарч хүн чанараа гээж байгаа юм байна гэдгийг энэ киногоороо харуулахыг зорьсон. Мөнгө хүний амьдралд чухал уу чухал. Гэхдээ мөнгө бол гараас гарт дамждаг эд гэдэг утгаараа тийм ч чухал биш. Харин хүн өөрийн үнэ цэнэ, зүрх сэтгэлийнхээ нандин бүхнийг алдахгүй байх нь хамгийн чухал. Хүн чанаргүй болно гэдэг нь хүний нандин бүхэн байхгүй болж байгаагийн илрэл. Гадаадын өндөр хөгжилтэй улс орнуудад хийсвэр сэтгэлгээ, бие биенээ хайрладаггүй амин хувиа хичээсэн байдал ажиглагддаг. Тэр бүхэнд автаад монгол хүн гэсэн нандин чанараа алдаад байна. Монголд ч тэр хүмүүс нандин чанараа алдаж байна. Уг нь монгол хүн өөрөө бусад улс орнуудаас, ялангуяа европчуудаас илүү хүн чанар гэдэг юмаараа ялгарах ёстой шүү гэдгийг харуулахыг зорьсон. Тэр ч утгаараа олон монголчуудыг энэ кино эх оронд нь дуудах болов уу гэж бодож байна.

-Төрийн ордонд анх киноныхоо нээлтийг хийсэн. Энэ алхмыг хүмүүс их олон янзаар хүлээн авч, шүүмжлэх нэгэн ч байсан. Яагаад заавал Төрийн ордныг сонгосон юм бэ?

-Маш олон хүн бидэнд шүүмжлэлтэй хандсан ч бидний ажлыг бахархалтай зүйл гэж хүлээж авсан хүнмүүс ч бий. Монголын төр, монгол хүн гэдэг ангид зүйл биш шүү дээ. Монголын төрийг монгол хүн л барьж суугаа. Миний хувьд энэ киноныхоо буянаар анх удаа Төрийн ордондоо орж үзсэн. Бидний хамгийн гол зорилго нь гадаадад байгаа монголчуудаа эх оронд нь авчирах ёстой юм байна, Монгол хүнээ бид орхигдуулаад байгаа юм байна. Зөвхөн уул уурхай, мөнгө чухал биш монгол хүнээ хаячихаад байна. өнөөдөр монгол хүн мөнгөгүй, ядуу ажилгүй, гудамжинд орхигдож байгааг харж мэдрээсэй гэж бодсон юм. Энгийн үед төрийн түшээдэд үг хэлж, санал хүсэлтээ илэрхийллээ гэхэд үр дүн, хүлээж авах байдал нь хэр байх билээ. Тиймээс бид энэ уран бүтээлээ Төрийн ордонд гаргах нь хамгийн зөв, хамгийн оновчтой шийдэл гэж бодсон.

-“DOZ” интертайнментийн дараагийн төлөвлөгөө?

-Эхний ээлжинд шинэ киногоо орон нутгийн үзэгчиддээ үзэж сонирхуулан. Хамгийн түрүүнд Дархан хотыг зорьж байна. Ирэх гурван сард шинэ жүжгийн бэлтгэл ажилда орно. Зунаас дахин нэг киноны уран бүтээлийг эхлүүлнэ дээ.

-Танай хамт олныг хошин шогоос гарч байна гэж яригдах болсон. Хошин шогийн төрөл жанраас илүүтэй кино, жүжигт хүчээ үзэж байгаа юм уу?

-Бид хошин шогийн уран бүтээлээ орхиогүй. Одоо хийх жүжиг маань хошин жанрынх. Гэхдээ “DOZ” интертайнментийнхан жүжиг, кинонд илүү анхаарсан нь бүх хүнд хандсан уран бүтээл хийх хүсэл сонирхолтой минь холбоотой.

-Зун эхлэх киногоо дахиад гадаадад хийх үү?

-Бид гадны оронтой хамтарч хийнэ. Монголын кино урлаг тэлэх хэрэгтэй. Зөвхөн монголдоо биш. Гадаадад сайн сайхан яваа монгол залуучууд зөндөө бий. Германд зураг авч байхад “Маке Up” хийдэг монгол залуу бидэнтэй хамтарч ажилласан. Холливуудын кино найруулагчидтай хамтарч ажилладаг юм билээ. Түүний сэтгэж хийж байгаа нь үнэхээр гайхалтай. Тиймээс бид гадаадад байгаа чадалтай авъяастай монголчуудтайгаа хамтарч уран бүтээлээ хийнэ.

-Ер нь монголын ард иргэдийн амьдралын ялгаа өөр өөр байгааг юу гэж бодож байна.

-Өнөөдөр монгол хүний амьдралд мөнгө үнэхээр чухал байгаа. Гэхдээ өөрт байгаа боломж юу байна. Өөрөөсөө эхлээд боломжыг хайх ёстой. Хэн нэгнээс болоод өөрийнх нь амьдрал ядуу байгаа юм шиг, тэр нэг дарга туслаад дэмжээд өгвөл болох юм шиг хүлээгээд байдаг. Харин үүний оронд өөрөө юу хийж чадахыгаа мэдэх хэрэгтэй. Үнэхээр хийж чадах зүйлээ олсон бол түүнийгээ чин сэтгэлээсээ сайн хийх ёстой. Мөн нэг байгууллагад маш удаан хугацаагаар ажиллаж, өөрийгөө нээж, тухайн хамт олондоо уусч, тууштай байх нь амжилтын нэг хэсэг. Ингэж чадвал монголын нийгэм тогтвотой хөгжинө. Нөгөө талаар монголчуудыг маш эрт босдог байгаасай гэж хүсдэг. Энэ бол миний чин хүсэл. Хэрэв би ерөнхийлөгч байсан бол Монголын бүх албан байгууллага 08.00 цагт ажлаа эхлүүлж, ажлын зургаан өдөртэй болгоно. Би их эрт босдог. Тэгээд өглөө эрт ажил хөөцөлдөх гэхээр хувийн, төрийн гэлтгүй ажил 10.00 цагийн үеэс л жигдэрдэг. Уг нь эрт ажлаа амжуулдаг бол эрт тарна, монгол орны хөгжилд ч иргэдийн ажлын бүтээмжид ч нөлөөлнө. Магадгүй хэн нэгэнд миний хэлж байгаа энэ үг таалагдахгүй бйаж болох ч бидний дандаа муу хэлдэг урд хөршийнхөн үргэлж эрт босч, ажлаа эхлүүлдэг. Тэд эрт босдог, ажилсаг байдгаараа дэлхийд танигдаж байна. Бид хэн нэгнийг муулахаасаа илүүтэй хэрэгтэй гэснээ үлгэр дуурайл болгон авч байх ёстой. Энэ ажилсаг чанарыг үр хүүхэддээ хэлж сургах ёстой. Дээр нь монгол хүн, монгол хүнээ хайрлах ёстой гэдэг хүмүүжлийн хичээлийг сургалтын программд оруулахыг хүсдэг. Тэгж байж монгол улс хөгжинө. Хаа нэгэн газар Хятадуудыг оролдоход бүгд л дайраад босдог. Гэтэл монголүчууд тийм биш байгаагаас хөгжихгүй байна.

-Монголчууд нэг нэгнийхээ төлөө гэсэн сэтгэлгүй, амин хувиа хичээгчид болсон гэж үү?

-Тийм. Бид энэ уран бүтээлээрээ монгол хүн бие биенээ хайрлах ёстой гэдгийг харуулахыг зорьсон. Киноны маань “Монголчууд бие бие рүүгээ инээмсэглэх цаг нь боллоо. Монголчууд бие биенээрээ бахархах цаг нь боллоо. Монголчууд эх орноо хайрлах цаг нь боллоо. Хүний нутагт байгаа Монголчууд эх орондоо эргэн ирэх цаг нь боллоо” гэсэн сайхан үгс бий. Үнэхээр монголчууд өнөөдөр бие биенээ хайрлах цаг нь болсон. Бидний хажууд хэн нэгэн согтуу унтаж байхад дэргэдүүр нь зүгээр л өнгөрдөг болчихож. Монгол хүн уг нь тийм биш шүү дээ. Энэ бол бидний өөр нийгмээс буюу гадаадаас авсан буруу хүмүүжил. Үүний оронд тухайн улс орон яаж хөгжиж байгааг л харах ёстой. Харин монгол хүн арай л өөр. Өвөг дээдсээ хүндэлдэг. Хөгшин настай хүн автобус унаанд ороод ирвэл босоод өгдөг сэтгэлтэй. Гэтэл одоо чанар ховордох болсон нь монгол хүний нандин бүхэн үгүй болж байгааг харулж байна. Тиймдээ ч бид Төрийн ордонд кинонгоо нэсэн нь монгол хүний нандин бүхнийг сэргээх ёстой, бие биенээ хайрлах ёстой гэдгийг л ойлгуулахыг хүссэн. Биднийг шүүмжилсэн хүмүүст үнэхээр урам хугарч, муугаар хэлэхэд “тэнэг юм даа” гэж, зөөлрүүлж хэлбэл “гомдмоор юм даа” гэж хэлмээр санагдсан. Гол нь хүн муу хэлдэг , буруугаар харддаг сэтгэл зүйгээ авч хаях хэрэгтэй. Монгол хүн нэг нэгнээ хайрлаж сурах хэрэгтэй. Энэ талаар дунд сургуульд орж байх ёстой. Тэр цагт монгол улс хөгжиж, баян хоосны ялгаа арилж хүн бүр сайхан амьдрана. Бие биенийгээ хятадууд шиг хамгаалж, нэгдмэл байх ёстой. Үнэндээ өнөөдөр монголд хэн нэгэн сайн үйл хийлээ гэхэд хоёр гурван сарын дараа л хүмүүс мэддэг. Гэтэл муу зүйл хийсэн гэж дуулдвал нэг л өдрийн дотор хүмүүс мэдчихсэн байдаг. Уг нь монголчууд оюуны маш өндөр чадвартай хүмүүс. Тиймдээ ч муугаар бүхнийг бодолгүй, бие биедээ инээмсэглэж, урам хайрлаж чадвал хөгжихөд хэдхэн алхам л дутуу байна.

-Монгол хүний үнэ цэнийг юу гэж боддог вэ? Энэ цагт үнэхээр алдагдсан юм шиг санагддаг.

- Монгол хүний үнэ цэнэ асар өөр. Германд зураг авч явахдаа европ хүн монгол хүн хоёрын ялгааг мэдэрсэн. Ер нь Европд хөгшчүүл ихэнхдээ асрамжийн газарт юм уу, гэртээ ганцаараа амьдардаг даа. Гэртээ ганцаараа амьдардаг тэргэнцэртэй нэгэн эмгэн гудамжаар явж өнгөрөх парадыг харахаар тагтан дээрээр гарчээ. Энэ явдлаас хойш хүүхэд нь гурван сарын дараа ээж дээрээ ирээд, ээжийгээ олоогүй гэнэ. Гэтэл ээж нь тагтан дээр амьсгал хураагаад гурван сар болсон байж. Эмгэн парад хараад сэтгэл хөдөлж зүрх нь хаагдаад бурханы оронд очсон тухай мэдээлэл гарч байсан юм. Гурван сар түүнийг эрхэгээр хэн ч ирээгүй байна гэдэг нь ямар аймшигтай вэ? Гурван сар тэр айлын хаалгыг хэн ч тогшоогүй, үр хүүхэд ач зээ нь ч эргэж тойроогүй байсан гээд бодоход үнэхээр аймшигтай. Европын нийгэмд хүн зөвхөн өөрийгөө л боддог. Гэтэл монголд хэзээ ч ээжийгээ, аавыгаа ганцааранг нь орхино гэж байхгүй. Үр хүүхэддээ, найз нөхөддөө захиж, арга ядахад айл хөршдөө захиад орхидог нь монгол хүний үнэ цэнэ. Бид ийм л ялгаатай. Гэвч энэ сайхан чанараа алдаж муухай нийгэм рүү ороод байна. Бид ч уран бүтээлдээ тэр эмгэний тухай цухас ч гэсэн оруулахыг хүссэн ч Европын нйигэмд шүүмлэлтэй хандахаас айсан. Гэхдээ үзүүлэхэд гэмгүй л асуудал.

-Эмэгтэйчүүд дөнгөж төрсөн хүүхдээ энд тэнд орхиж, эсвэл эмнэлэгт хаяад зугтаадаг тухай мэдээлэл их гарах боллоо. Эх хүний хувьд та энэ асуудлыг юу гэж ойлгодог вэ. Эмэгтэйчүүдийн богино бодол уу аль эсвэл нийгмийн бодит байдал уу.

-Энэ бол нийгмийн асуудал. Өнөөгийн нийгэмд хэн нэгэнд итгэл үзүүлтэл илтгэл алдвал нандин чанараа гээж, өөр нэг хүнд итгэсэн ч мөн хөсөрдүүлж орхидог. Хүмүүс ч нэг нэгэндээ хүнд итгээд хэрэггүй гэж зөвлөх болж, өөрт байгаа нандин чанараа нуудаг болж. Уг нь энэ асуудлыг сөрж итгэл гэдэг нандин чанараа л гээмээргүй байгаа юм. Амьдралд юу ч тохиолдож болно. Ялангуяа эмэгтэй хүн энэ чанараа гээх ёсгүй. Мундаг эрэгтэй хүн зөндөө бий. Гэхдээ тэдний ард дандаа эмэгтэйчүүд байдаг. Агуу хүний цаана суут хүн байдаг гэж нэгэн мэргэн хүнйи хэлсэн үг байдаг даа. Үнэхээр тэр суут хүн бол эмэгтэй хүн. Эмэгтэй хүний нарийн ухаан хамгийн чухал. Эрэгтэй хүн бол яг л хүүхэд шиг. Тийм болохоор эмэгтэйчүүд минь хоромхон зуурын сэтгэл хөдлөлдөө битгий автаач ээ. Би ээж болохыг жаргалыг мэдэрсэн хойноо ээжийгээ яс махандаа хүртэл ойлгосон. Хайртай хайртай гэж хичнээн хэлж байсан ч ээжийгээ жинхэнэ утгаараа хайрлаж чадаагүй байсан юм билээ. Эх хүн бүрийн хүсэл үр хүүхэд нь эрүүл саруул байх. Энэ бол хамгийн том аз жаргал. Миний том хүү багадаа их өвчин ороодог байсан юм. Тэр үед би орой бүр энэ дэлхийн бүх ээжүүд аз жаргалтай үр хүүхэд нь эрүүл саруул байгаасай гэж хүсч залбирдаг байсан. /энэ асуулт түүнийг хэсэг зуур уйлуулсан/ Тийм болохоор бидний өнчин хүүхдүүдэд киногоо үзүүлсэн нь, Уудам хүүг тоглуулсан нь ч тэр амьдралдаа итгэх итгэл төрүүлэх гэсэн чин хүсэл минь. Хэдийгээр бид тэдэнд ээж аавынх нь хайрыг өгч чадахгүй ч гэлээ ирээдүйдээ итгэх итгэл, сайн сайханд тэмүүлэх эрмэлзэл төрүүлэх гэсэндээ энэ бүхнийг хийсэн юм. Уудам хүүг хараад өнчин гэж гунилгүй дэлхий нийтэд өөрийгөө таниулах боломжтой гэдгийг харуулахыг зорьсон. Тийм болохоор эмэгтэй хүнийхээ үүргийг биелүүлж, хүүхдүүдэд сэтгэлийн бэлэг болгон нүдэнд нь баяр гэрэлтээд гарч байгааг харах сайхан байсан. 108 лам хүүхдүүдээрээ монголын мянга мянган хүүхдүүд ээжтэйгээ аз жаргалтай амьдраасай, битгий өнчрөөсэй хэмээн уншуулсан. Хүүхэд өнчрөхгүй, муу үйл бүхэн холуур өнгөрдөг нийгэм удахгүй ирнэ гэдэгт итгэж байна. Тиймээс үр хүүхдээ битгий өнчрүүлээчээ гэж эмэгтэйчүүддээ хүсмээр байна.

-Уран бүтээлчийн замыг сонгосон нь та хоёрын хувийн амьдралд хэр нөлөөлж байна. Зарим нэг урлагт зүтгэсэн олны танил хүмүүс олон давхар хауст амьдардаг гэж бахархах дуртай байдаг. Та хоёрын хувьд?

-Монголчуудын хувьд байр машинтай бролохыг зорилгоо болгосон байдаг. Уг нь энэ бол хүний амьдралын зорилго биш хэрэглээ. Бидний хувьд байртай машинтай бусдын л адил амьдарч байна.

-Ирээдүйн зорилго?

-Хүмүүст хэрэгтэй зүйл хийх. Сайн уран бүтээл туурвиж, хүмүүст бага ч гэсэн ухаарал хайрлах нь бидний хүсэл. “Хөх толбот хүмүүс” кинонд миний хэлсэн нэг үг бий. “Монголчууд яагаад дэлхийгээр нэг тарсан гэдгийг мэдэх үү? Яагаад гэвэл ийм сайхан сэтгэлтэй хүмүүс бол монгол хүн шүү гэдгийг дэлхийгээр нэг мэдрүүлэхээр тарсан юм” гэж хэлдэг. Энэ их гоё үг л дээ. Бид баян байх, том хауст орохыг хүсэхгүй. Харин хүмүүст эрч хүч, ухаарал хайрласан хамгийн сайхан уран бүтээл хийхийг хүсдэг.

-Дээхнэ үед урлагаар хүнийг хүмүүжүүлдэг гэж ярьж хэлдэг байсан. Тэгэхээр танай хамт олон тэр үзлийг сэргээж байна гэж болох уу? Учир нь хүмүүжлийн гэхээсээ илүүтэй мөнгөний бүтээлүүд их гарах болсон гэж үзэгчид дүгнэдэг.

-Хүмүүс тэгж ойлгодог бол сайхан л байна. Ямар ч байсан бид үзэгчдийн сэтгэлд хоногшсон сайн бүтээл хийхийн тулд хичээж хөдөлмөрлөсөөр байх болно.

- Зөндөө удаан ярилцаж завгүй их ажлыг тань алдуулсанд уучлаарай. Манай уншигчдэд хандаж сэтгэлийнхээ үгийг хэлээч.

-Юуны өмнө би танай Шууд ТВ, Shuud.mn сайтын хамт олонд маш богино хугацаанд амжилттай ажиллаж чадсанд нь их баярладаг. Танай хамт олон хэвлэл мэдээллийн салбарт өөрийн гэсэн байр сууриа бий болгож чадсан. Хамгийн богино хугацаанд маш шуурхай байж чаддаг. Шуурхай байна гэдэг орчин үеийн хэмнэл. Хамгийн шуурхай, хамгийн хурдтай байж чаддагт нь хүндэлж, бахарахдаг. Илүү ихийг хийж, хурдан шуурхай байдлаа үргэлж хадгалж яваарай. Танай сайтын уншигчдад хандаж хэлэхэд зөвхөн өөртөө бүхнийг даатгаж амьдраарай. Бүхнийг өөрөөсөө эхлүүлж, хамгийн сайхан бүхэн таны гарт, зүрх сэтгэлд тань байгаа гэдгийг санаж амьдралыг дандаа өөдрөгөөр харж яваасай. Мэдээлэл уншихдаа ч сонин сэтгүүл уншихдаа ч хэн нэгнийгээ битгий муугаар бодож байгаасай. Таны үлдээсэн сэтгэгдэл бүрийн цаана хэн нэгний зүрх шархалж, хэн нэгний амьдрал буруугаар эргэж байхыг үгүйсгэх аргагүй. Тийм болохоор нэг нэгнийгээ хайрлаж байгаасай л гэж хүсч байна.

-Зав гарган ярилцсанд баярлалаа. Та болон таны гэр бүл хамт олонд аз жаргал, амжилт бүтээлийн дээдийг хүсэн ерөөе.

П. Нарандэлгэр

eh survalj: http://www.shuud.mn/2012/01/30

хүүхдийн язгуур урлагын Яруу эгшиглэн хамтлаг байгуулагдлаа

2012-02-01T11:51:00.005+08:00

Галбингаа сургалтын төв нь монголын ирээдүй болсон хүүхэд багачууддаа үндэсний урлагын үнэт өв сангаас таниулан , зааж сургах, монгол ёс заншлаа дээдлэн хүндэтгэх, монгол ардын дууны урын сангаас сурталчлах зорилгоор ардын дуу, үндэсний хөгжмийн сургалтуудыг явуулдаг билээ.

Ийнхүү үйл ажиллагаан дээрээ түшиглэн хүүхдийн язгуур урлагын Яруу эгшиглэн хамтлагыг байгууллаа.

хүүхдийн язгуур урлагын Яруу эгшиглэн xамтлагын хүүхдүүд 5-9 настай.

Хамтлагын ахлагч: Энхбатын Энх-Амгалан /8 настай/

Хамтлагын гишүүн: Баянмөнхийн Аззаяа / 7 настай /

Хамтлагын гишүүн: Батбуяны Жавхлантөгс / 6 настай/

Хамтлагын гишүүн: Баттулгын Ариунзул / 6 настай /

Хамтлагын гишүүн: Мөнхбатын Амарбясгалан / 6 настай /

Хамтлагын гишүүн: Мөнхбаатарын Уянга / 5 настай /

Хамтлагын гишүүн: Нарандоржийн Азтүшиг / 6 настай /

Хамтлагын гишүүн: Батмөнхийн Саруулсайхан / 7 настай /

Яруу эгшиглэн хамтлагын багшаар Монгол Улсын Соёлын Тэргүүний ажилтан С.Дэлгэрцэцэг ажиллаж байна. Тэрээр өмнө нь Монгол эгшиглэн хамтлагыг үүсгэн байгуулсан туршлагатай, чадварлаг багш юм.

Өнөөдрийн байдлаар Яруу эгшиглэн хамтлаг маань хэд хэдэн шинэ дуунуудыг цоо шинээр төрүүлээд байна. Эдгээрээс дурдвал:

- үг Монгол улсын Төрийн шагналт, Соёлын гавьяат зүтгэлтэн,
жүжиг киноны зохиолч, яруу найрагч Бавуугийн Лхагвасүрэн

ая Монгол улсын Соёлын Тэргүүний Ажилтан, хөгжмийн зохиолч Р.Бат-Эрдэнэ

''Ерөөлөөр учирсан миний Монгол"

- үг Монгол улсын төрийн шагналт, ардын уран зохиолч,
яруу найрагч Дэндэвийн Пүрэвдорж

ая ая зохиогч Дэмчигдоржийн Галсанбаяр

"Тэмүүжин"

зэрэг дуунуудыг монголын ард түмэндээ өргөн барьж байна.

Яруу эгшиглэн хүүхдийн язгуур урлагын хамтлаг маань урын сандаа 20 гаруй уран бүтээлтэй болоод байгаа билээ.

Монгол ардын дуугаа өвлөн дуулж буй
Монголын ирээдүй болсон бяц хан хүүхдүүддээ
Уран бүтээлд нь болон хичээлд нь их амжилтыг хүсэн ерөөе.

SONGS OF THE SOUL - Concert of Sri Chinmoy 1/2

2012-02-01T09:50:00.000+08:00

Гэгээн мөрөөдөл Дуучин Чинбат Gegeen muruudul Duuchin Chinbat

2012-01-17T15:32:00.000+08:00

Uvertura - Unu Munh Oron (with lyrics)

2011-12-17T18:27:00.000+08:00

shidet ubul ok.avi

2011-12-17T18:01:00.000+08:00

Сайн байна уу? Эрхэм анд минь. Шинэ оны мэнд хүргье

2011-12-16T11:18:00.003+08:00

.
Он гарах дөхөж байна. Тийм болохоор Та хайртай хүмүүстэй ямар нэгэн зүйлээр бэлэг барина гэдэгт найдаж байна. Яагаад ч юм бэ шинэ он гарахын өмнөхөн хүн бүхэн өөрийн амьдралаа эргэн нэг хардаг шүү дээ. Таны хувьд яг одоо амьдрал, ажил үйлс, сэтгэл санаа чинь ямар байгаагаас үл хамааран Та өөрөө өөртөө хичнээн эрхэм билээ.

Үнэндээ Та л өөртөө аз жаргалыг, та л өөртөө амжилтыг, та л өөртөө баяр хөөрийг авчирч чадна. Тийм болохоор Инээмсэглэ, зүгээр л инээмсэлгэ, учир нь та бүхний учир шалтгаан, та бүхний эхлэл бас төгсгөл. Танд энэ орчлон хорвоогийн юм бүхэн байна. Ганцхан Та л итгэх хэрэгтэй, та л мөрөөдөх хэрэгтэй.

... алсын алсаас нэгэн илч бидэнд өдөр бүхэн мөч бүхэнд илч дулаанаа өгнө. Үүн лугаа бидний бусдыг хайрлах хайр чимээгүйхэн сэтгэлээс минь хөвөрсөөр л ...

шинэ жилийн илгээмж -цагаан цас

2011-12-12T20:58:00.004+08:00

тэр нэгэн шинэ жил

2011-12-11T16:03:00.001+08:00

Энэ өгүүллэгийг би 2009 онд бнчиж байж билээ. Тэр өдөр охин маань тоглолттой байлаа. Баяр дөхөөд хүүхэд бүр өвөр дүүрэн бэлэгтэй хацраас нь улаа бутраад л... Тийм дээ, хүүхэд нас гэдэг тэр чигээрээ аз жаргал мөрөөдөл баяр хөөрийн далай байдаг шүү дээ. Гэтэл миний аав бие нь муу байгаа хэрнээ зээ охиныхоо тоглолтыг үзэхээр үзэгчдийн дунд сууж байсан юм. Би охиноо дагуулаад аав дээр очиж үнсүүллээ.

Тэгтэл аав тэднийг хар даа миний охин минь. Тэдэнд яаж туслах вэ. Чихэр жимс юу байна гээд нулимстай нүдээр өөдөөс минь харсан юм. Би аавын заасан зүг рүү харвал нэг настайвтар ядруудаа эмээ 2 ачаа дагуулсан үзэгчдийн дунд суусан байхыг харсан юм.

Айл айлын хүүхдүүд шагнуулсан бэлгээ бие биедээ гайхуулж байхад хамар нь халтартсан хөнгөн нимгэн хувцастай тэднийг хараад их өрөвдлөө. Тэгээд гүйж гараад 3 бэлэг авчраад эмээ бас 2 хүүхдэд өгөөд, байсан 10000 төгрөгөө ч бас өгөхөд эмээ маш их баяртай байлаа. Тэгээд тэр эмээ энэ 2 маань бүр даараад болдоггүй ээ, гадаа явж байтал сайхан ардын дуу сонсогдоод тэгээд тэсэлгүй ороод иртэл ээжийн минь дуулах дуртай дууг нэг жаахан охин дуулж байдаг юм байна. Тэгээд л бага насаа ээжийгээ санаад нэлээн удаан сууж, овоо ч дулаацлаа. За баярлалаа охин минь үйлс нь дэлгэрч яваг. Бид хэд эртхэн дөхье. Хотоос түлээнд нэмэр болох юм хайж ирсэн биш хөөрхөн тоглолт үздэг байна гэж хэлээд гараад явж билээ.

Аав минь энэ бүхнийг хараад уйлаад л суугаад байсан юм. Манай аав их өрөвчхөн уйланхай хүн л дээ. Ямар сайхан сэтгэлтэй гэж санана. Тэр шөнө нойр хүрдэггүй ээ. Гал тогооныхоо өрөөнд нааш цааш нэлээд холхилоо. Гадаа цас будраад л яаж байга бол тэр эмээ , бас хүүхдүүд гээд л бодсоор...

...бидний жаахан дэлхийд ядарч зүдэрч яваа нэгнээ сэтгэлийнхээ нүдээр харж чадах чинээгээрээ тус дэм болоосой гэж бодоод энэхүү өгүүллэгийг бичээд аавдаа уншуулсан юм. одоо аав маань бие нь сайн яваа.

Тийм дээ анд минь шинэ он гарах бүрд бид бүгд өнгөрсөн мөчөө дурсдаг шүү дээ. Таны сэтгэлд хэн нэгэн байгаа бол түүнийгээ уучлаарай, бас ямар нэгэн байдлаар сэтгэлээсээ туслаарай. Яг одоо танд боломж байгаа бол

чадах чинээгээрээ тусал. сайхан урмын үг ч байсан болно шүү дээ. Хайртай хүмүүсээ уучил, бас урам хайрла.

...танд шинэ оны мэнд хүргье.

Он гарахаас өмнө та хэн нэгнийг баярлуулна гэдэгт найдаж байна.

Таны андаас....

тэр нэгэн шинэ жил
өгүүллэг

Өнөөдөр шинэ жилийн баярын өдөр.

Байдаг л нэгэн баярын ажиллагаа. Дэгжин хүүхнүүд дэлдгэнэсэн залуус, нэгэн хэмнэлээр бүгд л бие биедээ хэлдэг л тэр хэдэн үгнүүдээ чулуудан, хэн нэгэнд тал засан эсвэл хэн нэгэнд сайхан харагдахыг дор бүхнээ хичээх нь инээдтэй. Одоо яая гэхэв бусдынхаа жишгийг дагаад заавал очих шаардлагатай. Тольны өмнө өөрийгөө харж зогсохдоо дэгжин дажгүй залуу харагдаж байгаа хэдий ч надад баярлан хөөрсөн догдолсон ямар ч мэдрэмж алга. Би гарлаа.

Замын түгжээнд жолооч маань ундууцна. Харин миний хувьд юм бодох сайхан боломж. Гадаа жавар тачигнана. Цасан ширхэг нэг нэгээр алгуурхан бууна. Аргагүй ч үгүй юм уу даа одоо чинь өвөл шүү дээ.

… Нээрээ би бага байхдаа шинэ жилийн баярыг мөн ч их хүлээдэгсэн. Тэр шажигнасан цаасан уутнаас нэг ширхэг алим, нэг ширхэг мандарин, нэгээс хоёр ширхэг чихэр, гадаадын гоё гялалзсан цаастай чихэр хоёроос гурван ширхэг байдаг байлаа. Энэ бэлэг маань хичнээн эрхэм, үнэр нь мөн ч сайхан байж билээ. Одоо бодоход нэг их зүйл байгаагүй ч тухайн үед бол юугаар ч солишгүй эрхэм зүйл байсансан.
Онц сурлагатан хүүхдүүд овоо хэдэн бэлэгтэй болчихно тэгээд ч ганган арай их бэлэгтэй ууттай ирцгээдэгсэн.
Тээр жил манай ангийн нэг хүү бид хоёр бусдаасаа харамлаж байж мандарин алимнуудаа муутгачихаад зөндөө их уйлж билээ Инээдтэй юм юунд нь тэгэж их уйлсан юм болоо би. Хн

Манай машин замын түгжээнд ороод л наашаа ч үгүй, цаашаа ч үгүй зогсож байна. Дэлгүүрийн үүдэнд хоёр жаахан хүүхэд хүмүүсийн хөлд тээр болон нааш цаашаа хөлхөх хүмүүст адлагдан зогсоно. Тэр хоёрыг ажиж байтал машин маань цааш хөдлөн одлоо.
… Энд тэндээс элдэв янзын үнэртэн ханхална. Нүүрэн дээрээ нүүр зурсан хиймэл инээмсэглэл тодруулсан хүмүүс дохилзон бөхөлзөнө. Баяр дундаа орж байна. Ашгүй бэлэг гардуулах цаг боллоо. Энэ бол миний хувьд баяр өндөрлөж байгаагийн шинж . Ээлж ээлжээр хүмүүс ирж бэлгээ, шагналаа авна. Би гарын нь атган итгэл хүлээлгэсэн хүний дүр үзүүлэн инээмсэглэж зогсоно. Бушуу дуусаасай харих минь.
Манайх хэдэн ч ажилчинтай, ажил юу ч болж байгаа юм. Одоо би энэ талаар бодохоо байж дээ. Хүн ер нь нэг зөв бизнесээ бариад авсан цагт хүссэн хүсээгүй мөнгө өөрөө орж ирээд л байдаг юм. Үүнд би хэдий нь дасчээ.
Оны шилдэг ажилчин тэр шагналаа ирж авна уу гэж зарлах нь сонсогдоно. Гэтэл хэнд үл анзаарагдам намхан нуруутай дунд хэрийн насны хүн надаас шагнал гардаж авлаа. Тэрээр маш их баярлаж догдолсон дээр нь чин сэтгэлээсээ инээмсэглэл тодруулан,нулимстай нүдээрээ над руу хараад “баярлалаа ах нь та нарынхаа төлөө улам сайн ажиллах болно. Муу аавдаа бэлгээ аваачиж өгнөө” гээд бэлгээ хоёр гардан аван тэргүүндээ адис хүртээнэ.Би түүнд баяр хүргэн гарыг нь атгах үед итгэл илч төөнөсөн халуун хөлстэй гар, чин сэтгэлийн баярласан харц, итгэл дүүрэн урам зориг бахархал нь надад миний бага насны хайртай хүнийг минь санагдуулах нь хачирхалтай.

Энэ олон жилүүдийн турш би энэ л харц, энэ л итгэл, энэ л халуун дулаан хайрыг хайгаад байсан юм байж. Бага байхад минь өвөр дээрээ суулган эрхлүүлдэг өвөө минь, модоор жижигхээн морь хийж өгөөд миний хүү Монголын гарамгай жанжин болно тэгээд цэргүүдээ хайрлан энэрч байх хэрэгтэй шүү тэд чинь эх орныхоо төлөө амиа алдараа өгөөд гавъяа нэхдэггүй баатрууд юм шүү гээд л жанжин намайг тэнгэр өөд өргөн гэрэлд хүргэх гэж хичээдэг байж билээ. Намайг жанжин болж тоглоход өвөө минь их баярладаг байсан даа. Энэ олон он жилүүдийн уртад би хайртай бүхнээсээ алслан одсон байх юм. Энд энэ баяр хөөр цалгин байгаа ч миний хувьд баяр баясгалан минь биш байлаа.Би гармаар байна.Би гармаар байна. Би гадагшаа гараад байдаг хурдаараа гүйлээ. Гэр лүүгээ өвөө рүүгээ гүйлээ. Сэтгэл онгойгоод сайхан байна, гүйх ийм сайхан юм байж ээ. Манай гэрийн хажууд байдаг нөгөө дэлгүүрийн гадаа өнөө хоёр хүүхэд сууж байлаа. Би дэргэд нь амьсгаагаа даран чимээгүйхэн дөхөж очлоо. Дүү нь “ахаа би даараад байна аа бас өлсөөд байна” гэхэд ах нь дүүгийхээ муу уранхай гутлыг тайлан хөл нүцгэлэн цээжээ яран дүүгийнхээ жаахан хөлийг гэдсэндээ хийн дүү рүүгээ инээмсэглэл тодруулан “одоо яаж байна дулаацаж байна уу миний хөөрхөн хамгаас хөөрхөн дүүминь, ах нь дүүдээ хайртай , удахгүй зун болно тэгэхээр нь ах нь дүүдээ зөндөө их амттай идэх юм авч өгнө тэгээд миний дүү сайн идэж авна шүү за” гэхэд дүү нь ахынхаа үгэнд цадан “за ахаа тэгэхдээ даараад байна, өлсөөд байна аа” гэж уйлагнахад “миний дүү уйлж болохгүй шүү тэгвэл хүмүүс муу жаал байна гээд миний дүүд чихэр өгөхгүй” гэхэд жаахан дүү нь нусаа татан хэрэндээ л хичээх аж. Ах нь голоо тасартал даарч байгаа ч дүүдээ жаахан ч болов илчээ өгөх гэж хичээн чин сэтгэлээсээ энэрэн асран буйн тэднийг хараад би тэссэнгүй уйлж орхилоо. Тэгээд тэр хоёр дээр очин тэврэн авлаа. Би та нарын ах чинь байна, хамаатан ах нь байна. Та хоёрыг зөндөө их эрлээ. Одоо хэдүүлээ харьцгаая гэхэд ах нь яавал ч яаг гэсэн янзтай нусаа татан дүүгийнхээ гутлыг өмсүүлэхдээ энэ гоё ах үнэн хэлсэн болов уу яанаа явчих бий дээ хэмээн сандран яарна. Би хүрмээ тайлан бага дүүд нь нөмөргөн өлгийдөж ахынх нь гэр энүүхэнд бий хэмээн бид хэд яаравчлан жавар сөрөн алхлаа. Гадаа ийм хүйтэн байдаг, гар ингэж их даардаг юм байх дээ ийм жаахан амьтнаас ямар их тэвчээр, хайр энэрэл гарч байгааг уяран бодон байтал би гэртээ хэдий нь ирсэн байлаа.

Гал тогооныхоо өрөөнд оруулан халуун сүү буцалган өглөө. Тэгээд амттай гэсэн бүхнээ тэр хоёрын өмнө авчирч өрөхөд ямарч яарсан шинжгүй маш их баяр талархалтайгаар инээмсэглэл дүүрэн амтархан идэж буй тэднийг хараад хорвоо ямар хатуу юм бэ ийм жаахан хүүхдүүд яаж энэ дүн өвлөөр ямар их тэнхээ заан тэвчинэ вэ хэмээн бодож байтал ах нь “та яагаад ганцаараа амьдардаг юм бэ, та манай хамаатан ах биш шүү дээ, тэгэхдээ танд маш их баярлалаа, Би өнөөдөр дүүдээ амттай юм зөндөө өгнө гэж амлаж байсан юм. Ахаа та Бурханы үгийг сонсоод тэгээд бид хоёрт тусалж байгаа юм уу. Бид хоёр жаахан дулаацаж байгаад гарнаа. Танд түвэг удахгүй ээ. Ийм гоё айлд анх удаагаа л орж үзэж байна. Гадаа ийм хүйтэн байхад бас гэртээ нүцгэн суугаад дулаахан байж болдог гэсэн үнэн юм байна аа. Би том болоод дүүдээ байр авч өгнө. Дүү бид хоёр сайхан амьдарнаа ахаа” гээд л том хүн шиг хэвлүүхэн хүүрнэж гарлаа. Миний өхөөрдөх хайрлах, бас бахархах сэтгэл төрөн аргагүй л монгол цустай отогтой бардам ухаантай сайн хүү байна гэж талархан байлаа.

Миний дүү хэдэн настай бэ, дүү нь хэдтэй юм гэхэд би долоотой, дүү хоёр хагастай. Манай ээж их сайхан ухаантай хүн байсан. Манай гэр байдаг л даа даанч дүүгийн минь аав манайх биш болгочихсон. Ээжийг өнгөрсний дараа байргүй дээр нь аав биднийг тоохоо болсон . Хүмүүс дүүгийн аавыг аавынх руу явсан гэж хэлж байхыг нь сонссон. Дүүгийн аав уг ажил хийгээд бид нар гэртээ байсан бол сайхан л байх байсан. Даанч ийм болчихсон. Ээжийгээ их санадаг юм. Дүүгээ сайн хүн болгоно доо ямар ч байсан.” гээд л том хүн шиг хэвлүүхэн ярих нь өхөөрдмөөр. Өдий насны хүүхэд ээж аавдаа эрхлээд байж байхад харин энэ бяцхан хүү өөрөөсөө томдсон хэрсүү ухаанаар амьдралд хөлөө олж ядан явах юм даа.

Бага дүү нь хоол цай идээд дулаан гэрт орж ирсэн болоод тэрүү нозоорон унтах гээд эвшээнэ. Би ахаас нь миний дүү ах нь бас л та хоёр шиг өнчин хүн шүү дээ. Өвөөгөөсөө өөр хэнийг ч мэдэхгүй тийм болохоор миний хоёр дүү ахынхаа хүүхэд болооч гурвуулаа сайхан амьдарч болно шүү дээ. Эр улс байна. Шинэ он гарч байна. Тэгээд бие биендээ хань болоод сайхан амьдаръя тэгэх үү гэхэд ах нь “ Ахаа би танд итгэж байна. Яагаад гэвэл таны нүд миний ээжийн нүд шиг намайг хайрлан харж байсныг ажсан юм. Тэгээд би сая яг энд таны өгсөн сүүг ууж байхдаа Бурхан минь надад туслаач энэ их сайн хүн байна. Миний аав болгож өгөөч гэж гуйсан юм. Баярлалаа аа, ахаа, ааваа та миний ээж-аав шүү гээд чангаас чанга тэврэн авч эхэр татан уйллаа. Би ч бас уйлж байна. Энэ жилийн шинэ жилийн,энэ өдөр, энэ насны минь энэ амьдралын минь хамгийн сайхан шинэ жил болж байна. Хорвоо минь баярлалаа. Миний монгол цус, монгол омогшил, хүнд хатуу цагт харь нэгэнд сөхөрдөггүй, хатуужин чангардаг хатан зоригт тань мөхийн мөргөмү монгол омогшил минь.

…Амьдрал үргэлжилсээр, аз жаргалыг би та бид бүгдээрээ үлгэр мэт амар амгалангаар цогцлооном.

Он гараад хэд хонолоо. Би хоёр дүүтэй ч гэх үү хүүтэй ч гэх үү нэг тийм нэг их баян хүн болчихлоо энэ жил. Анх удаагаа гэрт минь хүүхэд үймэлдэж, инээд хөөрөөр цалгин, тэдэндээ зориулан дэлгүүрээс хэрэгтэй бүхнийг нь цуглуулаад цаг хугацааг хурдан өнгөрөөжээ.
Манай хоёрын талаарх цуглуулсан мэдээллийг үзэж байгаад нүдэнд дулаахан бүсгүй хоёр залуугийн хамт авхуулсан зураг яагаад ч юм дотно санагдана. Би том дүүгээ дуудан тэр зургийг үзүүллээ. Тэрээр аав ээж бас дүүгийн аав гэж заангаа нээрээ энэ зургийг харсан чинь ээжийгээ амьд байгаа тэгээд над руу харан инээж байна гэж бодлоо гээд нүдэндээ нулимсаа цийлэлцүүлэв. Би том хүүгийнхээ духыг үнэрлэн одоо бүх зүйл сайхан болноо ээж нь чамайг сайн байгаа болохоор л чамд зориулаад инээж дээ миний хүү. За одоо дүүгээ хувцасла гурвуулаа нэг юманд явна одоо машин ирж яваа хурдал гэлээ.

Гадаа идэр ес ид тачигнан явган цасан шуурга шуурна. Бид гурав яаравчлан машин ругаа гүйлдлээ. Бага хүү маань жижигхэн цагаан баавгай шиг амьтан болж. Ухаан орохын цагаан өнгө мэддэггүй байсан хүн шиг тэгээд ийм хөөрхөн ганган байгаадаа ичингүйрэн инээмсэглэл тодруулан би цагаан баавгай би аз жаргалын цагаан баавгай хэмээн шулганана. Ах нь баяртай нүдээр дүүгээ харан тэгээд надад наалдан би хорвоогийн хамгийн азтай хүн надад хөөрхөн дүү минь бас уул шиг түшигтэй та байна. Би сайн хүн болно тэгээд таныг баярлуулнаа хэмээн чихэнд минь шивнэлээ.

…Бид хэд алгуурхан явсаар нэгэн байшингийн үүдэнд ирлээ. Том хүү маань энэ чинь манай байр байна ш дээ. Манай гэр тэр дээд давхарт нь байдаг байсан. Энэ манай тоглоомын талбай байна. Тэр нөгөө манай найз байна гээд заав. Тэр зүг рүү нь харвал хэн ч алга . Би аль вэ тэр найз чинь гэхэд Банхаар банхаар гэх чимээнээр хаанаас гараад ирэв гэмээр том нохой давхин ирэн сүүлээ шарван цомцойн суув. Манай хоёр тэр банхар хэмээх нохойтойгоо цасан дээр тоглож гарлаа. Тэгээд цан хүүрэг савсуулсан бөөн баяр хөөр болсон гүйж ирээд энэ манай банхар танилц манай найз байгаа юм. Дүү бид хоёрыг олон удаа аварч байсан их ухаантай нохой, бас их дулаахан бид гурав чинь найзууд байхгүй юу гэлээ. Би банхарын духыг илэхэд тэрээр баясан байгаа нь илт. Сайн нохой байна. Манай хэдэд тусалж байсанд баярлалаа гэхэд хав хав хэмээн цуурайттал хуцав.

За хэдүүлээ ийшээ нэг айлд ирж байгаа юм явъя гэхэд том хүү маань тээнэгэлзэн хоцорсоноо намайг хараад за гээд урд гаран гүйсээр гэрийнхээ хаалган дээр очиж жижигхэн хөлөөрөө өшиглөж гарлаа.

Хаалганы цаанаас одоохон одоохон гэсэн дуу гарч хаалга нээгдлээ. Манай хоёр хүү ааваа ааваа хэмээн аавынхаа хүзүүнээс зүүгдэцгээв. Тэгээд за дотогшоо ор энэ хүмүүсийг гэртээ оруул миний хүүхдүүд гэхэд том хүү маань над руу нэг дүүгийнхээ аав руу нэг харснаа хүмүүсийг гэртээ оруулан хаалгаа чанга гэгч нь хаав.

Хүүхдүүд гэрээр гүйлдэн өрөөнүүдээ нэг бүрчлэн шалгаснаа ааваа манайх их сайхан айл болсон байна, ааваа та их цалин авдаг ажилд орно гэдэг байсан тэгээд тэр ажилдаа орсон юм уу хэмээхэд тиймээ гэртээ ирсэн сайхан байна уу гэсээр инээмсэглэл тодруулан баярлалаа гэх шиг над руу харан ийшээ суу цай уу хэмээн урилаа.

Гэрээ маш даруухан бас хүнд хэрэгцээтэй бүхнээр тохижуулж, тэгээд өөдөөс харсан хананд миний түрүүний гэртээ үзэж байсан зургийг томоор угаалгаад залсан байлаа.

Тэгээд надад цай авчирч өгөөд дүү минь чамдаа ах нь чин сэтгэлээсээ талархаж байна. Хүний амьдрал гэдэг тэр шигээрээ л кино шиг байх юм. Өнгөрсөн он жилүүдэд ах нь их олон зүйлийг үзэж тууллаа. Одоо бодоод байхад миний амьдралд саараасаа сайн хүмүүс нь их байж бие биендээ дэм тус өгч байсан байх юм. Эр хүн уйлдаггүй гэдэг өнөөдөр ах нь баярласан сэтгэлээсээ дүүдээ зориулаад нэг зүйл бэлдсэн байгаа гээд цаад өрөөнөөсөө цагаан хадгаар толгойг нь ороосон их гарын морин хуур гарган ирээд сандал дээр тухлан суугаад ах нь сэтгэлийнхээ угаас талархаж байгаа өчүүхэн илэрхийлэл юм шүү би сайн хуурдахгүй байж мэднэ гэхдээ ах нь дүүдээ зориулж байна даа гээд нулимсаа арчин хуурдаж эхлэв.

Хуурын чимээнээр хүүхдүүд маань ирээд томоотой нь аргагүй чих тавин суув. Миний сэтгэл хөвсөлзөн алтан шаргал говийн элсэн дээгүүр хөл нүцгэн гүйж зэрэглээн дундаас нь миний хэзээ ч харж байгаагүй ижий минь ирээд илбэн таалах шиг сэтгэл санаа минь уяран баясан хөвөн хөөрч байлаа.

Том халзан духтай дүрлэгэр алаг нүднээс нь итгэлийн гал бадамлан инээд цацруулан хуурдан буй түүнийг хараад зовлон дундаас зол жаргалыг шүүрдэн авч зоригоо чангалан дээш бүр дээш хязгаарын чанад руу тэмүүлдэг монгол эр хүний холч ухааныг харах шиг боллоо.
Хуурдаж дуусаад за дүү минь ах нь үүнийг дүүдээ зориулан сэтгэлээ гарган байж урласан юм шүү. Монгол хүн морьтойгоо байхад дэлхийн талыг туулж морин хууртайгаа байхад сэтгэлийн итгэлийн галтайгаа байж чаддаг юм шүү дээ хүн байж чадсанд монгол эр хүн байж чадсан чинь талархаж байна. Бас хийсэн хийх гэж байгаа бүх зүйлд чинь талархаж байна. Ийм сайхан хүмүүс байхад миний монгол хөгжинө гэсэн үг шүү дээ. Баярлалаа миний дүү май гээд надад морин хуураа өгөв. Би хуурын хөвчис нь анирласан хэвээр байгаа тэр хүчирхэг хуурыг тэргүүнээ залан гялайлай хэмээн амандаа шивнэлээ.

За миний дүү суу ах нь өнөөдөр туйлын баяртай байна. Шинэ он гарсны дараахан танай туслах гэж хүн над дээр ирж уулзсан. Тэгээд миний хоёр хүүхдийн талаар ярьж, удахгүй намайг гаргаж авна, та хүлээж байгаарай бүх зүйлийн учир тайлагдсан гэхийг сонсоод баярлахын дээдээр баярласан. Тэгээд чамайг ирэхээс өмнө чиний явуулсан мөнгөөр гэрээ тохижуулаад та хэдийгээ ирэхийг тэсэн ядан хүлээж суулаа. Хүлээх гэдэг ийм сайхан байдаг байж. Тиймээ ах нь дүүдээ маш их баярлаж байна. Итгэлийг нь алдахгүй ээ ах нь гэв.
Би хариуд нь тиймээ би ч гэсэн таниас өөрцгүй баяртай байна. Сайхан ахтай дүү нартай, хүүхдүүдтэй ч боллоо. Бас нэг найзтай ч боллоо. Энэ банхар нээрээ ухаантай нохой байна шүү гэхэд хөөрхий дөө манай хэд ч их зовсон доо. Одоо жаргах цаг ирж байнаа сайхан байна гэхэд Ахаа танаас нэг гуйх юм байна гэхэд юу юм болдоо чадах зүйл байвал туслалгүй яахав гэхэд дүү нь удаан хугацаагаар ажил ажил гэж гүйсээр байгаад өөртөө ерөөсөө цаг гаргаж байгаагүй юм байна, тэгээд хоёр хүүгээ аваад эх орныхоо болон дэлхийн зарим орнуудаар явах гээд төлөвлөсөн байгаа та намайг иртэл миний ажлыг хийж байгаач гэж гуйх гэсэн юм гэлээ. За чи хэрвээ итгэж байгаа бол би ямар ч байсан итгэлийг чинь хөсөрдүүлэхгүй ээ гэхэд туслахын авчирсан албан бичиг дээр гарын үсгээ зурж эзнийг бүх цаг хугацаанд орлох бүрэн эрх бүхий батламж байлаа. Айх шиг , бас сүрдэх шиг амьдрал аргагүй сүр хүчээ харуулж байна даа. Бид хоёр хүүхдүүдээ өргөн тэвэрч аз жаргалтайгаар дөрвүүлээ толгойгоо нийлүүлэн эргэлдэн бүжин инээн баясан байлаа.

… тэр жилийн тэр нэгэн шинэ жил, тэр нэгэн жаргалтай мөчүүд миний амьдралыг сайн сайхан гольдрол руу минь оруулж өгч билээ. Тэр цагаас хойш дүү бид хоёр хоёр буурайнхаа буянаар даарч хөрөхийг үзсэнгүй дээ. Хүний амьдрал тэр чигээрээ хайр энэрэл, халамж нигүүлсэлээр дүүрэн байж хүн итгэж зүтгэж найдаж байхад хүн хүндээ байгаль дэлхийдээ ямар их гайхалтай зүйл өгч бүтээж болдогийг мэддэг болсон юм. Өвөө нь одоо аз жаргалтай баяр баясгалантай амьдралд хайртай байгаа минь миний аавын минь ач гавъяа юм шүү дээ.

Жил бүрийн шинэ жилийн баяр болох тэр мөчид аав дүү бид гурвын анх уулзсан тэр дэлгүүрийн үүдэнд жаварт хайруулан зогсох би дуртай. Хүү минь хүнийг сайхан муухай, хиртэй хувцастай гэж битгий голж шилж бай, даахин дор эр өсөж өндийж атгахан зүрхэнд нь эх орон нь хамтдаа цохилж байдгийг өвөө нь мэддэг болсон юм шүү дээ тэр цагаас хойш.

Би одоо болтол өнөө хуучин байшиндаа амьдарсаар л байна. Нандин дурсамж минь навтгар энэ байшинд минь байдаг болоод л тэр. Байшингийн минь хөндийн адарт зөндөө ном хураалтаастай байдагсан. Тээр жил дүү бид хоёр даарч хөрч явахдаа муу банхартайгаа гурвуулаа байшингийнхаа адарт дулаацан өр зүрхний минь дор миний гэр орон бий, ядуу буурай хүмүүс траншей орц хонгил гээд л харанхуй дулаан бүхэн рүү шигдэж байхад би тийм жаахан байсан мөртлөө хэцүү хүйтэн ч гэлээ гэрэл гэгээ өөд тэнгэр өөд тэмүүлэн тэсвэрлэн тэмцэж байсандаа баярладаг юм.

Дүү бид хоёрыг гүйлга гуйгаад сууж байхад нэг удаа даруухан хувцасласан эгч ирээд миний хоёр дүү эгчид нь та хоёрт илүүчлэх зүйл алгаа гэхдээ баяр болж байна шүү дээ май энэ ганцхан чихрийг ав даа хуваагаад ид гээд хайр бүхий харан харан одож билээ. Нээрээ тэр чихэр маш гоё амттай байсансан. Муу дүүгийн минь аав их ухаалаг тэсвэр тэвчээртэй хүн байж дээ. Анхны хайртаа анддаа алдчихаад тэдэндээ сайныг ерөөн эр цэргийн албанд яваад дараа нь эх орноосоо хол ажил хийгээд явж байхад нь анхны хайрт нь ханиасаа салаад нялх хоёрын хоёр хүүхэдтэй харж хандах хүнгүй өвчтэй хүнд хэцүү байгааг дуулаад хайртай хүнийхээ төлөө, андынхаа хүүхдүүдийг хүн хийхийн төлөө өөрийгөө ч мартан бидэнд бүхнээ зориулсан юм байна лээ эвий минь. Тэгэхэд би бага байхдаа энэ хүн л ээжээр дүүг гаргуулах гэж зовоогоод тэгээд бас биднийг гэр оронгүй болголоо гэж бодсонсон. Гэтэл ээжийн минь ангийн анд нь ээжээс байшингын ордерыг нь хуурч авч яваад эцэст нь муу аав минь учрыг нь олох санаатай очиж нударганы амт үзүүлсэн юм байж. Тэгээд танил талгүй хүн яах вэ эрх мэдэлтний гүтгэлгэнд өртөж аавынд байхад нь миний тэнгэр тэтгэсэн аав гаргаж авч бидний амьдрал хувь заяагаар холбогдсон учир тэр байж дээ.

Аяа амьдрал үнэхээр сайхан юм шүү үр хүүхдүүд минь хайр хэмээх энэ дөрөвхөн үзгэнд хан хорвоо тэр чигээрээ багтдаг юм шүү дээ.
…Гадаа цас будран бууж байна. Тэр нэгэн жилийн тэр нэгэн шинэ жил өр зүрхэнд минь одоо болтол уяатай. Баярлалаа байгаль дэлхий минь, баярлалаа хорвоо минь миний сайхан аавуудад миний мэндийг хүргээрэй. Хүү нь одоо өвөө болсоон. Өнөр өтгөн сайхан амьдарч байна. Буянтай буурлууд минь та нартаа мөнхөд сөхөрнөм. Монгол омогшил минь та нараараа бахархаж байна.

Ум сайн амгалан болтугай.

аргалын утаа үнэртээд л миний монголын өвөл мөн ч сайхан даа

2011-12-09T21:36:00.001+08:00

Хүүхдийн язгуур урлагийн Галбингаа сургалтын төвийн сургалтын явц

2011-12-09T20:28:00.001+08:00

Narnii haan huuhduud (children's version)

2011-12-09T08:02:00.000+08:00

Дэлхий үүссэн тухай /домог/

2011-11-22T14:13:00.001+08:00

Эрт галавын үед манай дэлхий одоогийнх шиг хөрс шороо, хад чулуу байхгүй хариннил усаар бүрхмэл байсан гэнэ. Тэр үед Хурмаст тэнгэр нэг түмэн жил болоод нэг өндөг гаргадаг гурван түмэн настай Галбингаа шувууг дэлхий рүү явуулжээ. Галбингаа шувуу эх дэлхийг тойрон явж байгаад өндөглөх болж гэнэ. Тэгээд үүр засч өндгөө гаргах гэтэл ямар ч хуурай газар байхгүй тул арга буюу өд сөдөө зулгаан усан дээп үүр засчээ. Тэр зассан үүрэн дээр хумхийн тоос буусаар байгаад дагтаршин газрын хөрс үүссэн гэнэ. Ингэж хөрст дэлхий тогтсон юм байна.

П.Дэлгэржаргал

Галбингаа мину

Галбингаа шувууны далавчны хүчирхэг сэрчигнээнд
Газар дэлхий минь ариусан ариусан нялхамсана
Гэрэлтэн цацрах чиний л зүг рүү
Гэгээн мэлмийгээ алгуурхан бид анилаа.

Хаанаас ч чамайг олоогүй юм гэнэ лээ
Хэнд ч чи харагдаагүй юм гэнэ лээ
Хорвоод чи төрөөгүй юм гэнэ лээ
Хувьтай бүхний өр зүрхэнд л гагцхүү дуулдаг юм гэнэ лээ

Уянгалаг дууг тань өнөөдөр бид сонслоо
Уудам тэнгэртээ Нэгэн үзэсгэлэнтэйеэ гэрэлтэнэ
Гайхамшиг өнөөдөр л газар дэлхийд минь чуулж байна
Гагцхүү чимээ аниргүйхэн сэтгэлийн гүндээ анирийг тань сонсмоороо

Жаргалангийн далай тэртээ тэнгэрт цалгилна
Жаран жарныг гатлан ирсэн гэрэлт шувууд бүжиглэж байна
Зуун зууны амгалан жаргалангийн эхлэлийг авчиран
Зуны эхэн сарын шинийн арван таванд Тэд энд чуулвай.

Тэнгэрээс түм буман цэцгэн эрхи бөмбөрөн буусаар
Тэгээд хайр жаргалангийн хүчээ аливаад шингээн шингээж байна
Дэргэдээс цэцэгс цэцэгс дэлгэрч гоо сайхнаар цогцлохуйд
Дээрээс Бурхад буудаллан энд морилон саатаж байна.

Хөх тэнгэр өнөөдөр хөх биш нэлэнхүй гэрэл гэгээнд хувиллаа
Хөрст газар өнөөдөр хөгжил цэцэглэлийн өлгий боллоо
Хүүхэд хөгшид бүгдийн зүрх өнөөдөр л тэнийн тэнийнэм
Хэмжээлшгүй жаргалангийн үүд өнөөдөр өнөөдөр л цэлийтэл нээгдлээ

Галбингаа шувууны далавчны хүчирхэг сэрчигнээнд
Газар дэлхий минь ариусан ариусан нялхамсана
Гэрэлтэн цацрах чиний л зүг рүү
Гэгээн мэлмийгээ алгуурхан бид анилаа.

Сэтгэлээс минь итгэлийн зул цэцэг адил бадамлан дээшлэхүйд
Сэрэл мэдрэхүйгээрээ Галбингаа чинийхээ дуун аялгуунд уусан нэгднэм бид
Санаа бодолдоос уяатай эрхэм нандин хүсэл мөрөөдлөө л
Саатан морилсон таны зүг сэтгэлийн цагаан цэцэгсэд хувилган нисгэвэй

Орчлон хорвоо өнөөдөр өнөөдөр л оргил өөд тэмүүлж байна
Ондоо хаана ч бус гагцхүү энд л жаргалан чуулж байна
Оосор бүчгүй одот тэнгэрт ч бас тэртээд дуулалдан хөгжилдөнө
Одоо яг энд бүр таны дэргэдээс гайхамшиг дэлгэрч байгааг Та мэдэр

Хүлээсэн бүхэн хайраа хүртэх болтугай
Хүндэлсэн бүхэндээ энэрлээ хандуулах болтугай
Хүж дэлхий минь аз жаргалаар өлмий нь батжих болтугай
Хүй орчлон тэр чигээрээ хөгжин дэвжих болтугай

Өглөө бүхнээр гэгээн мөрөөдлийн шувууд жиргэсээр л байг
Үдэш бүхэн үнэнч хайрын одод чуулсаар л байг
Өнө хойчид Галбингаа морилснийг мөнхөд санан санатугай
Өдөр бүхэн өр зүрхэнд тань Жаргалан цэцэглэн цэцэглэг ээ

Галбингаа шувууны далавчны хүчирхэг сэрчигнээнд
Газар дэлхий минь ариусан ариусан нялхамсана
Гэрэлтэн цацрах чиний л зүг рүү
Гэгээн мэлмийгээ алгуурхан бид анилаа.

Гар гараасаа бид атган тэнгэр өөд тэмүүлнэ
Сэтгэл сэтгэлдээ нандин мөрөөдлөө шивнэн шившинэ
Голт зүрхэнд минь Галбингаа минь дуулсаар л байхуйд
Чанад алсын чанадаас сайхан хорвоо өр зүрхний үүдээ нээлээ

Галбингаа Галбингаа минь
Гэрэл гэгээнд хувилсан Галбингаа мину

Галбингаа шувууны далавчны хүчирхэг сэрчигнээнд
Газар дэлхий минь ариусан ариусан нялхамсана
Гэрэлтэн цацрах чиний л зүг рүү
Гэгээн мэлмийгээ алгуурхан бид анилаа.

Чи одоо салхи, чи одоо гэрэл,
Чи одоо итгэл, чи одоо үнэн боллоо

Галбингаа мину

2011-11-17T14:42:00.001+08:00

“Мөнх тэнгэрийн бичиг” үзэсгэлэн Үндэсний уран зургийн галерейд нээгдлээ

Мэдээлэл бүртгэсэн: administrator огноо: 2011-11-16

Монгол Улсын Ерөнхийлөгчийн Тамгын газар Монголын тулгар төрийн 2220, Их Монгол Улс байгуулагдсаны 805, тусгаар тогтнолоо сэргээсэн Үндэсний эрх чөлөөний хувьсгалын 100 жилийн ойд зориулан “Мөнх тэнгэрийн бичиг” үзэсгэлэнг Үндэсний уран зургийн галерейд өнөөдөр нээлээ. Үзэсгэлэнгийн нээлтийн ёслол морин хуурын аялгуу, Уяхан замбуу тивийн наран уртын дуугаар танхимынхаа жаврыг үргээж, Монгол Улсын Ерөнхийлөгчийн Тамгын газрын дарга Д.Баттулга үг хэлснээр эхэллээ.

Тэрээр хэлэхдээ “Хүмүүн төрөлхтний оюун ухааны нэгэн том ололт бол санаа бодлоо бичгээр илэрхийлэх болсон явдал билээ. Манай эриний өмнөх Х зууны үед Газрын дундад тэнгисийн зүүн эргээр оршиж байсан овог аймгуудад анхлан авианы бичиг үүсч улмаар эл авианы бичиг өрнө зүг дэлгэрэн Грек, Латин хэлний цагаан толгойн эх сурвалж болсон бөгөөд харин дорно зүгт дэлгэрсэн нь Арамей, Сири, Согдоор дамжин Уйгур, Монгол бичгийн үндэс болжээ.

Монголчууд бидний өвөг дээдэс Хүннү, Сяньби, Тоба, Жужан нар тусгай бичигтэй байсныг судлаачид баталсан төдийгүй Кидан нарыг Х зууны үед их, бага хоёр бичигтэй байсны дурсгал ч эдүгээ олдсоор байна.

Монгол бичиг он жилийн уртыг туулан боловсорч эрт цагийн үг, өгүүлбэрийн бүтцийг өчүүхэн ч алдагдуулалгүйгээр эдүгээд ирсэн нь монгол хэлний хөгжил, хувьсал бол бүхнийг ташаагүй үнэн тэмдэглэсэн түүхэн сурвалж бичиг мэт ажээ. Орчин цагийн монгол хэлний дуудлагаас өөрөөр бичиж байгаа үг бүрийн цаана эх хэлний маань түүхэн хувьсал, үгийн гарлын учир шалтгаан, үндэсний хэл сэтгэхүйн бүхэл бүтэн түүх байгаа гэдгийг онцлон дурдах нь зүйтэй болов уу.

Бидэнд өвлөгдөн ирсэн одоогоор мэдэгдэж байгаа монгол бичгээрх олон дурсгал байгаагийн хамгийн эртнийх нь Санкт-петербург хотын Эрмитажид хадгалагдаж буй Чингисийн чулууны бичиг, мөн Ватиканы нууц архивт байгаа 1246 онд Гүюг хаанаас Ромын Пап ламтанд илгээсэн албан захидал, Парис хотноо хадгалагдаж буй 1295 онд Ил хан Аргунаас Францын ван Гоо Филиппэд илгээсэн захидал, мөн дэлхий нийтийн энх амгалангийн тухай агуулга бүхий 1295 онд Ил хан Өлзийтөгс Францын ван Гоо Филиппэд илгээсэн албан захидал зэрэг юм.

Дээрх алдарт бүтээлүүд нь түүх, угсаатан, антропологи, хэл шинжлэл, утга зохиол, газар зүй, гадаад харилцаа зэрэг олон салбар ухааны нийлэг уулзварыг багтаасан дурсгалд зүй ёсоор орно. Нөгөө талаасаа өнөөдрийн уран бичлэгийн анхны бичвэрийн тиг, хэв маягийг цогцлоон хадгалж ирсэн гэдгээрээ Монголын бичгийн соёл хийгээд уран бичлэгийн түүхэнд томоохон байр суурь эзлэх бүтээлүүд болой.

Монгол Улсын Ерөнхийлөгч Ц.Элбэгдорж өнгөрсөн оны 7 дугаар сард “Монгол бичгийн албан хэрэглээг нэмэгдүүлэх зарим арга хэмжээний тухай” зарлиг гаргаж, үндэсний бичиг соёлоо өртөөлөн авч явахад үлэмж их хувь нэмрээ оруулахыг ард олондоо уриалсан билээ. Энэхүү зарлигийг хэрэгжүүлэх хүрээнд нэлээд ажил хийгдэж байгаагийн нэг нь “Мөнх тэнгэрийн бичиг” шилмэл уран бичлэгийн үзэсгэлэн юм.

Тус үзэсгэлэнд дэглэгдсэн бүтээлийн дотоод орон зайд бидний өвөг дээдсийн бичиг соёлынхоо төлөө мятрашгүй зүтгэсээр ирсэн түмэн алжаал мянган зүдрэлийн шим түүх, соёл, урлаг болон гэрэлтэж буйг хэлэхэд магнай тэнэгэр байна. Уран бүтээлч Та бүхэндээ сайн сайхныг хүсэн ерөөе.

Мөнх тэнгэрийн ивээл дор

Монгол бичиг бадамлан мандах болтугай” гэв.

Дараа нь Ерөнхийлөгчийн Тамгын газрын дарга Д.Баттулга, ШУА-ийн ерөнхийлөгч Б.Энхтүвшин, Хэл зохиолын хүрээлэнгийн захирал Д.Төмөртогоо, уран бичигч Д.Батбаяр нар нээлтийн тууз хайчлав. Нээлтийн ёслолд оролцогчдыг төлөөлж МУИС-ийн Хэл соёлын сургуулийн гавьяат багш Ш.Чоймаа, уран бичигч Д.Баттөмөр нар үндэсний бичиг соёлоо дээдэлсэн үзэсгэлэн гаргаж байгаад Ерөнхийлөгчийн Тамгын газарт талархан үг хэлж, “Хүн төрөлхтний бичиг соёлыг их далай хэмээвээс түүний нэг цутгалан нь монгол бичиг билээ” хэмээн тэмдэглэж байлаа.

Нээлтийн ажиллагааны үеэр Ерөнхийлөгчийн Тамгын газрын дарга Д.Баттулга Монгол Улсын Ерөнхийлөгч Ц.Элбэгдоржид Итали Улсад айлчлахад нь Ватиканы архиваас өгсөн Их Монгол Улсын Гүюг хаанаас Ромын Пап IV Инносент Николайд явуулсан захидал, Ил-хаан Хасанаас Ромын Пап VIII Бонифаст илгээсэн захидлын хувийг ШУА-ийн Түүхийн хүрээлэн, Монголын үндэсний төв номын санд хадгалуулахаар хүрээлэнгийн захирал С.Чулуун, номын сангийн захирал Х.Чилаажав нарт хүлээлгэн өгч, тус үзэсгэлэнд бүтээлээрээ шалгаран оролцож буй Д.Батбаяр, Ц.Тамир, Ц.Бямбажав, Э.Найдандорж, Д.Ганбаатар, Л.Түвшинжаргал, Т.Жаъяансүрэн, Д.Баттөмөр нарт Ерөнхийлөгчийн Тамгын газрын дурсгалын өргөмжлөл гардуулж баяр хүргэв.

Уран бичигчид монгол бичгээр хэрхэн урлагийн бүтээл туурвидгаа бодитойгоор харуулж, цаасан дээр бийрээр үгс таталган үзэсгэлэнгийн нээлтэд оролцогчдыг гайхшрууллаа. Мөн нээлтийн ёслолд Монгол Улсын гавьяат жижигчин, уртын дууч Г.Хонгорзул, “Сүлд” чуулгын дуучин Б.Базардорж, Э.Сүнжидмаа, “Монгол эгшиглэн” хамтлагийн хүүхдүүд, “Нүүдэлчдийн давалгаа” хамтлагийнхан ая дуу, үзүүлбэрээрээ цугласан олонд мялаалга өргөлөө.

Энэхүү үзэсгэлэн нь монгол бичгийн албан хэрэглээг нэмэгдүүлэх Ерөнхийлөгчийн зарлигийн хэрэгжилтийг идэвхжүүлэх, үндэсний бичгийн үнэ цэнэ, ач холбогдлыг олон нийтэд сурталчлах, танин мэдүүлэх зорилготой билээ. Уран бичлэгийн уг үзэсгэлэнг энэ сарын 16-20-нд ажиллуулах юм.

эх сурвалж : http://www.president.mn

Игорь Крутой - Печальный Ангел / Igor Krutoy - A Sad Angel.

2011-11-13T21:13:00.000+08:00

Igor Krutoi - Miss You In My Dream

2011-11-13T21:09:00.000+08:00

танд талархья...

2011-11-13T11:10:00.001+08:00

Хүйтэн салхи сөрөн хөл нүцгэн алхахдаа хөөрхийлөлтэй амьдралаа халаглан халаглан гадуурхлаа. Хаашаа ч одсон хана мөргөх энэ амьдралын нугачаанд аргаа барсан хувь заяа минь дээ.

Тиймээ, та өөрийгөө ямраар төсөөлнө та тийм л байна.

Хэмжээлшгүй их эд хөрөнгөтэй ч хоосон сэтгэлтэй бол хоолгүй гуйлагчинаас дор ядуу нэгэн болно. Идэх хоолгүй ч энэ амьдралдаа сэтгэл хангалуун бол хомхой баянаас хамаагүй баян нэгэн байна шүү дээ.

Тиймээ, ганцаардал гунигийн мананг хөөж байна, гайхалтай сайхан анд нөхөдөө олов би өнөөдөр. Ганцаардал эргэлзэл үзэн ядалт чамтай дахин нөхөрлөхгүй ээ, итгэл найдвар харамгүй зүтгэл, хайр чамтай би анд бололцоё.

Эртний анд минь ирнэ гэдэгт итгэж байсан аж, мянга мянган жил хүлээсээр л байсан аж. Энгийн бүхний дотор хязгааргүй жаргалан нуугднам, энгийн даруухан бүхний гүнд энэ орчлонгийн учир шалтгаан оргилон оргилон байнам.

дуусашгүй сайхан дуугаа дуулж эхэлье
дундаршгүй жаргалан жаргалан жаргалан

өнөөдөр маргааш нөгөөдөр бидний тоолол, үнэн итгэл найдвар амжилт нөхөрлөл тэнгэрлэг хязгаарын чанадын тоолол, гэрэл гэгээ илч дулаан, өсөн дэвжих хүч чадал орон зайн тоолол. Чандмалан нэгдэх гурван тоолол эрч хүчээ аван нэгэн зүгт дэвшнэм...

Хаанаас ирсэн хаачихаа мэдэхгүй ч харин хэнийх гэдгээ мэдэх боломж олгосон амьдрал танд талархья...

Нөхөрлөл

2011-10-30T18:53:00.004+08:00

Нөхөрлөл гэж ер нь байдаг юм болов уу? Бага байхдаа бороотойд ч, цастайд ч, бүр шуургатайд ч хацраа хөлдөөгөөд эсвэл шалба норчихоод найзууд руугаа гүйдэг байж. Тэр цагт юм бүхэн гэрэл гэгээтэй байдагсан. Яг л борооний дараах тийм нэгэн гэнэхэн алдмааргүй агшин шиг л байж дээ.

Харин өнөөдөр энэ бүхнээ юу юунаас илүү үгүйлнэм. Хаашаа ч юм бэ хамгийн нандин нэгнээ явуулчихсан юм шиг тийм нэгэн хоосон хөндий байна даа.

Цаг хугацаа орон зай, гэрэл харанхуйг дагаад энэ хорвоо тэр чигээрээ хаашаа ингэтлээ яарна вэ?

Баг зүүн гүйцгээх бид хөгжлийн төлөө байна уу эсвэл зөвхөн хоолны төлөө байна уу? Ойрд блог дээрээ юу ч бичиж чадахгүй байна. Яагаад вэ? Яагаад вэ гэвэл би төөрөөд удлаа. Хаашаа явахаа эс мэднэ, бас хаана үлдэхээ эс мэднэ. Хүмүүний амьдралд нэгэн үед амран эргэж бүхнээ харан цэгнэх үе гардаг гэж ярьдаг хэдий ч хэтэрхий хязгааргүйтэй найзласнаас болоод магадгүй өөрийн оршин тогтнолоо алдаж байж болох юм.

Та хаана байгаагаа юуны төлөө үнэ цэнэтэй бүхнээ золиослон урагшилж байгаа гэдгээ мэдэж байгаа бол нөхөрлөл гэж юу болохыг зүрхэндээ эргэн нэг хараарай.

гараас минь атгах анд минь холдон одсон ч голт зүрхэндээ андынхаа төлөө сайхан ерөөл
оршоон хязгааргүйн анд тэнгэр таньтай анд барилцахсан тэвэрч аваарай тэнэгхэн намайг...

тэнхээрэл тэвчээр ухаарал уужуу сэтгэл үнэний зам мөрийг гэрэлтүүлж өгөөрэй өглөө бүхний нарнаар....

Зарлал

2011-10-11T15:08:00.000+08:00

Галбингаа сургалтын төвийн дэргэдэх Яруу эгшиглэн хүүхдийн ардын дууны хамтлагт 4-7 насны дуулах сонирхолтой, өөртэй итгэлтэй хүүхдүүдийг шалгаруулж байна.

Эх орноороо бахархах, ардын урлагын баялаг өв сангаас суралцах, монгол ардын дуугаа өвлөн дуулах зорилготой Яруу эгшиглэн хамтлагийг байгуулж байгаа билээ.

Хүүхдүүдээ Та бүхнийг урьж байна.

манай хаяг: Хүүхдийн урлан бүтээх төвийн ард, 1-р байр, Өсвөр үейин хөгжлийн төвийн 6 тоот. Галбингаа сургалтын төв.
E-mail: galbingaa@yahoo.com, blog: www.galbingaa.blogspot.com

Утас: 91174919, 98620220,

:

Үгийн учиг Жагдаг

2011-10-09T16:20:00.000+08:00

Монгол улсын гавьяат жүжигчин Д.Жагдаг Үгийн учиг нэртэй сургалтын төвөө шинээр нээлээ.

Энэхүү сургалт анхан, дунд, гүнзгийрүүлсэн гэсэн 3 үе шаттай ба уг сургалтанд хамрагдсанаар уран унших арга барилд суралцах ба хэл зүгшрүүлэх, ой тогтоолт, үгийг уран нарийн мэдэрч сурна.

анхан шатны сургалт - хэл зүгшрүүлэлт ой тогтоолт- 2 сар 40 000 төгрөг
дунд шат - үгийг мэдрэх, уран унших - 2 сар 60 000 төгрөг
гүнзгийрүүлсэн шат - цомог гаргах хэмжээнд суралцах 2 сар 80 000 төгрөг болно.

Та бүхнийг урьж байна.

Холбоо барих утас: 9601-8606 , 9970 8606

"Галбингаа" язгуур урлагийн хүүхдийн сургалтын төв нээгдлээ

2011-10-02T15:35:00.003+08:00

Сайн байна уу?
Эрхэм танд энэ өдрийн мэндийг хүргье.

Монгол ардын дууны Галбингаа нэртэй сургалтын төв нээлээ. Уг сургалтанд 3-15 насны хүүхдүүд ардын дуу, хүүхдийн дуу, үндэсний хөгжмийн ганцаарчилсан сургалтанд анхан дунд шатаар хамрагдах юм.

Зорилго:
Монголчууд бидний ирээдүй болсон хүүхэд багачуудаа ёс заншил, өв уламжлал, ардын урлагын баялаг түүхтэй танилцан түүнийгээ дээдлэн хүндэлж, дэлхий дахинд өв соёлоороо гайхагдах, эх орноороо бахархах, эх оронч сэтгэлтэй иргэн болгож төлөвшүүлэхэд оршино.

Зорилт:
Хүүхдийг өөртөө итгэх итгэл, хүнлэг чанар, бие даасан бүтээлч байдал, бусдыг хүндэтгэн харилцах, нээлттэй байх, харилцааны эв дүй эзэмшихэд нь хүүхдэд дэмжлэг үзүүлэх ба ардын ёс заншил, дуу хуурыг танин мэдэхэд тусална.

Үзэл баримтлал:
Хүүхэд бүрийг хайрлан хүндэтгэж, тэдний хүвийн онцлог, хүсэл сонирхлыг дээдлэн, бие хүн болон хөгжихөд туслан дэмжинэ.

Давуу тал:
Багш нар
Тус төвийн багш С.Дэлгэрцэцэг нь Хүүхдийн дууны Монгол эгшиглэн хамтлагыг үүсгэн байгуулсан Монгол улсын Соёлын тэргүүний ажилтан хүүхэдтэй ажиллах эв дүйтэй багш юм.
Мөн үндэсний дуу бүжгийн Түмэн эх чуулгын хөгжимчин МУСТА Р.Бат-Эрдэнэ, хөгжимчин Даваасүрэн, Төгсжаргал зэрэг мэргэжлийн багш нартай.

Материаллаг бааз
Үндэсний хөгжмийн ятга, ёочин, лимбэ, морин хуур, товшуур хуур, хуучир, шанз зэрэг хөгжмөөс гадна мандалин , металфон, ямаха сургалтын хөгжим, систем хөгжим ,энгийн хөгжмийн зэмсэгтэй.

Сургалтын орчин
Тав тухтай тохилог орчинд мэргэжлийн багш нар таны хүүхдийн төлөө тантай хамт ганцаарчилсан сургалтг явуулна.

Монгол өв соёлоо дээдлэн ардын дуу хуураа сурах бяцхан үрсийн төлөө гэгээн хүсэл биелэх болтугай.

www.galbingaa.blogspot.com

Мөнх Тэнгэрийн Хүчин дор..

2011-10-01T13:01:00.004+08:00

.. Аливаа нийгэм шүтэн дээдлэх үзэл санаа, мөрөөдөлтэй байдаг. Хувь хүн ч ялгаагүй. Харин Монголын хувьд сүүлчийн 300 - 400 жилийн туршид бидний юу шүтэж бишрэхийг гадныхан зааж ирэв. Коммунизм, буддизм гээд бидэнд өвлөгдөөгүй, түүхэээс маань уламжлагдаагүй үзэл санааг хүчээр тулгаж ирсэн билээ. Өнөөдөр бидэнд бас л капитализмыг зүсэн зүйлийн аргаар тулган хүлээлгэж байна. Ингэж бид үндэстнийхээ хувьд өөрсдийн үзэл бодолгүй шүтэн дээдлэх үнэт зүйлгүй явсаар л байна.

Уг нь эзэн Чингисийн үеэс бид Мөнх Тэнгэр шүтээнтэй байсан билээ. Тэр шүтлэг маань өнөө цагт бүдүүвчлэгдсэн, дампуурч завхарсан, буруу зөрүү, худал хуурмаг нь дэндсэн "бөөгийн" гэх хуурмаг ёс заншлаар л оршиж байх шиг.
Мөнх Тэнгэр гэж юу вэ? Ер нь энэ ойлголтонд тодорхойлолт өгч болохуу? логик ёсоор чухам яaж тодорхойлогдох ухагдахуун бэ?
Мөнх Тэнгэр бол орон зай, цаг хугацаагаар хэмжигдэх боломжгүй, үзэгдэх хийгээд үл үзэгдэх гэрэл гэгээний орон юм. Шинжлэх ухааны хэлээр квантын орон, мэдээллийн нэгдмэл орон гэж болмоор.
Чухам эндээс л орон зай, цаг хугацаатай, мөнх бус юмс үзэгдэл илрэн гарч, орчлонгийн хөдөлгөөн, хөгжилд "оролцон явсаар" Мөнх Тэнгэр - гэрэл гэнээний оронд эргэж шингэдэг аж. Мөнх Тэнгэр бол буй бүхнийг бүтээгч, оршоогч, эвдэгч гэрэл гэгээний орон юм.

Мөнх Тэнгэрийн Хүчин дор... Мөнх Тэнгэр бол хэмжээ хязгааргүй, цаг хугацаагүй, оршин буй юм бүхний эх булаг тул түүний хүч мөн л хэмжээ хязгааргүй, зах хугацаагүй, мөнхийн бүтээлч хүч байх нь мэдээж. Энэ бол сансар орчлонгийн түгээмэл эрчим хүч-энерги гэж үзэж болно. Энэ хүч орчлонгийн юм бүхний салшгүй хэсэг, тэдгээр юмсын амьдралыг тэтгэгч хүч.

Оршин буй, хөдөлж, хөгжиж буй юм бүхэн энергийн хувирал - энергийн нэг төлөвөөс нөгөө төлөвт шилжих хэлбэр. Өөрөөр хэлбэл орчлонгийн юм бүхэн Мөнх Тэнгэрийн Хүчний давтагдашгүй нэг л илрэл. Юм бүхэн энергийн бодьгал илрэл бас хувирал.

Мөнх Тэнгэрийн Хуулиар... Мөнх Тэнгэрээс "төрөн гарч буй" бүх юм өөрийн жам хуультай боловч, Орчлонгийн түгээмэл хууль болох Мөнх Тэнгэрийн Хууль дор эргэж, хөрвөж, орчиж, орших аж. Тэр хууль бол хувирал, өөрчлөлтийн хууль. Энэ хууль бол оршин буй юм бүхэн "захирагддаг" гэгээн хууль. Ертөнцөд өөрчлөгддөггүй юм гэж нэгээхэн ч үгүй. Хөгжил хөдөлгөөн, хувирал өөрчлөлтөөс гадна үлддэг юм гэж огтхон ч байхгүй. Эд эс, ургамал цэцэгс, уул ус, газар дэлхий, гариг одод бүгд Мөнх Тэнгэрийн хуулин дор... Хүний бие, сэтгэл, оюун санаа, хувь хүн хийгээд нийгэм, хүн төрөлхтөн бүгд энэхүү мөнхийн хуулийн үйлчлэл дор...
Шинжлэх ухаан, үзэл бодол, онол номлол, сургаал суртал ч мөнх бус. Бүх юмс Мөнх Тэнгэрийн хуулиар явагдана. Энэ бүхний эцэст би чухамдаа юу гэж хэлэхгээд байна вэ гэвэл нэгэнт ийм цорын ганц эх булаг - Мөнх Тэнгэр, юунд ч дийлдэшгүй асар их хүч - Мөнх Тэнгэрийн хүч, яагаад ч зөрчих боломжгүй Мөнх Тэнгэрийн Хууль гэж байгаа тул хөдөлшгүй номлол, хуурамч үзэл суртал онолыг бие биендээ тулгаж алалдаж байх нь утга учиргүй мэт санагдана гэдгийг л хэлэх гэсэн юм. Юуг ч өөрчилж болно, хөгжүүлж болно. Юм бүхэн өөрчлөгдөнө, хувирна, хөгжинө. Учир нь Мөнх Тэнгэр, Мөнх Тэнгэрийн Хүч, Мөнх Тэнгэрийн Хууль аливаа өөрчлөлт, хөгжил, хөдөлгөөний шалтгаан болдог билээ.

З. Эрдэнэбат
eh survalj http://www.orloo.info

Chingisiin Mongold urij baina

2011-09-07T16:34:00.004+08:00

...уулс уулсын оройд,

2011-08-16T13:19:00.001+08:00

...уулс уулсын оройд, үүлс үүлсийн дор үе үесхэн манан зочилно. Алтан наран алсаас шаран, амьдралын салхи баруунаас үлээн, орон зайн оршин тогтнолоо хайн, одоо би уулс уулсын оргилд анирланам.

Хаяахан шулганах шувуудын жиргээ, хаа сайгүй чаг чаг хийх царцааны дуу, хажууд минь хамгаалах хонгорхон Чоло . харин би аниргүйн уудмаас анир хайн бэдэрнэм.

Эрлийн үзүүр мухар аж, эрэх хэрэггүй тэмүүлэх хэрэгтэй аж.

Манан буданд би оршном. Наалинхай зөөлнийг л мэдэрнээ.Зөөлөн шивнээ зүрхэнд анирлахад зөндөө удаан түүний тэвэрт эрхэмлэм. Дусал дусал бүхэн нийлж, гэрэл гэрэл бүхэн нэгдэж, амь амьсгал бүхэн оршиж, одоо ирээдүйн мөрөөдөл биелнэм.

Гар дээрээс минь наран мандлаа. Гайхалтай сэрүүхэн өглөө айлчиллаа. Шинэ зам, шинэ аялал хол аваачив. Шинэ бүхэн гэж үнэндээ үгүй аж. Тэнгэр ойрхон цэлийнэ, тэндээс жаргалан буунам. Гэрэл зүрхэнд минь шингэн уусахад гэгээн бүхэн орчлонд хуран чуулнам...

Saint Petersburg concert - Bayasgalan

2011-07-29T12:19:00.000+08:00

ezen aav mine, duuchin erdenehuu

2011-06-29T15:57:00.000+08:00

танхилхан зуны цэцгэн бүжиг

2011-06-27T15:35:00.000+08:00

Зуслангийн найзууд

2011-06-27T12:21:00.002+08:00

ерөөлөөр учирсан Миний-Монгол

2011-06-27T10:50:00.003+08:00

ерөөлөөр учирсан Монгол эх орныхоо төлөө бидний хийж, бүтээж чадах зүйл хэмжээлшгүй их билээ. Эх орноо гэсэн эрхэм нанди мэдрэмж л биднийг аливаа бүхэнд урамшуулж, монголоо гэсэн бахархал омогшилын өндөрлөгт аваачдаг юм болов уу.

Хүүхэд бүхэн инээд хөөр, баяр жаргаланг, хайрыг бидэнд харамгүй авчирдгийн адил бяцхан хүүхдүүдийн маань эвлэгхэн дуулах ардын дууны аялгуу, хуурын анир томчууд бидэнд ч бас эх орныг маань уянгалаг тансаг болгон бэлэглэж хэзээ тасрашгүй Монгол амин хэлхээг мөнхөд орчлон хорвоотой холбох мэт ээ...

Ийм нэгэн Галбингаа нэртэй ардын дуу, хуураа дээдэлсэн багачуудын өргөөг нээлээ.

Мөнх хөх тэнгэрийн дор
Миний Монголын үрс
Монгол гэдгээрээ бахархаж байх болтугай....

2011-06-10T17:30:00.001+08:00

Ардын дууны Галбингаа нэртэй сургалтын төв нээлээ. Уг сургалтанд 3-15 насны хүүхдүүд ардын дуу, хүүхдийн дуу, үндэсний хөгжмийн ганцаарчилсан сургалтанд хамрагдах юм.

Монгол өв соёлоо дээдлэн ардын дуу хуураа дээдлэн буй бяц хан үрсийн төлөө гэгээн үйлс нь ариун байх болтугай.

Тус төвийн багш С.Дэлгэрцэцэг нь Хүүхдийн дууны Монгол эгшиглэн хамтлагыг үүсгэн байгуулсан Монгол улсын Соёлын тэргүүний ажилтан хүүхэдтэй ажиллах авьяастай чадварлаг бүсгүй юм.

Холбоо барих утас 9862 0220, 9117 4919

Нарны хаан хүүхэд клипийг хийхэд тусалсан бүх хүмүүстээ баярлалаа

2011-06-08T16:45:00.000+08:00

зуны эхэн сарын шинийн 15

2011-05-18T01:19:00.000+08:00

Өнөөдөр Будда буюу бидний нэрлэж заншсанаар Бурхан багшийн мэндэлсэн, гэгээрсэн, нирваан дүр үзүүлсэн өдөр аж. Тэрээр эдгээр өдрүүд нь бүгд зуны эхэн сарын шинийн 15-нд тохиодог тул энэхүү гайхамшигт өдрийг Бурхан багшийн их тохиолт өдөр буюу Visаkha puja хэмээн нэрлэдэг байна.

Нэгдсэн Үндэсний Байгууллага Бурхан багшийн ариун үйлсийг хүндэтгэн Visakha puja өдрийг Дэлхий даяар хамт нэгэн өдөр тэмдэглэж байхаар тунхагласан байна. Visakha puja өдрөөр Бурхан багшийн ариун үйлсэд талархан хүндэтгэл үзүүлж зул өргөхөөр олон хүн нэг дор цугларч санаа бодлоо нэгтгэн хамтдаа залбирах “Гэрэлт зул” өргөх ёслолыг “Сэтгэлийн амарлил” сангаас санаачлан хийсээр 4 дэх жилтэйгээ золгож байна.

Уг арга хэмжээнд оролцсон хүмүүсийн хөөргөсөн зул гэрлэн зам татуулан хөөрч байгаа тэрхэн агшинд хажуугаар нь явж байгаад таарав. Тэгээд олзуурхан хэдэн зураг авсанаа блогтоо орууллаа.

Тэнгэр огторгуй, оддын орон зай үнэндээ биднээс алс хол байсаар ирсэн хэдий ч харин энэ орой тэнгэрт түм буман гэрлэн цэцэгс гэрлэн бүжиг бүжих мэт. Сэвэлзэх салхины аясаар сэм сэмхэн дээшлэх гэрлэн цэцэгс дээш, бүр дээдэд, өндөрт бүр өндрийн өндөрт, гүнд бүр гүний гүн рүү намуухан урссаар л байлаа.

... өр зүрхний гүнээ нэгэн хүчтэйе цохилно. Тэрээр алсын алсад хэрнээ бидний гүнд орших хязгааргүйг урин дуудах мэт. Өчүүхэнээс өчүүхэн бидний оршихуй, агуугаас агуу амьдралын баяр жаргалан хамтдаа баясан хөөрч улмаар тэнгэрт аз жаргалын тухай зарлиг бичиж байлаа.

Тиймээ, гэрлийн шувуухай минь холын холд нисэхдээ хорвоогийн жаргалыг дуудаарай, өндрийн өндөрт хөөрөхдөө үлгэрийн сайхан орчлонг эх дэлхийд минь бүтээгээрэй...

Гэрлэн шувуу Галбингаа чиний гэрлийн бүжиг, эмзэг ариухан галбингаа чиний дуун аялгуу өнөө орой бидний өр зүрхэнд минь дахин ирлээ, сэрлээ...

Миний анхны ном- Тэнгэрийн цэцэгс мэндэллээ

2011-05-08T04:14:00.001+08:00

Өнөөдөр 2011 оны 05-р сарын 07-ны өдөр. Энэ өдөр миний Тэнгэрийн цэцэгс нэртэй хамгийн анхны ном маань хэвлэлтнээс гарлаа. Өглөө бүр би гүйдэг юм л даа. Өнөө өглөө гүйж байхдаа яагаад ч юм бэ баяр хөөрөөр бялхан байсан юм. Тэгтэл орчлонгийн эгэл өдрүүд дотроос энэ л өдрийг надад онцгойлон бэлэглэжээ. Баярлалаа.

урьж байна.

2011-05-08T04:04:00.000+08:00

Сайн байна уу? Монгол эгшиглэн хамтлагын авьяаслаг бяцхан багачууд маань Бид Монгол хүүхдүүд тоглолтоо 2011 оны 5-р сарын 25-нд Бөхийн өргөөнд хийхээр боллоо. Та бүхэн бидний тоглолтыг ирж үзэхийг, хамтран ажиллахыг урьж байна.

Монгол ардын дуу хуур мөнхөд эгшиглэж
Мөнх хөх тэнгэртээ дуурссаар байх болтугай

Харилцах утас : 93119310, 98620606, 91174919

eh survalj: www.mongolegshiglen.blogspot.com

The Black Eyed Peas - Just Can't Get Enough

2011-04-29T13:49:00.002+08:00

гүйгүүл морин - А.Хосбаяр

2011-04-29T13:43:00.001+08:00

Etugen group Z.Soyolmaa

2011-04-26T23:40:00.000+08:00

YouTube-Монгол Улсыг эзлэх Хятадын бодлого

2011-04-25T10:38:00.000+08:00

Д.Мөнхжаргал: Хайртыгаа хөл дээрээ босвол цагаан даашинз өмсгөөд хуримаа хийхийг хүсдэг

2011-04-16T22:01:00.001+08:00

2011 оны 4-р сарын 15

Ариун хайрын түүх олон янз байдаг. Гэхдээ хэн нэг гуравдагч хүнээс бус амьдралын том сорилтын өмнө сөхрөлгүй үнэнч байж, ариун хайрын түүхийг өөрсдийнхөөрөө бичиж чадсан залуу хосыг энэ дугаартаа зочноор урьсан юм.

Нэг насны ханиа тэргэнцэртэй бүсгүйгээр сонгоно гэдэг хэр баргийн залуугаас гарахгүй шийдвэр байсан нь тодорхой. Гэвч хүн чанар, хайр сэтгэл, итгэл найдвар дүүрэн хосын амьдралд бяцхан үр нь жаргал дуудаж ирсэн юм.

Д.Мөнхжаргал, Б.Мөнгөнцэцэг хоёрын дэлбээлж буй хайр амьдрал болон цэцэглэж байна.

2004 он. Загвар өмсөгчдийн улсын уралдааны тэргүүн байрын шагналтай Б.Мөнгөнцэцэг өсөх ирээдүйтэй гэж үнэлэгдэж байсан үе. Үеийн охидоос ялгарч, загварын тайзнаа алхаж явсан тэрээр найз охидын хамт сагс тоглохоор зааланд ирээд анх Д.Мөнхжаргалтай танилцжээ.

Анхны харцаар дурладаг гэдэгт итгэдэггүй байсан ч нүдэнд дулаахан инээмсэглэх залууг хараад "Энэ л залууг нөхрөө болгохсон" гэж бодож байсан гэдэг. Харин Д.Мөнхжаргал "Биднийг тоглож байтал өндөр өсгийтэй гутал өмссөн, туранхай, нуруулаг, үснийх нь тайралт өвөрмөц, япон стильтэй, хөөрхөн охин ороод ирсэн. Тэр үед харцыг минь үнэхээр булаасан" гэж байв.

Энэ бол тэдний анхны уулзалт байв. Хоёр биедээ таалагдсан болохоор тэд утасны дугаараа солилцоод салжээ. Харин тэд хоёр дахь уулзалтаараа найзуудтайгаа хамт кино үзжээ. Маргааш нь бөөнөөрөө Тэрэлжийн амралтад амрахаар ярилцахад "Наадмаар гэрийнхэнтэйгээ хамт байна" гээд тэр хоёр татгалзсан байна. Гэвч найзуудынхаа ятгалгаар явахаас аргагүй болов. Харамсалтай нь тэдний явах дургүй байсан тэр амралт насан туршийнх нь зовлон шаналлыг авчрах юм гэж хэн нь ч мэдсэнгүй.

Маргааш нь соёолонгийн тоосонд орох гэж хот руу яарч яваад аваарт орсон тэр аймшигт өдрийг мартаж үл чадна. Осолд орсон залуусыг Гэмтлийн эмнэлэгт авчрахад Мөнхцэцэг хөлөө ч хөдөлгөж чадахгүй байв. Эмч нар түүнийг насан туршдаа тэргэнцэрт суухаар болжээ гэж хэлсэн ч хятад эмч нарын хийх хагалгаанд найдлага тавьж, босчих юм шиг санагдан залбирч байжээ. Гэвч хагалгааны дараа хуруу нь ч хөдөлсөнгүй.

“Үйрсэн ясыг нь суллаж авлаа, одоо амь наснаас чинь аюул холдсон. Гэхдээ насан туршдаа мэдээгүй боллоо. Гадаадад эмчлүүлэх, физик эмчилгээ сайн хийвэл үр дүн гарч магад” гэж хэлсэн эмчийн үгийг сонсоод эцсийн найдвар нь тасарсан юм шиг санагдсан гэдэг.

Сэтгэлээр унасан, уйлахаас өөрийг хийж чадахгүй болсон түүнийг чихэр, жимс барьсаар үргэлж эргэж тойрох залуу л хөгжөөнө. Сэтгэл санааг нь дэмжиж, ярилцаж суусаар шөнө хагасалж харих, үүр цайлгасан өдрүүд олон. Өглөө нь ажилдаа явж, орой нь ирж сахих түүний халуун сэтгэл, хайранд Б.Мөнгөнцэцэг сэргэж байсан юм.

“Өнөөдөр намайг өдий зэрэгтэй, сэтгэлийн тэнхээтэй байлгаж байгаа хүмүүс гэвэл миний ээж, нөхөр хоёр юм. Ээж минь одоо бурхан болсон. Хэрвээ би Мөнхөөтэйгөө суугаагүй бол өнөөдөр ингээд байж байхгүй байсан. Ханьдаа би үнэхээр их баярладаг. Хүү минь төрөөд намайг маш их баярлуулсан. Би өөрийгөө хэзээ ч ээж болохгүй, аав ээжийгээ өвөө эмээ болгож чадахгүй нь гэж бодож байсан. Болохгүй зүйл гэж байдаггүй гэдгийг амьдралаараа мэдлээ. Хамгийн гол зорилго маань хөл дээрээ босоод таяг ч болов тулаад явдаг болчихвол хүүгээ хөтлөөд сургуульд нь хүргэж өгөхийг хүсдэг. Хэзээ нэгэн цагт миний энэ хүсэл биелэх байх” гэж Б.Мөнгөнцэцэг чин сэтгэлээсээ хүссэн юм.

Сагс тоглож танилцсанаас хойш дөрвөн сарын дараа эмнэлгийн коридорт анх удаа хайртай бүсгүйгээ үнсэж байсан тэдний хайр сэтгэлийн сорилт үүгээр дууссангүй. Д.Мөнхжаргалыг аав, ээж нь Белги улсад суралцуулахаар шийджээ. Бичиг баримт нь бүтэж, явахаар болсныг сонсоод “Би хөлгүй хүн яах билээ, уйлаад хоцордог л юм байна” гэж Мөнгөөнөө ээждээ хэлээд уйлж суусан гэдэг. Белгид очоод Д.Мөнхжаргалыг “Хайрт минь яаж байгаа бол” гэсэн бодол л хамгийн их зовоож байсан гэдэг.

Уйлаад хоцорсон хайртай бүсгүйгээ санахгүй хором мөч байсангүй. Хайртаасаа хол өнгөрүүлсэн долоон сарын хугацаанд санасан сэтгэлээ аргадаж шүлэг, захиа бичнэ. Хайрынхаа тухай, ирээдүйн амьдралаа зөгнөсөн захидлаа хайрт руугаа явуулна. Тэргэнцэртэй хүмүүсийг харахаараа хайртыгаа бодож, бүрэн автомат ийм гоё тэрэг аваад очихсон гээд боддог байжээ.

Харин Мөнгөөнөө энд хайртыгаа хүлээнэ. “Чамдаа захиа явуулсан шүү” гэдгийг сонсоод л хүлээгээд, догдолчихно. Бараг сар болж ирэх тэр захиаг задлаад “Сайн байна уу, хайрт минь” гээд уншиж эхлэнгүүт л нулимс нь урсана. Олон сайхан шүлэг, сэтгэлийн тэнхээ өгөх үгс, цаасныхаа булан тохой, зай завсарыг үлдээхгүй бичиж явуулдаг учир захиагаа эргүүлж тойруулж уншсаар өдрийг амархан өнгөрөөнө. Маргааш нь ахиад л нөгөө захиагаа гаргаад уншина. Хэдий бие хол ч сэтгэлээрээ үргэлж хамт байгааг мэдэрч Мөнхөөг өөрт нь хязгааргүй хайртай, хэзээ ч орхихгүй гэдэгт итгэж, жаргалтай байх болжээ. Тэр мөчүүдийг амьдралын хайрын сорилт байсан гэж тэд томъёолсон юм.

Нисэх онгоцны буудал дээрээс нэг нэгэн рүүгээ яарсан хосууд удалгүй нэг гэртээ орж, бяцхан хүүтэй болжээ. Хүүгээ олдсон цагаас мэдээгүй болсон бие нь мэдэрдэг болж, эх хүн болохын аз жаргалыг амссан юм. Дөрвөн нас хүрч буй хөөрхөн хүү ээждээ тусалж, гар хөл болж гүйнэ.

Сайхан хүсэл мөрөөдөл дээр хүний амьдрал оршин тогтнодог. Тиймээс ч тэд сайн сайхныг мөрөөдөн амьдарч явна. Гэхдээ тэд илүүд шунаж дурласангүй. Тэдний хүсэл ердөө л эрүүл болж, хөл дээрээ босох. Тэр цагт цагаан даашинз өмсч хуримын ордонд гэрлэлтээ батлуулна гэсэн. Хайр бүхнийг ялж, хамтдаа байвал жаргал ирдгийг өөрсдийн биеэр үлгэрлэсэн тэднээс суралцах зүйл олон байна.

Ариун хайраар жигүүр хийж, амьдралын хатуу бүхнийг хамтдаа сөрж яваа залуу хосдоо эрүүл энх, аз жаргал бүхнийг хүсье.

Х.Монголхатан

eh survalj: http://news.gogo.mn/r/86256

altan urag xox tolbton

2011-04-16T00:33:00.000+08:00

Монголд ирээдүй гэж байна уу?

2011-04-12T00:24:00.000+08:00

Бид хэдий болтол муусайн эрлийз хурлийзуудад эх орныхоо хувь заяаны жолоог атгуулсаар байх вэ?

Хэрэв тэд үнэхээр монгол юм бол яагаад казастан шиг дэлхийгээр нэгэн тархан байгаа элэг нэгт ахан дүүсээ эх орон руугаа авчрах нөхцөлийг олгохгүй байна вэ? Хичнээн олон мянган монгол хүн эх орондоо ирэхсэн гэж бодож байгаа гээч. Тэд өдөр бүхэн монголынхоо одот тэнгэрийг санагалзан сүүгээ өргөдөг, сэтгэл итгэлээ хандуулдаг, монголоо мөхөж байгааг шимшрэн харж мэдэрч үйлээ барж байгаа, монголоо харьд ачуулаад явуулчихгүй л юмсан хэмээн амиа, амьсгалаа анирдан байна.

хэрэв тэд үнэхээр л монгол юм бол яагаад монгол хүний эх орондоо амьдрах эрхийг хангахын төлөө ямар нэгэн зүйлийг хийхгүй байна вэ, яагаад яагаад яагаад?

Учир нь тэд бол олдмолууд, тийм болохоор л тэдэнд өр зүрх гэж байдаггүй юм байна, тэдэнд монгол амь амьсгал, монгол яс, монгол цус, монгол хүн чанар гээч зүйл яс мах, цусанд нь шингээгүй учраас олдсон жаахан боломжоо ашиглаад идье ууя гэж бодох нь аргагүй шүү дээ. Тэд яваад л өгнө.

Харин бид энд байгаа, энд мөнхөд оршихиин учир оршин тогтнол орон зай, бууриа, монгол мөн чанар яс, цус, монголоо гэсэн юм бүхнээ авч үлдэх хэрэгтэй. Мөч бүхэнд монголоос минь асар их хурдтайгаар аливаа монголын баялаг бүхий л нүх сүвээр гадагшилж байна. яг л монголын маань бүх ус гадагшилдаг шиг. Хамаг л оюунлаг авьяастай хүмүүс энэ нийгэмд итгэл сэтгэл мэдрэл эрүүл мэндээ алдаад байгаа учраас үлдсэн өр зүрхээ бүрэн бүтэн авч үлдэхийн тулд л явсаар л байна, хортой хүнс идээд, хортой орчинд хортой шинжилгээгүй ус, давс, хүнсний бүтээгдэхүүн хэрэглэсээр монголчууд хорт хавдар, чихрийн шижин зэрэг өвчинд нэрвэгдээд мөнхийн нервийн эмзэгшилтэй, хардах өвчтэй хүмүүсийн арми нэмэгдсээр ...

Нар өглөө мандаад үдэш жаргадаг шиг, улирал солигдон он цагийн эрхээр цаг хугацаа түүx болон үлддэг шиг нэгэн өндөрлөгөөс нэгэн цаг хугацааны зааг дээрээс харахад монгол байхгүй болоход ойрхон байна, маргааш танай гэрийн өмнө дүнхийж байсан уул оргүй алга болоход та гэрээ хаана байдаг гэж баримжаалах вэ, байсан юмсандаа гээд хорин нэгэн мянгаа атгасаар хатсан навч шиг хаашаа ч юм хийсээд замхрах юм гэж үү?

Гэтэл өнөөдөр монголд юм бүхэн эрх мэдэлтнүүдийн сайн сайхны төлөө үйлчилж байна. хүн амын ихэнх масс төрөөс олгосон хэдэн төгрөгөндөө хавчигдан бүгд л зээлийн нийгэмд шилжээд тарчигхан амьдарч байна. Төр буюу хууль үйлчилдэггүй цөөнхөд зориулсан төрийн болон үйлчилгээний бүхэл бүтэн алба монголын татварын том толгойлогч болон данхайж байна. Гэтэл татварыг бүрдүүлэгчдийн эрх ашиг ажиллах нөхцөлийн төлөө хэзээ ч юм хийгээгүй, хийх ч үгүй. учир нь цэвэр цусны монголчуудаас айж байгаа нь тэр. Тэд хавчих тусам улам сайн хичээн ажилласаар л байдаг.

Хамгийн ойрын жишээ гэхэд замын цагдаа зөвхөн дохиогоо хангинуулах дарга нарын бөгсийг долоох шахан замын урсгалыг өөрчлөн байж тушаал биелүүлж байна, хажууханд нь бага насны хүүхэд зам гарч байна уу, авто осол болсон байна уу, замын бөглөрөл ямар байна энэ бүхэн тэдэнд үнэхээр хамаатай юм гэж үү, энэ цагдаагийн буруу биш харин олдмолууд ард түмнийг басамжан доромжилж төрийн, төсвийн, үйлчилгээнийхэн гэсэн тодотгол хаяг пайз зүүн биднийг дуртай тийшээгээ утсан хүүхэлдэй шиг хөдөлгөсөөр...

Гэтэл төр өөрөө хаа холоос тоглогчийн утсан хүүхэлдэй болсон байвал яах вэ?

Тэгэхээр бид хаачих вэ? Монголын ирээдүй ямар байх нь тодорхой. Буух эзэнгүй, буцах хаяггүй илгээмж мессеж монголыг хааш нь чиглүүлсээр байна вэ. Бидний дараагийн зогсоол, бидний дараагийн түүх хэрхэх бол...
өнөөдөр эмнэлэг зөвхөн танил тал мөнгөтэй нэгэнд нь үйлчлэхээс биш даатгалаараа эмчлүүлэгч нэгэн өдөржингөө дугаарлаад ажил тарахын алдад бараг л эмчлүүлэсэн нэр зүүгээд буцаж байна, өнөөдөр монгол шөнийн цэнгээний улс болсон гэдэгт хилсдэхгүй оройн цагаар вампир шиг бөөн ганган хүн сүргийн армийн шоу цэнгээний үйл ажиллагаа үргэлжилсээр, гэтэл монголд өнөөдөр эр цэрэг хэрэгтэй байна, монголд өнөөдөр өөрсдийн дотоодын үйлдвэрлэл хэрэгтэй байна, өнөөдөр монголд монгол хүн хэрэгтэй байна...

олдмолууд, дээр нь утсан хүүхэлдэйн тоглолт, хаана байгаа нь мэдэгдэхгүй утсан хүүхэлдэйгээр тоглогч Монголын юм бүхнээр дэндүү эрх дураараа тоглосоор байх юм гэж үү? Бид харсан ч хараагүй, мэддэгч мэдээгүй дүр эсгэх юм гэж үү? Бид амьд байхын тулд идэж байна уу? идэхийн тулд амьд байна уу? Бид хаана байна вэ? Монголын ирээдүйг, өөрийнхээ ирээдүйг юу гэж төсөөлж байна вэ?

Хорь гучин жилийн дараа Монголоос юу үлдэх вэ? Монголд ирээдүй гэж байна уу?

Мориндоо Монголчууд аа!

2011-04-11T22:49:00.001+08:00

Хэрэв Монгол улсыг удирдан чиглүүлж байгаа эрхмүүд ирээдүй хойчоо, эх орноо тэргүүн зэрэгт үздэг байсансан бол Монгол өдийд Азидаа толгой цохиж явах байлаа.

Даанч бид хэнийг сонгоод, хэнд эрх мэдэл өгөөд байна вэ? Нөгөөх л таньдаг худалчуудаа дахин дахин сонгоно, тэд одоогийн мөрдөгдөж байгаа хууль тогтоомж, чиг баримтлалаа буруу байгааг мэддэг ч өөрчлөхийг ч хүсэхгүй, яагаад вэ гэвэл тэдэнд ашигтайн дээр ард түмэн хүлцэнгүй тэнэгдүү байх нь дээр байдаг байх нь.

Тэд дараагийн сонгуулиар дахин өөр нэгэн үлгэр зохиохын төлөө, хэмжээлшгүй эрхэт хөмөрсөн тогоотойгоо үүрд үлдэхийн тулд үр хүүхдээ худалдаж ч мэднэ.

ганцхан жишээ хэлэхэд:

хэрэв тэд хүссэн бол 76 тэрбүмаар ард түмэндээ агаарыг, амьд явах эрхийг ажиллах орчинг өгчих байсан, харин одоо давхардсан төсөвтэй, данагар толгойтой эзэнгүй болсон монголыг өрсөн булаацалдаж, эрх мэдлээрээ иргэдээ дарамталж айлгаж байна, чимээгүйхэн биднээс хайртай бүхэн маань одож байна.

Сэрцгээе Монголчуудаа,

бид эдгээр үе дамжин лүйвардах нөхдүүдэд олон удаа боломж өгсөн, харсан, одоо эх орон, эрх чөлөө, амьсгалах агаар ч гүй болж байна эхнээсээ...

Хэрэв тэд хүссэн бол зөв хуультай болчих байсан, хэрэв тэд хүссэн бол монгол улсын иргэн бүр амьд явах, амьдрах нөхцөл боломжоор хангагдсан байх ёстой байсан, хэрэв тэд хүссэн бол иргэн бүр эх орноороо бахархах ёстой байсан.

Харин одоо яаж байна даа, та гараад хар даа, угаартай утаатай Улаанбаатар, бүгд л нэгэн хэвд цутгуулсан мэт хоолны төлөөх, багахан илч дулааны төлөөх тулаанд амь хайргүй тэмцсээр л байна, ард түмний тэсвэрлэх тэвчээрийн хязгаар одоо дээд цэгтээ туллаа. Бид өөрсдийнхөө төлөө, ирээдүй үр хойчынхоо төлөө дуу хойлоогоо нэгтгэх цаг ирлээ.

Бидний гэсэн юм бүхэн биднээс холдон одсор л байна, цэвэр агааргүйн улмаас, эрүүл хоолгүйн улмаас монголын олон мянган Хүүхэд-Бүрхад Монголдоо бууж чадахгүй байна, монголдоо газардсан ч өвчний уурхай болон элэг эмтэлсээр л байна.

Бид хэдий болтол амин хувиа бодох вэ, бид хэдий болтол тэдэнд итгэсээр л байх вэ? Миний хувьд хүлээлт итгэл тасарлаа, харин та?

Би харанга дэлдэж байна, та ч бас харанга дэлд, бүх Монголчууд харанга дэлдэхэд тэдгээр эрх мэдэлтнүүдийн амины хөмөрсөн тогоо хагарах нь лавтай, Тэд бол ард түмний төлөө ажиллах, үйлчлэх хэрэглэгдэхүүн болохоос биш бидэнтэй л адилхан бодьгалууд.

Харин

- бид бол ард түмэн, давуу эрхтэй байх ёстой,
бид бол монголын нүүр царай, амьд явах эрхтэй байх ёстой
- бид бол эх орон, эх орныхоо эзэн нь байх ёстой
- бид бол Монгол, эзэн Чингисийн үр удам байх ёстой.
- бид бол ард түмэн,
- бид бол Их Монголын галт тулга, асаж буй дээшлэн дээдэлж буй Монголын илч дулаан, амьд биелэл, илрэл.

Хүн бүр өөрөө өөртэй, ирээдүй хойчдоо үнэнч байгаасаа, хүн бүр энэ болохгүй байгаа нийгмийн эд эсийг зөв төлжүүлж, зөв эв эетэй гольдрол руу нь оруулахад хүчтэй дуу хоолой, эрхэм хэсэг нь гэж сэтгэн өөрөөрөө бахархаж байгаасай, хүн бүр амьсгал агаараа, гишгэх хөрс шороогоо тулах уул хайрханаа, алтнаас ч үнэтэй тунгалаг гол мөрөн, булаг шандаа алга болоод байгаад өр нь өвдөж, өдөр бүр эх орныхоо төлөө цохилж байгаасаа, эх орныхоо төлөө иргэн таны төлөө дуугарч байгаа нэгнээ бүү адалж байгаасай, хажуугаар нь чимээгүй өнгөрөхгүй байгаасай.
хэдүүлээ билээ, бид хэр том орон зайд амьдарч байгаа билээ дээ, бидэнд зориг итгэл тэмүүлэл тэвчээр л байхад бид энэ нийгмийг, энэ монголын ирээдүйг эв эетэй зөв тийш нь замчилж чадна, эх орондоо Та хэрэгтэй байхад, эх дэлхийдээ та үнэтэй байхад дуугай суусаар одох юм гэж үү?

Мориндоо Монголчуудаа, сэтгэлийн гүн дэх аргамаг хөлгөндөө мордоцгоо,

Миний, таны Монгол хөх тэнгэрээрээ гайхуулж байх болтугай

Миний, таны Монголд ирээдүй эрүүл бүтээн байгуулалт өрнөх болтугай

Миний, таны Монголд иргэн бүр эрх тэгш байгаасай

Миний, таны Монгол эрх чөлөө, үнэн ноёлох болтугай.

Мориндоо Монголчууд аа!

TSUNAMI IN MONGOLIA

2011-04-10T10:42:00.002+08:00

Lhagvasuren (Haranga) - Tengerleg Anduud

2011-04-02T21:16:00.001+08:00

миний монголд хаврын урь орлоо

2011-03-29T22:27:00.005+08:00

Домгийнцэнхэр Далай ээж

2011-03-08T18:16:00.002+08:00

Цэнхэр жигүүр

2011-03-08T00:49:00.005+08:00

Сайн байна уу? Эрхэм анд минь. Хөвсгөл аймагт зохиогддог Мөсний баярыг сонирхож үзсэн талаархи сэтгэгдэлээ оруулж байгаадаа баяртай байна. Хотод өсөж төрсөн бидний хувьд Монгол гэдэг нэр тэр чигээрээ эх нутаг минь санагддаг хэдий ч эх орныхоо байгалийн сайханд очиж үзэх завшаан тэр бүр олддоггүй билээ.

Миний суусан машин өндөрлөг өөд өгссөөр л байлаа. Хаяа машин зогсох бүрд гадаа гарч шөнийн тэнгэрт битүү түгсэн оддоос адис аван цэнгэг агаарт нь шунан дурлаж байв. Замд гарсан шөнө цас шуурч зам таглагдаж, олон машин цасанд суусан байлаа. Харин манай машин яагаад ч юм бэ эх нутгаадаа гүйх унага адил нисэх мэт хурдалсаар байгаа нь гайхалтай.

Ингээд товлосон цагаасаа хамаагүй эрт нар мандаагүй байхад Хөвсгөл аймгийн төв Мөрөнд буулаа.

Арваад жилийн өмнө Тойлогтод болдог тэмцээнд ирээд буцахдаа цэлэлзэн цэлэлзэх энгүй уудам далай ээжийг хараад баясан хөөрч, бахархах сэтгэл төрж байсан билээ. Хаашаа ч юм бэ биднийгээ орхиод явсан эмээгээ би тэр далай ээжийн наранд гялтганах гайхамшигт гялбаан дундаас олж харах шиг, хэзээ ч уулзаагүй ч мөнхөд хүлээсэн дэлхий ээж минь тэвэрч аваад духыг минь илбэх шиг тийм нэгэн сайхан мэдрэмж төрж, тэр сайхан мөчийг сэтгэл зүрхэндээ нандигнан мөнхөлсөн байсан юмсан. Далайн мандалд гялалзах нарны гэрэл хичнээн тансаг гээч. Одоо ч нүдээ аниад түүний аниргүйд уусан эрхэлмээр...

Харин өнөөдөр би эх нутагтаа ирлээ. Хэнийг ч танихгүй хаачихаа ч мэдэхгүй байсан хэдий ч сэтгэлд бугшсан гуниг гутрал айдас түгшүүр, үл итгэл үзэн ядалтын ханыг нураахаар, басхүү өөрийгөө нээн олохоор энд л эх нутгийнхаа өндөрлөг өөд тэмүүлсээр ирсэн гэдэгтээ л итгэлтэй байлаа.

Тэгээд саяхан оны өмнөхөн нээлтээ хийсэн шинэхэн Тэнхлэг гэдэг нэртэй зочид буудалд буудаллаа. Шинэхэн бас тавлаг сэтгэлээсээ бүхнийг тохижуулсан энэ айлд буусандаа баяртай байлаа. Хотын шавааралдсан олон барилга, нүд эрээлжлэх элдэв авцалдаагүй зарлалын самбар шиг бүхнээс залхсан би нүүрэн дээрээ нохойтой орж болохгүй гэсэн баг зүүгээгүй энгийн эгэл даруухан улаа бутарсан хүмүүсийг харахад сэтгэл их л өег байлаа.

Мөрөн хотоо нар зөв тойрохоор шийдэн өрөөнөөсөө гарлаа. Хамгийн түрүүнд Хөвсгөл аймгийн музеигээр зочиллоо.   2010 оны 7 сарын 27-ны өдөр Манжийн дарлалын эсрэг үндэсний тусгаар тогтнолыг сэргээхийн төлөө ард түмний зэвсэгт тэмцлийг удирдсан Хотгойдын Шадар ван Б.Чингүнжав/1710-1758/- ын 300 жилийн ойг тэмдэглэсэн ажээ.   Зураач Тэнгисболдын   зурсан нэгэн зургийн өмнө зогсохдоо эх нутгийнхаа хилийн дээсийг алхаснаа, хэзээ ч эргэж очихгүй эх нутгаадаа салхиар бас тэртээ дээр элин халих шувуудаар үг дайж байсан тэр л үед очих шиг. Үнэндээ түүнийг эх нутгаа гэсний төлөө үгүйлшгүй муугаар тамлан зовоосон юм гэдэг, түүнээс ердөө л эрхий хуруу нь л эх нутагтаа ирж амирласан гэдгийг сонсоод сэтгэл өмөрч байлаа. Яагаад ч юм бэ яг одоо би бас бид эх нутгаа монголын минь түүх хаашаа нүүж байгааг мэдэх сөхөөгүй амин хувиа бодож байгаадаа, тавлаг амьдрал хэдхэн төгрөгний төлөө нэр төрөө ясаа үзэл бодол итгэл найдвараа гээж байгаагаа, байсан байх ч ёстой миний монголын уул нурууд гол горхио хаанаас ч эрээд хайгаад олж чадахааргүй тэднийгээ хийсгэн үдэж байгаагаа, арчаагүйн торноос хэрхэн мултрах вэ, яавал дээр вэ хэмээн бодолхийлэн зогсохдоо    газар шороо гал голомт минь хэмээн шивнэсэн юм.

Түүх түүхийг төрүүлдэг шүү дээ, бидний бичиж туурвих түүх ямар байх бол...

Хөвсгөл нутагт бидний багадаа уншиж байсан Шүхэрч Буниа өгүүллэгийн баатар Гэлэнхүү тэр үеийн Сайн ноён хан аймгийн Далай Чойнхор вангийн хошуу одоогийн Хөвсгөл аймгийн Жаргалант суманд ядуу ард Хайнзангийн хүү болж төрсөн ажээ. Тэрээр багадаа эцэг эхийн үнэн сүслэлийг даган Агьтын хүрээ, Мандахын хүрээнд шавилан сууж байгаад удалгүй сүмээсээ оргон төрсөн нутгийнхаа уул нуруудад ан гөрөө хийж амьдрах болжээ. Эцгийнхээ дарх хийхэд хажууд нь байсаар байгаад аливаа зүйлийг урлан бүтээхдээ адтай нэгэн болжээ.   Музеид Гэлэнхүүгийн    хэрэглэж байсан модны уранд эвлэгхэн бэхлэгдсэн алх дөшийг хараад одоо ч гэсэн олон олон гайхамшигтай бүхнийг шинээр сэдэн хийхдээ бэлэн байгаа нь түүний хадат цохион дээрээс жигүүрээ дэлгэн нисэж байгаа эрч хүчийг давтан цохих алх дөшний анир цуурайтах шиг. Одоо цагт түүний Тэнгэрт шувууд адил нисэн дүүлсэн домог мэт түүхийг алдаршуулан Мөрөн хотын нисэх онгоцны буудал дээр түүний жигүүрлэн нисэж буй хөшөөг байрлуулсан нь өглөө бүхний нарыг тосон тэмүүлж үдэш бүрийн оддын чуулганд цэц булаацалдах мэтээ.

... Сэм сэмхэн санаа алдан зүрхээ би чагнана
Сэрүүн сайхан нутгаа хэн хэнээс илүү би үгүйлнэм
Өндрийн өндөрт байдаг юм миний эх орон
Өөрөөсөө ч илүү чамдаа би хайртайсан эх нутаг минь...

Тиймээ, тэнгэрт тэмүүлсэн Монголын минь мөнхийн оршихуй нэгэн цагт өндрөөс өндөр хүүгээ өрлөг далайдаа буулгажээ. Тэр бол мөн л Гэлэнхүүгийн нутаг болох Далай Чойнхор вангийн хошууны Тулт, Бага булаг хэмээх газарт Пүрэвийн хүү болон 1881 онд мэндэлсэн өндөр хэмээн алдаршсан Гонгор/1881-1930/ байлаа.   Монголын домогт хүү П.Гонгор Богдын өргөмөл хүү нэрээр хүрээнд сууж, Сайн ноён хан Намнансүрэнг дагалдан Петрбургт очиж байсан тэрээр Богдын их сангийн даамал болж байсан төдийгүй   1925-1926 онд гаалийн хороонд шалгагч хийж байсан, арван засгийн наадамд гурван даваатай, 2 хүү 2 охины эцэг эгэл даруу хүнд тусархуу, цагаан цайлган хүн байжээ. Эхнэр Должинсүрэнд түүнд жаран хурганы арьс зүүж дээл хийж, төлгөн хонины арьсаар малгай хийж өгдөг байжээ. Түүний гутлыг жирийн хүн өмсөхөд аарцагт нь хүрдэг байсан байна. Өндөр Гонгор моринд мордолгүйгээр зүгээр л хөлөө давуулаад мордчихдог байсан аж. Түүнийг 2 метр 60 см орчим өндөртэй байсан гэж тэмдэглэн үлдээсэн байдаг юм байна. Хөвсгөлийн музеин өмнө өндөр Гонгорын бодит хэмжээн дээр тулгуурласан хөшөөг харж зогсохдоо үлгэрийн аварга баатар домгоос амилан гараад ирээ юу гэмээр байлаа.

Уг музеид монгол ардын наадгай тоглоом, хөгжмийн зэмсэг, Бурхад, алтан ганжуур данжуурын эх, нутгийн ан амьтад жигүүртэн шувуудын чихмэл, үндэсний соёл ёс заншилыг илтгэх дээл хувцас эдлэл хэрэглэл гээд л бүр МЭӨ арслан зааны соёо хүртэл байлаа.

Музеигээс гарахынхаа өмнө түүхийн эхлэл хаана байна, түүхийн төгсгөл хаана байна хэмээн өөрөөсөө асуун зогсохдоо наян жингийн дөнгөөр нутгаа худалддаг этгээдүүдийг дөнгөлөхсөн хэмээн гуниглан бодсоноо нуух юун.

Миний дараагийн орсон газар бол Улсын тэргүүний өсөх нахиа 3 дугаар цэцэрлэг байлаа. Аргагүй л улсын тэргүүний гэсэн нэрэндээ тохирсон өхөөрдөм тоглоомуудаар цэцэрлэгийн хашаагаа дүүргэсэн хүүхэд шуугисан нялх нахиа модонд нь нахиалсан хаврын урь шиг сайхан цэцэрлэг маш их таалагдлаа. Бяцхан хэрэм модноос зүүгдэж, буга хандгай нь цаатныхаа   урцын өмнө дүүхэлзэн, цох хорхой жаран хөлт газарт шигдэн нуугдсан аварга том мөөг, шийгуагаар хөөрхөн саравч хийсэн зэрэг нь үр хүүхэд ирээдүй хойчийнхоо төлөө сэтгэлээ шингээн урласан   бүтээлүүд байлаа.

Салхи хаяа хаяахан ширүүснэ. Хотын нөмөрт хоргодсон утаатай цас, машины сигнал ундууцсан хүмүүс аль нь ч алга, харин хацар нь улаан ч нүд нь гэрэлтэй цаанаа л нэг алсыг харан алхах эрүүл хүмүүс нүдэнд тусч байлаа. Би явсаар нэгдсэн эмнэлэг дээр ирлээ. Уг эмнэлгийг 1971 онд БНМАУ -ыс 50 жилийн ойн баяраар Зөвлөлтийн ард түмнээс иж бүрэн тоноглолын хамт бэлэглэсэн аж. 220 хэвтэн эмчлүүлэх ортой, 4 давхар тус эмнэлгийн нэгдүгээр давхараар нэг бүрчлэн орж үзлээ. Эмнэлэг болохоор мэдээж хүмүүс их үйлчлүүлж байлаа. Олон алдартантай гавьяатуудыг төрүүлсэн энэрлийн дээд Бурхан эмч нартаа сайныг ерөөн эмнэлгээс гаран хаачихаа харан зогсох агшинд нэгэн залуу уур завсуулан энгэр задгай эмнэлгийн хаалгаар гарч ирлээ. Би хамаг товч бүчээ битүүлэн зогсохдоо түүн рүү ажин харвал баньдтай боллоо, хүүтэй боллоо хэмээн чангаар хэлэн цаана машинд хүлээн суугаа гэрийнхэн рүүгээ гүйсээр одлоо.

Тиймээ хүйтэн жавартай энэ л өдөр , яг одоо энэ агшинд Миний монголд нэгэн хүү мэндэллээ. Би ч бас баярлан хөөрч дуу аялсаар хотын төв талбай руу алхлаа. Арваад жилийн өмнө ирэхэд БНМАУ-ын баатар Лхүнрэвийн Даваадоржийн хөшөөтэй, түүний нэрээр уг төв талбайг нэрлэдэг байсан бол харин өнөөдөр Хотгойдын шадар ван Чингүнжавын нэрэмжит болсон байлаа.

Чингис хааны үрийг язгуураас яллах хууль үгүй... хэмээх бичээстэй өндөр сүрлэг гартаа манжийн амбанд өргөх бичгээ атган тэнгэр өөд цоройх мориндоо мордсон Чингүнжавын хөшөө нэн сүрлэг аж.

Амандаа Чингис хааны үрийг язгуураас яллах хууль үгүй хэмээн шивнэсээр би зочид буудал руугаа буцлаа. Маргааш нь нөхөр охин хоёртойгоо хамт мөсний баярыг үзэхээр Хатгал руу хөлгийн жолоогоо заллаа.

оддын тоосонд

2011-03-07T14:07:00.001+08:00

олон зуун жил ганцаардсан ч саран гоо бүсгүй хүлээсээр л
олон олон удаа эргэлдсэн ч орчлонгийн түүх дуусашгүй ээ
өнөөдөр л эхний бөгөөд эцсийн дэвэлтээрээ хорвоог тольдох эрвээхий
өнө удаан эрхэсийн доор эрхлэн нялхрахыг юутай их хүснэм бэ

алтан нарны гэрэлт илчинд дагжин чичрэн зогсохдоо
алган дээр буух оддын тоосонд мөрөөдлөө нисгэнэ
хүүхэд шуугисан инээд хөөрийн дунд ч тэрээр
хэмжээлшгүй их ганцаардлыг юутай их мэдэрнэм бэ

сүүлчийн навч хүйтэн салхинд тууугдан туугдахдаа
сэхүүн бардам нахиаг бүйвээлэн бүйвэлсээр одлоо
уудам хорвоог тольдох гэгээн тунгалаг мөрөн нь
уйтай орчлонгийн энэрлийн дуунд уярмуй

Madness- Saikhnaa- Zamd garlaa

2011-02-24T14:31:00.001+08:00

цасан аялгуу

2011-02-19T20:45:00.001+08:00

Өдөр шөнийн дурлал

2011-02-17T19:46:00.000+08:00

...Өдөр өдөртөө, шөнө шөнөдөө, үүрийн гэгээ үүрийн гэгээдээ дурладаг энэ хорвоод өдөр шөнөд дурлажээ. Учир нь өдөр хэзээ ч шөнийн нам гүмийг мэдэхгүй болохоор учир нь тэр хэзээ ч шөнийн олон оддын бүжгийг харж байгаагүй болохоор шөнийн тухай хүмүүсийн ярьсан намуухан үлгэрт согтоод шөнөд чин сэтгэлээ нээн нээн дурлажээ. Харамсалтай нь шөнө гэрэл гэгээг хүсдэггүй дэндүү бардам нэгэн тул өдрийг байнга дорд үзнэ.

Өдөр өөрийн болон өрөөлийн төлөө өдөржингөө гүйгээд эцэж ядраад амрах гэтэл шөнө бусдаас илүү гэрэлтэй чи бусармаг явдалтан хэмээн илүү үзэн өөнтөглөнө. Харанхуй шөнө хатуу гараараа хаа хүрсэн бүхнээ эвдэн сүйтгэсээр л. Өдөр тэсээд л байлаа. Учир нь тэр хувь заяндаа итгэсэн юм. Өдрүүдийн дундаас хэн ч хэзээ ч шөнөд дурлаж зүрхлээгүй л байлаа. Харин тэр дурлажээ. Тэр шөнийн нам гүмд дурласан юм, тэр шөнийн тэнгэрт түгсэн мянга мянган оддын чуулганд дурласан юм, тэр шөнийн дотоод мөн чанар болсон чимээгүйхэн өндөрлөг өөд дууддаг нууцад дурласан байлаа. Тэрээр өөрийн энэ сайхан мэдрэмжийг шөнөтэй нэгдсэн нэгдлээр л мэдэрч чадсандаа, өөрийгөө азтайд тооцдог байлаа.

Гэвч олон олон дэндүү олон шөнө нулимсан далайн дунд зогсохдоо оддын дундаас хэн нэгэн авч нисээд оосор бүчгүй орчлон руу аваад яваасай хэмээн хүсэн хүлээсээр л байлаа.

Үнэндээ өдөр шөнийг өөрийг нь хайрлана, сайхан сэтгэлийг ойлгож засарна гэдэгт итгэж байлаа, өдрийн шөнийг хайрласан хайр үнэн чин сэтгэлийнх болохоор ойлгож ухаарна гэж итгэж байлаа, тэрээр хэзээ нэгэн цагт өөрөө өөрийгөө гээн гээн өөрт нь дурласныг, өөрөө өөрийгөө задлан байж шөнө амрагтаа бүрэн нэгдсэнийг мэдэх байх гэж горьдож байлаа.

Харамсалтай нь энэ бүхэн талаар болжээ. Учир нь дэндүү харанхуй орчлонд шөнийн боол болон тас харанхүйн дундах нэгэн гэрэл шөнөд амиа өргөжээ.

Эвий дээ, өдөр минь дээ чи минь ядаж үүрийн гэгээд дурласансан бол чи минь ядаж үдшийн бүрийд дурласансан бол яах байсан юм бол доо. Олон олон зуун жилийн дараа чиний зоригийг орчлон ертөнц сайшаах болно, олон олон өдрүүд шөнөд дурлан шөнийн харанхуй бүдүүлгийг бага багаар мэдрэх болно.

Гэрэл гэгээн хязгааргүй далайн бяцхан дусал гэгээхэн өдөр минь чамдаа сөгдөн мөргөмү.

Good Boys group - Tell me why MGL

2011-02-15T00:31:00.001+08:00