Энэ өдөр Гэгээн ялгуулсан хаан Бурхан багшийг номын хуримд залах цаг дор газар хатгасан шүдний чигчлүүр мод тэр дариудаа гол, мөчир, үндэс нь долоон эрдэнийн мөн чанартай, таван багцадын хэмжээтэй, мөчир бүрээс нь цэцэг навч дэлгэрэн дэлгэрсэн үзэсгэлэн төгөлдөр мод болон хувирчээ. Энэ модны гэрэл нь нар, сарыг сүрээр дарж, анхилуун тансаг үнэр нь бүхэнд таашаагдаж, салхины аясаар намилзан найгахад нь номын дуу дуурсан дуурсаж байсан ажээ.
Энэ өдөр Удраяана хаан бээр Бурхан багшийг хүндлэн биширч эхлэхүй зүүн баруун зүгт нь байсан хоёр уул амар амгалан хутгыг олж үндэс бүхэн дэлгэрсэн үзэсгэлэн төгөлдөр эрдэнийн уул болон хувирчээ. Баруун ууланд хүмүүн төрөлхтөн хотол төгс буян үрийг эдлэн жаргахуй, зүүн ууланд нь адгуус амьтад эх болсон шимт байгалиа бишрэн айх аюулгүй амар жимэр цэнгэн найрсаж буйг үзүүлжээ.
Энэ өдөр бурхан багшийг Шүнчидала хаан бээр тахиж хүндлэхийн цаг дор нүүрээ угаасан ус нь дусагнан буухдаа найман гишүүн төгөлдөр усаар рашааны дээд элбэг, 200 багцадын хэмжээтэй, долоон эрдэнээр чимэглэсэн, тэрэгний дугуйны мөөрний дайтай дугуй дугуй гэрлүүдээс нь өнгө өнгийн туяа сацарсан үзэсгэлэнт нуур болгон хувиргажээ.
Энэ өдөр бурхан багшийг Индраварма хаан тахиж хүндлэхүйн цаг дор урд өдрийн хувилгаж буй болгосон рашаан нууранд дөрвөн талаас нь найман салаа гол гарган урсгаж бас эргүүлэн нуур луу нь цутгуулжээ. Энэ үеэс нуур луу нь эргэн цутгаж буй голын дуунаас нь Бодийн гишүүн долоо, Хутагтын найман мөр, Найман гишүүн, Гурван намтар, Зургаан барамид, Дөрвөн цаглашгүй тэргүүтэй номын дуу дуурсаж байжээ.
Энэ өдөр Ариун өглөгт хаан хүндлэн дээдлэхүй цаг дор Бурхан багшийн нүүр царайнаас 3000 ертөнцөд гэрэл түгэн сацарчээ. Энэ гэрэл гэгээ биед нь туссан хүмүүн бүгдийн сэтгэлийг гурван хор, таван түйтгэрээс ашид хагацааж бие сэтгэл нэн амгалан байхаар хувилгажээ.
Личчива нар өргөл хүндлэл үйлдэв. Түүнээ бурхан багш бээр олон нөхдийг нааш цааш нэг нэгнийхээ санааг мэдэлцэх хийгээд тус тусын буян нүглийн үйлийг мэдэх болгон зохиосонд бүгдээр баясан цэнгэв.
Энэ өдөр Бурхан багшийг Шагжаан язгууртан нугууд залжээ. Тэр үед Бурхан багшийн шавь нөхөд бүр тус тусдаа Хүрдэн эргүүлэгч их хаан болоод, хаан төрийн долоон эрдэнэ, 1000 хөвгүүн, жижиг хаад болон олон түшмэлээр хүрээлүүлэн дээд номыг гүйцэд эдлэн буйг харуулахуйд тэнд цугласан бүгдийн сүжиг хүндлэл улам дэлгэрчээ.
Энэ өдөр Хурмаст тэнгэр бээр арслант ширээ бэлтгэн бурхан багшийг залжээ. Ингээд бурхны гэгээнээ Хурмаст бээр тахихын цаг дор Бурхан багшийн баруун мутрын үзүүр ширээнд хүрэхүйд их дуу гаран Очирваань бурхан нарч ирэн гал бадарсан очироор тэрсүүдийн багш нарыг үлдэн хөөжээ. Ингээд мянган тэрсүүд Бурхан багшийн шашинд орж гэлэн болон ном заалгаж нирвааны хутгийг олж буйг үзүүлжээ.
Энэ өдөр Эсура тэнгэр бээр тахихуйд Бурхан багшийн тэргүүн нь Эсурагийн \тэнгэрийн орон\ оронд хүрч тэгэхдээ бие лагшин нь огторгуйн энг огт халхлахгүй шил шиг тунгалаг байгааг бүгд илт үзэж буйг харуулан хувилгажээ.
Энэ өдөр Бурхан багшийн дөрвөн махаранз тахихуйд Бурхны гэгээний бие лагшин орчлонгийн дээд хязгаарт хүрч буйг цугласан бүгдээрээ харж зарлигласан номыг нь нийтээрээ илхэн сонсож буйг харуулвай.
Энэ өдөр Итгэлгүйд бээр тахихын цагт Бурхан багш арслант ширээнээ залрахуйяа бие лагшин нь эс үзэгдэн олон мянган гэрэл түгэн сацарч, зарлигаар ном айлдсаныг нь олон түмэн сонсож буйг үзүүлэн хувилгажээ.
Энэ өдөр гэргийтэн Чита бээр урин залахын цагт бие лагшинаас нь бясалгалын хүч болох алтан өнгөт гэрэл сацран дэлгэрч 3000 ертөнцийг гийгүүлэн, Бурхны гэрэл туссан амьтан бүгдийн сэтгэлийн гурван хор арилж хамаг амьтан бие биедээ эцэг эх, ах дүү мэт эв найртай болж буйг үзүүлэн хувилгажээ.
Энэ өдөр Бурхан багш хаан Шүнчиндалагийнд морилон залрахуйд хүйснээс нь долоон алд гэрэл сацарч түүний үзүүрт хорол бүхий чимэг сэлттэй Бурхан багшийн лагшин нэгээс хоёр, хоёроос дөрөв, дөрвөөс найм, наймаас арван зургаа гэхчилэн хоёр дахин, дахин томорсоор 3000 ертөнцийг дүүргэж байгаа нь бүгдэд илт болон хувилжээ.
Энэ өдөр Удраяана хаан Бурхан багшийн тахихдаа маш их цэцэг өргөн дээдлэхүй өндөр нь Цанба тэнгэрийн орон хүрсэн, зэндмэнээр хээлсэн 1250 тэрэг тус бүрд Бурханы гэгээн хувилан заларч гэрэл, сүр нь 3000 ертөнцөд тарж буйг үзүүлжээ.
Энэ өдөр Бурхан багш Бимбисара хааныд морилон залрахуй бие сэтгэл үлэмж амгалан болдог 100 амтат идээгээр сав бүгд бялхжээ. Бурхны гэгээн баруун мутраараа газар хатгахуйд 18 тамын амьтны уйлан гаслах, орь дуу тавьж буй нь бүхэнд ил болжээ. Айж эмээн орчлонгоос уйсгуур төрж зарим нь их нигүүлсэнгүй болж буйг, зарим нь нирваан, үлэмж эрдмийг олж буйг харуулжээ.
No comments:
Post a Comment